1Naꞌ breꞌraꞌ beꞌnnenꞌ llia llnebiaꞌn, kone neꞌe chaꞌwe naꞌ, noꞌxeꞌ to yich da ndoblol, naꞌ llop laꞌten nyoje ke rawe ke koꞌlle, naꞌ neyjten nyiꞌchen ren galle sey.
2Naꞌ breꞌraꞌ to angl war, naꞌ bnneꞌe zillje, neꞌe: —¿No nake beꞌnn zaꞌk wcheꞌze sey ki, nench llach yichenꞌ llaꞌn naꞌ?
3Naꞌ ni to nono llraꞌ wchache yich kaꞌ, ni yebá, ni yellrio ni, ni ganꞌ llaꞌa beꞌnn wat kaꞌ, ni to nono bllelkze wcheꞌzeꞌn, naꞌ wia akeꞌn akre naken.
4Naꞌ bllellaꞌ kwis, le nono zo beꞌnn zaꞌk wchacheꞌ yich kaꞌ wrabeꞌn, naꞌ ni ke llakze wia akeꞌn akre naken.
5Naꞌ to beꞌnn nake beꞌnn brao golleꞌ nadaꞌ: —Bi kwelloꞌ. Wiachek, naꞌ zo beꞌnnenꞌ gorj rao dialla ke Judá, naꞌ gok da xozxtaꞌweꞌ da Davidenꞌ, naꞌ danꞌ napeꞌ yel llnebiaꞌ xhen naꞌ, nakeꞌ ka to bell yiꞌx. Naꞌ Leꞌe zaꞌkeꞌ wxhoxhjeꞌ sey kaꞌ gallenꞌ, naꞌ wchacheꞌ yich kaꞌ.
6Naꞌ breꞌraꞌ ganꞌ lliꞌ beꞌnnenꞌ llnebiaꞌ radj beꞌnn tap kaꞌ zjallia xirenꞌ, naꞌ kllol ganꞌ llaꞌa beꞌnn tapalloa kaꞌ (24). Breꞌraꞌ ka to xhiꞌr daꞌo banꞌ ba bet akeꞌ, ka xhiꞌr ba llia gall loze, naꞌ gall yejraobaꞌ. Naꞌ yejraobaꞌ gallenꞌ zejen zokze Spíritu ke Diosenꞌ doxhen yellrio, llonen kanꞌ neꞌe naꞌ.
7Naꞌ beꞌnnenꞌ breꞌraꞌ ka to xhiꞌr daꞌon, jaxieꞌ yichenꞌ noꞌx beꞌnnenꞌ neꞌe chaꞌwe, beꞌnnenꞌ lliꞌ llnebiaꞌ naꞌ.
8Naꞌ ka jaxieꞌ yich naꞌn, beꞌnn tap kaꞌ, naꞌ ren beꞌnn tapalloa kaꞌ, le goꞌt akteꞌ slloaꞌre raweꞌn. Naꞌ twej arpa zjanoꞌx beꞌnn brao kaꞌ, naꞌ twej yeꞌs de ya chaꞌo danꞌ nziꞌi oro ga llzey akeꞌ yare, naꞌ yar naꞌ zeje diꞌllenꞌ, lloeꞌrén akeꞌ Diosenꞌ diꞌll kat llalwill akeꞌ Leꞌe, beꞌnn kaꞌ nxenraꞌll Leꞌe.
9Naꞌll bel beꞌnn kaꞌ to da kobe danꞌ neꞌe: Zaꞌkoꞌ jaxiꞌo yichenꞌ, naꞌ bxhoxhjoꞌ seyenꞌ nyiꞌchen naꞌ, le bzane yel nban koꞌo, bet akeꞌ rweꞌ. Brarj xchenoꞌ nench bnitraoꞌ da xhinnj ketoꞌ, nench naktoꞌ rallnaꞌa Dios, naktoꞌ beꞌnn wde wdere yell xhen, naꞌ wde wdere yell daꞌo, naꞌ wde wdere dialla ketoꞌ, naꞌ llaktoꞌ wde wdere diꞌll da de rao yellrio.
10Naꞌ brejoꞌ netoꞌ nench naktoꞌ ka to beꞌnn wnebiaꞌ, naꞌ zotoꞌ nxenraꞌlltoꞌ Diosenꞌ ka bxoz, naꞌ ka llin lla, nnebiaꞌtoꞌ rao yellrio ni.
11Naꞌll bwiaꞌ naꞌ benraꞌ chiꞌi angl zan kwis, ni ke bzoezraꞌ wrab akeꞌ. Zjazellá angl kaꞌ to kwit beꞌnnenꞌ llia llnebiaꞌ naꞌ, naꞌ gannaꞌ zerén beꞌnn tap kaꞌ zjallia xire naꞌ, ren beꞌnn brao tapalloa kaꞌ.
12Naꞌ benraꞌ lloeꞌ akeꞌ diꞌll zillje, ne akeꞌ: Beꞌnnenꞌ nak ka xhiꞌr daꞌon, bzane kwineꞌ ni ke lliꞌo beꞌnnach, naꞌ zaꞌke wxenraꞌll-lloeꞌ, le Leꞌen llnebieꞌ doxhente, naꞌ yoꞌ rao neꞌe yeololte da zjadé. Nakeꞌ beꞌnn siꞌn war, naꞌ napeꞌ yel wak xhen. Llayaꞌle weꞌlloeꞌ yel baraꞌnne, naꞌ weꞌllo diꞌll nakeꞌ beꞌnn zaꞌke.
13Naꞌ lekze benraꞌ yeolol beꞌnn zjallaꞌa yebánꞌ, naꞌ yellrio ni, naꞌ beꞌnn zjallaꞌa xhanre yellrio, naꞌ beꞌnn zjallaꞌa lo nisdaꞌo, lloeꞌ akeꞌ diꞌll ne akeꞌ: Lloeꞌraotoꞌ Dios beꞌnnenꞌ llia llnebiaꞌn, naꞌ beꞌnnenꞌ nake ka xhiꞌr daꞌo, napeꞌ yel baraꞌnn, naꞌ nakeꞌ beꞌnn zaꞌke. Naꞌ napeꞌ yel wak xhen kwis nnaꞌ, ren ke chnare.
14Naꞌ beꞌnn tap kaꞌ zjallia xirenꞌ, ne akeꞌ: —Kaꞌn gakchga. Naꞌ beꞌnn tapalloa kaꞌ le goꞌt akteꞌ slloaꞌre, beꞌxhen akeꞌ Dios beꞌnnenꞌ zo ke chnare.
