APOKALUPO 5

1

2

3

4

5

6

7

8

9

10

11

12

13

14

15

16

17

18

19

20

21

22

¹Bena na itaia, terono ai e helai Tauna imana idibana ai be buka ta, lalonai bona murimuri kahana ai danu revareva e hetore; buka na e hekou kunuka-kunuka, ikouna toadia na hitu.

²Bena aneru goadana ta na itaia, e hereva badabada, eto, Daika na heḡereḡere ina buka baine kehoa, bona ikouna toadia baine hamotu?

³A guba ai bona tanobada ai bona tanobada henunai ta asi goadana buka baine kehoa bona lalona baine itaia.

⁴Bena na tai dikadika, badina be ta asi goadana buka bame kehoa bona lalona baine itaia.

⁵Bena heitatao tauna ta ese e hereva henigu, eto, Asiotai; Iuda iduhuna ena leona, David ramuna, vada e kwalimu; ia ese buka baine kehoa bona ikouna toadia hituosi baine hamotu.

⁶Bena terono bona mauri ḡaudia haniosi padadia ai, heitatao taudia bogaragidiai, Mamoe Natuna ginina ai na itaia, e kara vada e alaia mase na heto. Doana na hitu, matana danu hilu, Dirava ena lauma hituosi, tanobada heḡeḡe-madai e siaidia lao ḡaudia, bunu.

⁷Ia na ema, terono ai e helai Tauna imana idibana amo buka e abia.

⁸Buka e abia; bena mauri ḡaudia haniosi bona heitatao taudia ruahui-haniosi na Mamoe Natuna vairanai e goru diho. Idia ta ta mai edia gitara bona mai edia gold urodia: unu uro be e gabumu bena bonadia e daemu muramuradia ai e honuhonu dae, helaḡa taudia edia ḡuriḡuri bunu.

⁹Bena ane matamatana e abia, eto, Oi na heḡereḡere buka bavabia, Bona ikouna toadia ba hamotu; Badina be e alamu mase, Raramu na taunimanima o hoilaidia, Dirava ena, Iduhu iboudiai, gado iboudiai, hanua iboudiai, bese iboudiai amo;

¹⁰Pavapava bona hahelaḡa taudia ai o halaodia, Eda Dirava vairanai; Bena tanobada ai bae lohia.

¹¹Bena na roha lao, bona aneru hutuma gadodia na kamonai, idia ese terono bona mauri ḡaudia haniosi bona heitatao taudia e ginidia hegeḡe, daha daha, gerebu gerebu.

¹²Idia na e lolo badabada, eto “Mamoe Natuna e alaia mase, ia hari namo; siahu bona taḡa bona aonega bona goada bona hemataurai bona hairai bona hahenamo baine abi”.

¹³Bena e kara ḡaudia iboudiai, guba ai bona tanobada ai bona tanobada henunai bona davara ai, bona lalodia ḡaudia iboudiai, eredia na kamonai, eto “Terono ai e helaimu Diravana bona Mamoe Natuna na hahenamo bona hemataurai bona hairai bona siahu bae abi, harihari ela bona hanaihanai”.

¹⁴Bena mauri ḡaudia haniosi eto “Amen”. Bona heitatao taudia e goru diho, e toma henia diho.