1A tama a buk una sot na laman o naro ra i kis una kiskis na king. A buk ra di sa pul tari, di sa tumtumus rop taru una aru paporino, ma di sa bulit bat tari nama wonom mawit na bulit.
2Ma a tama a dekdek na ensel i iting namin labino walngano lena, “Osi mo ra i tokodos sur in papok ru a wonom mawit na bulit ri gusun a buk, ma in palosi?”
3Katutaio sapat netes una langit, ma nin upiso, ma nago ubalan a piso in pet lari sur in palos a buk ra, o in tama i.
4Ra a tangis doko iau, uni ka di sio pas taio ra i tokodos sur in palos a buk ra, o in tama a tumtumus kura ubalano.
5Ara mugumugu i watungi tang lena, “Gong u tangis! Tama i, a laion anun a kabotaro Juda, i ra in wakakorin o Dewid, i sa winim pas a inaim. I pet lari sur in papok ru a wonom mawit na bulit ma in palos a buk ra.”
6Numur a tama a Barman na Sipsip, i tamtama lari ra di sa um doko tari, i tur nisan a kiskis na king, ma a wat na utna ra det laun, ma a kum mugumugu det tur talilis pasi. A Barman na Sipsip ra, a wonom mawit na komino, ma a wonom mawit nin nikiok na matano. Det a wonom mawit na nion o God, ra di tulu ru det una rakrakon bual rop.
7A Barman na Sipsip i wan ma i los pas a buk gusun a sot na laman o naro ra i kis una kiskis na king.
8Ra i los pas a buk ra, a wat na utna ra det laun ma aru noino ma wat na mugumugu, det puku na urur taru sa numugu tan a Barman na Sipsip. Det rop det pam arara gita ma arara dis ra di pami nama gol. A kum dis ra, det bukus nama paura di watungi nama insens, ra di tuni ra a misino i sangnain wakak. Det ra, a kum niaring anun a taro anun o God.
9Ma det kele a matok na kelekele lenri, “Ui ut u tokodos sur un los pas a buk ma un papok ru a kum bulit gusuni, uni di um doko ui, ma u kul pukus pas a taro torom o God nama gapim, a taro tagun a kum kamkabo taro rop, tagun a wur ngas na wasiso rop, tagun a kum tamon rop ma tagun a kum gapman rop.
10U ubek tar det sur det in warkurai tomo nam ui una num a matanitu, ma sur det a kum tene etabor torom anundat a God, ma det in warkurai nin una rakrakon bual.”
11Numur a tamtama ma a longoro a kum walngan a susut na ensel ra det tur talilis pas a kiskis na king ma a wat na utna ra det laun, ma a kum mugumugu. A kum ensel det susut doko, katutaio in luk lar pas det.
12Det kelekele namin labino walngandet lenri, “I tokodos sakit sur a Barman na Sipsip ra di sa um doko tari in utur ukai a dekdek, a labino ululeng, a mananos ma a dekdek sur in warkurai. Ma i tokodos sakit sur din ru i, din ulabo pasi ma din watung ulabo pasi!”
13Ma a longoro a kum walngan a kum ukukis rop sapat netes una langit, ma una rakrakon bual, ma nago ubalan a piso ma nago ubalan a tasi, ma a kum utna rop ra kura ubalandet, det kelekele lenri, “Torom o naro ra i kis una kiskis na king, ma torom a Barman na Sipsip, din watung ulabo pas der ma din ru der. Ma der utur ukai a minamar ma dekdek, ken rop ma ken rop.”
14Ma a wat na utna ra det laun, det watungi lena, “Amen,” ma a kum mugumugu det puku pirso nama urur ma det lotu.
