1Liꞌ naꞌa̱ naꞌ chaꞌ ntsuꞌu quityi yaꞌ tsuꞌ cui̱ nu cusuꞌ laca loo nu ntucua lo yaca xlya biꞌ. Sca quityi nchcu̱ꞌ, nu ngutu ti ñaꞌa̱ laca biꞌ; juaꞌa̱ tyucuaa chu̱ꞌ quityi biꞌ cua nscua chaꞌ. Cati seꞌi̱ ngaꞌa̱ nguiñaꞌ tuꞌba quityi su ndyacu̱ꞌ biꞌ.
2Liꞌ naꞌa̱ naꞌ chaꞌ ndu̱ sca ñati̱ nguula, sca xca̱ jiꞌi̱ ycuiꞌ Ndyosi. Cui̱i̱ tsa ngusiꞌya xca̱ biꞌ: ―¿Tilaca laca nu ntsuꞌu chacuayáꞌ jiꞌi̱ chaꞌ suu nguiñaꞌ nu ngaꞌa̱ tuꞌba quityi nchcu̱ꞌ biꞌ, chaꞌ chcana quityi biꞌ? ―nacui̱.
3Liꞌ masi tyucui ñaꞌa̱ su ntucua ycuiꞌ Ndyosi biꞌ, masi tyucui ñaꞌa̱ lo yuu chalyuu, masi tyucui ñaꞌa̱ chaca baꞌa chalyuu su ndyaa ñati̱ nu cua ngujuii, ná ngujui nu scana jiꞌi̱ quityi chaꞌ chcuiꞌ nguꞌ lo.
4Tiꞌi tsa ngusiꞌya naꞌ liꞌ, chaꞌ ngaꞌaa ngujui nu scana jiꞌi̱ quityi chaꞌ chcuiꞌ nguꞌ lo.
5Liꞌ nguxana nchcuiꞌ sca nu cusuꞌ loꞌo naꞌ: ―Ngaꞌaa xiꞌya nuꞌu̱ juani ―nacui̱―. Cua ngujui nu scana jiꞌi̱ quityi biꞌ, nu taca jiꞌi̱ suu nguiñaꞌ biꞌ, masi nu cati tyaꞌa nguiñaꞌ nu ngaꞌa̱ tuꞌba quityi biꞌ. Ycuiꞌ yu biꞌ laca loo jiꞌi̱ nguꞌ Judá, chaꞌ la cuiꞌ tyaꞌa ñati̱ jiꞌi̱ jyoꞌo David laca yu biꞌ. Cua ntiji̱loo yu jiꞌi̱ nu xñaꞌa̱, biꞌ chaꞌ juani taca jiꞌi̱ yu scana yu quityi biꞌ.
6Liꞌ naꞌa̱ naꞌ ndu̱ sca ñati̱; ñiꞌya̱ ñaꞌa̱ sca xlyaꞌ cuañiꞌ, juaꞌa̱ ñaꞌa̱ ñati̱ biꞌ. Ndu̱ yu biꞌ nde loo su tlyu su ntucua ycuiꞌ Ndyosi, laja su ndu̱ nu nguꞌ cusuꞌ biꞌ, laja nu naꞌni tacati biꞌ. Tya tyaca̱ꞌ nscua cuayáꞌ hichu̱ꞌ yu tya loꞌo ndyujuii nguꞌ jiꞌi̱ yu tsaca quiyaꞌ, juaꞌa̱ ñaꞌa̱ yu biꞌ. Cati tyaꞌa sata ntucua hique nu ñiꞌya̱ ñaꞌa̱ xlyaꞌ nu ndu̱ cuentya jiꞌi̱ Jesús. La cuiꞌ juaꞌa̱ ntucua cati tyaꞌa cloo Ni; nu cloo Ni ni, biꞌ laca cati tyaꞌa cuiꞌi̱ lubii nu laca Xtyiꞌi ycuiꞌ Ndyosi nu nduꞌu ndyaa tyucui ñaꞌa̱ chalyuu.
