1Xjats nꞌijxy jaꞌ pøn jam tsɨnaapy møj tsɨnaadya̱jkøjxp ku jam tmachꞌity yꞌaga̱ꞌngyøjøꞌøm tuꞌuk ja nøky abɨdity midi ja̱ꞌa̱y jøtpy jøts ñɨkøjxp, wɨxujk weents ja cha̱ꞌa̱yɨ, jøts ja jadeꞌen yꞌadukyɨ.
2Wɨnets ø nꞌijxy tuꞌuk ja møj a̱nkɨlɨs jøts ja møk tꞌamɨdøy: ―¿Pøn pa̱a̱tꞌa̱jtɨp tyikꞌawa̱ꞌa̱tst yø nøky, jøts tꞌagøꞌøtstuꞌutt yø seeyɨ?
3Nɨpøn ja tkanadyajaꞌejxɨyɨ tyikꞌawa̱ꞌa̱tst, nɨ tsa̱jpjøtpy nɨ na̱xwiiñ nɨ na̱xpatkipy, nɨpøn ja tkawɨnꞌejxwa̱ꞌa̱ñ.
4Xjats øts nya̱a̱xnɨ njɨɨñɨ, nɨpøn kyayikpa̱a̱ty pøn tyikꞌawa̱ꞌa̱tsp ja nøky jøts yikꞌext yiknɨja̱wɨt, nɨpøn ja tkaꞌukwɨnꞌejxwa̱nɨ.
5Xjats øts xnɨma̱a̱y ja møja̱a̱ꞌy tuꞌuk: ―Kidi mjanchya̱ꞌa̱xy, jaa tuꞌuk pøn tnɨguba̱jkꞌa̱jtp ja Juda̱jɨt ja̱a̱ꞌy, jøts pøn ja rey David yꞌa̱pɨp, yøꞌøts tø myajada̱ꞌa̱ky jøts tꞌagøꞌøtstuꞌutt ja wɨxujkpɨ seeyɨ jøts tyikꞌawa̱ꞌa̱tst ja nøky.
6Xjats ø nꞌijxy tuꞌuk ja Borreek Uꞌnk tyanɨ ma̱ møj tsɨnaabyajt jam, jaꞌ kyujkꞌa̱m ma̱ ja møja̱a̱ꞌdyøjktɨ, jøts ma̱ ja nɨmakta̱xkpɨ jɨyujk jam. Jamts ja yikꞌijxy kyaxɨꞌɨky sa̱m ti yjaty kyubety yꞌayoꞌomba̱a̱ty. Wɨxujk ja wya̱j tmøøtꞌaty jøts wɨxujk ja wyeen; jadeꞌen yø tijy yø wɨxujkpɨ ween sa̱m ja nɨwɨxujkpɨ ja̱ꞌwɨn midi ja Dios tø tkexy ya̱ na̱xwiiñ.
7Xjats ja Borreek Uꞌnk tnɨnijkxy pøn wyɨnaty tsɨnaapy møj tsɨnaabyajtkøjxp jøts tpøjkɨ ja nøky midi wyɨnaty myøøtꞌajtpy yꞌaga̱ꞌngyøjøꞌøm.
8Ku ja tpɨjky ja nøky, wɨnets ja nɨmakta̱xkpɨ jɨyujk jøts ja nɨꞌeeꞌpxmakta̱xkpɨ møja̱a̱ꞌdyøjk ñagyuxendya̱jkɨdɨ jam Borreek Uꞌnk wyɨngujkp. Nɨduꞌuk nɨduꞌuk ja møja̱a̱ꞌdyøjk tmøøtꞌa̱ttɨ ja kow midi yiktejp arpɨ, jøts nayɨdeꞌen tkondɨ ja poom tøøyꞌɨɨꞌñ, tum oorɨ jaꞌ, jadeꞌen yø poom tijy sa̱m ja Diosꞌajotꞌa̱jtɨn midi kya̱jpxtɨp pøn jaty ja Dios Teety jaꞌa̱jtɨp.
9Jamts yɨdeꞌen ja jemy ɨɨy tyikwa̱ndøø: Mets ɨdøꞌøn mba̱a̱tꞌa̱jtɨp yø nøky jøts yø seeyɨ xkøøtst; ja pø tøts xnɨwa̱nguixy nɨdukɨꞌɨyɨ ja ja̱a̱ꞌy, o midi ka̱jp o midi ayuujk, jadeꞌengøjxp ku tø mꞌayoꞌomba̱a̱ty ma̱ tø mdsuñ tø mdaxy.
10Tø øøts xyikmøjtøkɨ jøts øø nbaduꞌunt sa̱m ja Dios tsøkyɨn, jøts øø nwɨndsønꞌa̱tt ja na̱xwiiꞌñɨt.
11Wɨnets ø nꞌixy ja a̱nkɨlɨs namay tnɨꞌawɨdettɨ ma̱ ja møj tsɨnaadya̱a̱jk jam, nay jamts wyɨnaty ja nɨmakta̱xkpɨ jɨyujk jøts ja møja̱a̱ꞌdyøjktɨ,
12møk yꞌøøwdɨ tum jadeꞌen jøts wya̱ꞌa̱ndɨ: Janch øy ja Borreek Uꞌnk midi tø yꞌayoꞌomba̱a̱ty, pa̱a̱tꞌa̱jtɨp jøts tpa̱a̱tt ja møkꞌa̱jtɨn ja øyꞌa̱jtɨn, ja wejɨn ja kajɨn. Pa̱a̱tꞌa̱jtɨp yikwɨnja̱wɨt yikwɨndsøꞌøgɨt.
13Xjats nmadøy nayɨdeꞌen ku yꞌøøwdɨ nɨdukɨꞌɨyɨ ja na̱xwiiꞌñɨt ja̱a̱ꞌy jadeꞌen tsa̱jpjøtpy na̱xkɨjxy, jøts jadeꞌen øy ja ma̱ jøts wya̱ꞌa̱ndɨ: Janch øy janch møj ja Borreek Uꞌnk, pa̱a̱tꞌa̱jtɨp yikwɨnja̱wɨt yikwɨndsøꞌøgɨt xemɨkøjxp.
14Xjats nayɨdeꞌen ja nɨmakta̱xkpɨ jɨyujk wya̱ndøø: ―¡Ots jadeꞌen! Xjats ja ñɨꞌeeꞌpxmakta̱xkpɨ møja̱a̱ꞌdyøjk nɨdukɨꞌɨyɨ ñagyuxendya̱jkøxɨdɨ jøts twɨndsøꞌøgɨdɨ ja Dios.
