1Quiaj tajawas aaga alchetem tiül najneajay trono, almandeaand noic nawiig tiül miác owix nej. Aaga nawiig quiaj nembiül, alwüx poch amb teombas amb teopech, naquiand naag ayaíw sello.
2Quiaj tajawas nop ángel xowüy lapac, tandeac napac, tatün manguiay: ―¿Jane nembeata, alndom macheed ajcüwa sello quiaja, mateaaig a nawiigue? ―aw.
3Nejinguind ngo majlüy macheed a sello; ngo majlüy aljane alndom majaw cuane alwüx aaga nawiig quiaj, ngome tiül cielo, ngome wüx iüt, ngome tiüt tiül iüt.
4Xique quiaj tajiüntsas xeyay cos ngo maxoram nejinguind nembeat alndom mateaaig a nawiig majaw cuane alwüx.
5Quiaj nop tiül ajcüwa monxey natangtang ombas tasaj xic: ―Nde mejiünts, jogüy nop naxey naw tiül Judá, naw tiül acualaats aaga Rey David. Aag ayaj nasoic nop león, cos nej lajntsop wüx meáwan moncüy majaw nej. Nej alndom macheed mawün aaga ayaíw sello quiaj, mateaaig a nawiig ―aw.
6Quiaj tajawas niüng ajlüy aaga najneajay trono, alembem nop Quicheech Sap amb pinawan ajcüw apiquiw nimal, at pinawan ajcüw montangtang ombas quiaj. Aaga Quicheech Sap quiaj tajüic atnej landoj ambiyeran. Nej almajiür ayaíw miweac nej, aton ayaíw oniiüg nej. Ajcüw ayaíw oniiüg nej quiaj, apiüng wüx ayaíw espíritu ocueaj Teat Dios leaw Nej üüch mamb meáwan wüx iüt.
7Quiaj tamb aaga atnej Sap quiaj mayar a nawiig tiül miác owix Teat Dios niüng alchetem.
8Wüx tayar aaga nawiig quiaj, ajcüw apiquiw nimal, at ajcüwa nimiow apiquiw (24) montangtang ombas taquiejliw micosüw nejiw teombas aaga Quicheech Sap quiaj. Alteowixaw nejiw noicnoic arpa, aton alteowixaw nejiw noicnoic nitomb palüy oro, chipchipiow pom. Aaga pom quiaj apiüng wüx leaw atüniw mondüüb Teat Dios.
9Quiaj tatajcüw cantar noic jayats canto, tapiüngüw: Ique xeyay netam ijlüy, pares alndom meyar aaga nawiig quiaj, mewün misello nej, cos ique tembiyeran, tendeow. Wüx miquiej tewün xicon wüx sasoetiün ndom najlüyiün nóiquian naquiiüjpan Teat Dios. Xicona monaw meáwan noicnoic ajlüy nipilan; monaw tiül nipilan leaw andeacüw palpálwüx ombeayaran; monaw tiül meáwan cambaj, meáwan nación wüx iüt.
10Ique teaach xicon najlüyiün noic ajlüy miteaats ocueaj Teat Dios; sanarangan montangtang monajiüt wüx iüt, awüw.
11Quiaj tajawas xeyay ángeles, tanguiayiüs andeacüw. Nejiw ayeyiw tiüt aaga najneajay trono niüng ajlüyiw ajcüw apiquiw nimal almapacüw; niüng ajlüyiw ajcüwa montangtang ombas aton. Ajcüwa ángeles ajlüyiw xeyayiw, ngondom mateoraw.
12Teandeacüw napac, teamapiüngüw: Aaga Quicheech Sap tambiyaran xeyay netam, nej netam majlüy wüx meáwan leaw almajlüy, alndom mayar meáwan nembeatmbeat, nej nendüy wüx meáwan leaw almajlüy; néjan alndom ombas marang cuajantanej, netam marangüch casa nguiajantanej, masoic najneajay ajlüy, awüw.
13Aton tanguiayiüs andeacüw meáwan leaw aliw tiül cielo, at leaw aliw wüx iüt, at leaw aliw tiüt tiül iüt, at leaw aliw tiül ndec. Meáwan leaw almajlüy tanguiayiüs andeacüw, tapiüngüw: Aaga alchetem wüx aaga najneajay trono quiaj, at aaga Quicheech Sap quiaj, netam masoiquiw najneajay ajlüyiw. Netam marangüchiw casa, manderac najneajay wüx nejiw, cos meáwan nüt ndoj ombasüw marangüw cuajantanej.
14Condom ajcüw apiquiw nimal tapiüngüw: ―¡Amen, aag ayaj naleaing! ―awüw. At ajcüwa nimiow apiquiw (24) montangtang ombas taquiejliw micosüw nejiw tiüt marangüw casa Teat Dios, aton marangüw casa aaga Quicheech Sap quiaj, ajcüw almapacüw meáwan nüt.