7Liꞌ ndyaa nu ñiꞌya̱ ñaꞌa̱ xlyaꞌ biꞌ ndyiquiꞌya Ni jiꞌi̱ quityi nchcu̱ꞌ nu ntsuꞌu yaꞌ tsuꞌ cui̱ nu cusuꞌ laca loo nu ntucua su tlyu biꞌ.
8Loꞌo ngusñi Ni quityi biꞌ, liꞌ ngutu̱ sti̱ꞌ ca taꞌa jacua naꞌni tacati biꞌ; loꞌo juaꞌa̱ nu calaa ntucua jacua tyaꞌa nguꞌ cusuꞌ biꞌ, ndu̱ sti̱ꞌ nguꞌ nde loo nu ñiꞌya̱ ñaꞌa̱ xlyaꞌ biꞌ. Ntsuꞌu sañi yaꞌ nguꞌ cusuꞌ biꞌ, loꞌo juaꞌa̱ ntucua cuu oro yaꞌ lcaa nguꞌ cusuꞌ biꞌ; ntsuꞌu yana joꞌó nu ndyaqui̱ neꞌ cuu biꞌ. Ñiꞌya̱ loꞌo ntyucua xtyiꞌi yana joꞌó ndyaqui̱ biꞌ, juaꞌa̱ ndyaa chaꞌ nu nchcuiꞌ nguꞌ ca slo ycuiꞌ Ni loꞌo nchcuiꞌ ñati̱ jiꞌi̱ ycuiꞌ Ndyosi loꞌo Ni.
9Liꞌ ndyula tuꞌba nguꞌ biꞌ sca ji̱i̱ chaꞌ cuaꞌni chi̱ nguꞌ loo nu ñiꞌya̱ ñaꞌa̱ xlyaꞌ biꞌ. Bilya cuna naꞌ ji̱i̱ nu ndyula tuꞌba nguꞌ biꞌ: Cua nda ycuiꞌ Ni chacuayáꞌ jinuꞌu̱ chaꞌ xñi nuꞌu̱ quityi nchcu̱ꞌ biꞌ, nacui̱ nguꞌ, chaꞌ suu nuꞌu̱ nguiñaꞌ nu ngaꞌa̱ tuꞌba quityi biꞌ. Na cua ndyujuii ñati̱ jinuꞌu̱ tsaca quiyaꞌ; pana loꞌo ngujuii nuꞌu̱ ni, liꞌ nguaꞌni nuꞌu̱ cña cuentya jiꞌi̱ ya chaꞌ caca ya ñati̱ jiꞌi̱ ycuiꞌ Ndyosi. Ñati̱ nu cua ndyuꞌu cua ñaꞌa̱ ca quichi̱ tyi nguꞌ, ñati̱ nu nchcuiꞌ cua ñaꞌa̱ ca lo chaꞌcña nu nchcuiꞌ ñati̱ chalyuu, ñati̱ nu ndyuꞌu tyucui ñaꞌa̱ chalyuu mala su ndiꞌi̱ ñati̱, biꞌ ñati̱ nu ngusubi nuꞌu̱ jiꞌi̱.
10Cua nguaꞌni nuꞌu̱ chaꞌ caca nguꞌ biꞌ sca lo ñati̱ nu ndulo tsa cuentya jiꞌi̱ ycuiꞌ nuꞌu̱, chaꞌ taca cuaꞌni nguꞌ cña nu ntiꞌ ycuiꞌ Ndyosi Sti na. Loꞌo juaꞌa̱ caca nguꞌ biꞌ loo nde chalyuu.
