Apocalipsis 5

1

2

3

4

5

6

7

8

9

10

11

12

13

14

15

16

17

18

19

20

21

22

¹Zee mwii na lo Xaa Nabeyy, xaa nzob naz pa nabeyy xaa, nu yaa xaa lad li nzho tub yech kwaan nkee letr naz lo nu naz tich, nu nkee gazh sey choya zee nyent cho xal loya.

²Nu myun tub mandad non cheen Dios lo na, nu dub gan mbezh xaa: —¿Cho nzho mod chaz re sey kwaan nyaww roo yech ne nu xal loya?

³Nixa naz yiba, nixa naz yizhyo nu nixa xan yizhyo, nyent tub xaa nzho mod xal lo yech ne nu wii xaa loya.

⁴Nu mbinn doo na nel nanguzhalt tub xaa nzho mod xal lo yech nu wii xaa loya.

⁵Per tub re xaa gol né lo na: —Nagonntra lu nel lee Mbezh, xaa nak dii cheen Judá nu lox cheen rey David mle gan. Lee xaa nzho mod chaz sey cho yech nu xal loya.

⁶Zee mwii na zee mlu tub Mbakxiil lo na. Mzo ma pa nzob Xaa Nabeyy, nu xsaww lo dap xaa mban nu xsaww lo re xaa gol. Lee Mbakxiil nyun kwenta tub ma mbit xaa nu nzob gazh xkach yek ma, nu gazh zaalo ma, kwaan nak gazh mbi naban cheen Dios, kwaan mxaal xaa naz dubse yizhyo.

⁷Nu ngwa Mbakxiil pa nzob Xaa Nabeyy nu mzen yech kwaan nzho lad li yaa Dios.

⁸Nu gorna mzen ma yech, lee dap xaa mban nu lee re xaa gol mkichyek axta lo yo lo ma. Nkano re xaa gol bagwel kwaan nzholl xaa nu nzhano xaa yann kwaan ngazhe kwaan yaal, kwaan nak mod re wdizh kwaan wdizhno xaa mle nambey Jesús lo Dios.

⁹Nu nzholl xaa kwaan kub, kwaan nii: Lu nak tub xaa non zee nzho mod zen lu yech ne nu chaz lu re sey kwaan nyaaw rooya, nel mbit re xaa lu nu mxo lu xren lu zee mzi lu re myet lo Dios: xaa reta ben, xaa nzhedizh rese dizhze, xaa reta dii nu xaa reta yezh.

¹⁰Lee re xaa ne mle lu xaa nabeyy lo dubse yizhyo, zee gak re xaa ne ngwleyy, xaa nabeyy lo yizhyo kwent cheen Xdios be.

¹¹Zeera mlach na, nel mbin na bos cheen zyen doo mandad cheen Dios, xaa nzhi dub welt lo pa nzob Xaa Nabeyy, nu lo dap xaa mban nu lo re xaa gol. Nu nzhi zyen doo miyon xaa nu nyent cho le gan lab re xaa,

¹²nu dublegan nii re xaa: Non doo xaa nak Mbakxiil, ma mbit re xaa. Lee ma nzhaal kayaa re yalnabeyy nu rese kwaan non, nu re yalnzhak, nu re yalngezh, nu nzhaal gon re xaa xtizh ma, nu nzhaal kayaa ma re xni nu gool re xaa lo ma.

¹³Nu noka mbin na rese kwaan mdexkwaa Dios naz leen yiba nu naz lo yizhyo, nu naz xan yizhyo nu leen nistoo mbezh: ¡Lee Xaa Nabeyy, xaa nzob naz pa nabeyy xaa, nu lee Mbakxiil, nak xaa nzhaal gool re myet lo, nu gon re xaa xtizh, nu kayaa xaa re xni nu re yalngezh, nal nu tira!

¹⁴Lee dap xaa mban mbezh: —¡Sbaa gaka! Nu lee re galbtap xaa gol mkichyek axta lo yo nu mbill re xaa lo ma.