11Loꞌo ndye ndañi ji̱i̱ biꞌ, chaca quiyaꞌ naꞌa̱ naꞌ ca biꞌ. Liꞌ ndyuna naꞌ ndyula tuꞌba tyu̱u̱ tsa mil tyaꞌa xca̱ jiꞌi̱ ycuiꞌ Ndyosi; nde chu̱ꞌ su ntucua yaca xlya, nde chu̱ꞌ su ndu̱ naꞌni tacati biꞌ, nde chu̱ꞌ su ndu̱ nguꞌ cusuꞌ biꞌ, ca biꞌ ndu̱ quiñaꞌa̱ tsa nguꞌ xca̱ biꞌ liꞌ.
12Cui̱i̱ tsa ndyula tuꞌba nguꞌ liꞌ: Cua ndyujuii nguꞌ jiꞌi̱ nu ñiꞌya̱ ñaꞌa̱ xlyaꞌ biꞌ tsaca quiyaꞌ, nacui̱ nguꞌ. Xquiꞌya ñati̱ chalyuu, biꞌ chaꞌ ngujuii Ni. Loꞌo juani ngaꞌa̱ chaꞌ chcuiꞌ na jiꞌi̱ Ni, chaꞌ lcaa lo cña tsiyaꞌ ti nchca jiꞌi̱ Ni cuaꞌni Ni; juaꞌa̱ na jiꞌi̱ Ni laca lcaa lo na tsiyaꞌ ti. Lcaa chaꞌ jlo tiꞌ Ni, lcaa cña nchca jiꞌi̱ Ni; biꞌ chaꞌ ndyuꞌni chi̱ na loo Ni, ndyuꞌni tlyu na jiꞌi̱ Ni, loꞌo juaꞌa̱ tsoꞌo tsa chcuiꞌ na jiꞌi̱ Ni loꞌo ñati̱. Juaꞌa̱ nacui̱ xca̱ jiꞌi̱ ycuiꞌ Ndyosi loꞌo ndyula tuꞌba nguꞌ.
13Liꞌ nguañi ndyula tuꞌba lcaa ñati̱ tyucui ñaꞌa̱ chalyuu, lcaa nguꞌ nu cua nda ycuiꞌ Ndyosi jiꞌi̱ lijya̱ nde chalyuu; masi nde cua̱ su ntucua ycuiꞌ Ni, masi nde lo yuu chalyuu, masi chaca baꞌa chalyuu su ndyaa ñati̱ nu ngujuii, masi lo tyujoꞌo, lcaa ñati̱ biꞌ ndyuꞌni tlyu nguꞌ jiꞌi̱ ycuiꞌ Ndyosi. Ndiꞌya̱ nchcuiꞌ nguꞌ: Cuaꞌni tlyu na jiꞌi̱ ycuiꞌ nu Cusuꞌ nu ntucua ca su tlyu, nacui̱ nguꞌ, cuaꞌni chi̱ na loo Ni. Juaꞌa̱ nu ñiꞌya̱ ñaꞌa̱ xlyaꞌ biꞌ, cuaꞌni tlyu na jiꞌi̱ Ni. Sca ti ycuiꞌ Ndyosi ntsuꞌu chacuayáꞌ jiꞌi̱ Ni chaꞌ cuaꞌni Ni lcaa lo cña tsiyaꞌ ti; loꞌo juaꞌa̱ ná ngaꞌa̱ chaꞌ tye chaꞌ jiꞌi̱ ycuiꞌ Ni tsiyaꞌ ti, nacui̱ nguꞌ.
14Nu ca taꞌa jacua naꞌni tacati biꞌ ni, nguxacui̱ niꞌ chaꞌ jiꞌi̱ nguꞌ liꞌ: ―Juaꞌa̱ caca chaꞌ lacua ―nacui̱ niꞌ. Liꞌ ndu̱ sti̱ꞌ nu calaa ntucua jacua tyaꞌa nguꞌ cusuꞌ biꞌ, nguaꞌni tlyu nguꞌ jiꞌi̱ ycuiꞌ Ndyosi, chaꞌ ná ngaꞌa̱ chaꞌ tye yija̱ jiꞌi̱ Ni.
