1Nayan, neantag se pedowan niyo tandà te pegsebad niyo ki Cristo, aw neluba kaw den so dakel se pedowan din kenyo. Inogpaan kaw den te Espiritu Santo, aw yan egpeidoway kaw den. So netegahan niyo den iyan,
2ontò a meluba aw megsebad kaw te aneng-aneng niyo, aw megpedekelay kaw te pedowan, aw sebad se tod niyo.
3Pengkey eden se inangen niyo, ikà niyo egkedemet. Ikà niyo egpelangkaw-langkaw. Meneng keilangan megpedanà kaw te kenyo pegkeotawun aw megsagman kaw te menge doma niyo.
4Ikà niyo eg-aneng-aneng olò te kenyo kèpiyaan, meneng keilangan meg-aneng-aneng kaw tepad te kèpiyaan te menge doma niyo.
5Keilangan meg-iling se teg sebad-sebad kenyo ki Jesu Cristo, so seini se aneng-aneng din.
6Pengkey gayed onawa se pegkesawol i Jesus aw pegkesawol te Timanem, Meneng wedà din eneng-enengi te onawa sikandin te Timanem,
7So lekat te kandin ibeg, tinenanan din se kelangkaw din, Aw migpedanà sikandin iling te kedanà te allang. Migpekeotaw sikandin aw timebaw.
8Pegpekeotaw din, ininang din medanà se pegkeotawun din pineokit te pegtolò din te Amay din Igsà inimetayan sikandin inlansang doton te kros.
9Yan se doun te ontò sikandin impelangkaw te Timanem, Aw ininang din sikandin Pengolo te kedita pengkey kenan,
10Amon lomongken se kedita diyà kandin, pengkey eg-ogpà dan doton te langit, aw dini lanto te tanà, aw pengkey doton didalem te tanà. Domuyun se kedita dan te ngadan i Jesus,
11So mikagi se kedita niyan te si Jesu Cristo se Pengolo te kedita dan, Aw yan iduyun dan se Timanem Amay.
12Yan menge kedowa ko egkedekelan ko te pedowan, pegdoma ko kenyo kedengan, gayed kaw egtolò te ibeg te Timanem. Pengkey wedad a den doton kenyo seini, meneng keilangan labi kaw pa megpekeaseb te pegtolò niyo kandin aw pegsagman niyo kandin, lamig mesikop se pegpelowà din kenyo,
13so doen eg-inangen te Timanem kenyo amon meibeg kaw tomolò kandin, aw amon mekebatog kaw tomolò te ibeg din.
14Pengkey eden se inangen niyo, ikà niyo egbelisì. Ikà niyo heman egdindil,
15amon wedad mekesila kenyo menge batà te Timanem. Pengkey eg-ogpà kaw doma te otaw eg-inang te medaet aw nelegeb te salà, meneng keilangan melobos se pedowan niyo aw metòlid se eg-inangen niyo. Iling kaw te menge bitoen eg-anyag kidoen te langit, so egkitaen kaw te doma otaw kenà egtaking te Timanem,
16aw yan ipegpetaga-taga niyo kandan se Mèpiya Indan te doen kaling pedowan ibegay te Timanem kandan. Aw yan se eg-inangen niyo, eked a keyàyà te aldaw te peglikò i Cristo, so sikiyo se ipekità ko kandin amon ketegahan din te doen ontong te ininang ko.
17Aw imetayan a, meinang se dipanog ko iling te bino itoyong diyà te ayam-ayam sonogen, aw se tabang niyo kanak tandà te pegpemenal niyo iling te ayam-ayam toyongan kenyan aw ibegay diyà te Timanem. Aw metoman iyan, eked a den kepuluk meneng labi a pa meluba doma kenyo.
18Yan heman se doun te keilangan meluba kaw doma ko.
19Nayan, seini se ibeg ko aw mepakay diyà te Pengolo tadon si Jesus. Ibeg ko isogò si Timoteo lomaoy kenyo te eked kenamay, so aw molì sikandin dini kanak, indanan a din tepad kenyo aw yan meluba se pedowan ko.
20Sikandin olò se doen aneng-aneng kenyo onawa te aneng-aneng ko kenyo, so gayed sikandin eg-aneng-aneng tepad te kèpiyaan te keogpà niyo.
21Kedita te doma otaw dini, gayed dan eg-aneng-aneng tepad te kèpiyaan te kandan keogpà. Kenà dan eg-aneng-aneng tepad te inangen dan diyà ki Jesu Cristo.
22Meneng netegahan niyo den te egkeseligan si Timoteo, so iling te pegtelaban te batà te amay din se pegtelaban i Timoteo kanak te pegtoladà ko te Mèpiya Indan tepad ki Cristo.
23Ibeg ko, aw ketegahan ko aw eden se domateng kanak, isogò ko sikandin doton kenyo te eked kenamay.
24Simalig a te Pengolo te mekedoton a heman kenyo te eked kenamay.
25Nayan, mig-aneng-aneng a den te mèpiya aw ipeolì ko si Epafrodito doton kenyo. Iling sikandin te kedowa ko, aw migtelaban kanak migtoladà tepad ki Cristo, aw egtolò heman te Pengolo tadon iling te pegtolò te sondalo. Insogò niyo sikandin dini amon megtabang kanak.
26Meneng ipeolì ko den sikandin so dimela den kenyo, aw netetana den sikandin so dinineg niyo te nesekitan sikandin dini.
27Ontò netigdaan igsà agpet nematay, meneng neidowan sikandin te Timanem aw yan wedà kematay. Neidowan a heman te Timanem, so aw nematay si Epafrodito, labi pa medaet se kelimahan ko.
28Yan ontò a meibeg megsogò kandin doton kenyo amon meluba kaw te pegkità niyo kandin. Aw meluba kaw, meowà se ketetana ko tepad kenyo.
29Aw domateng sikandin, segmani niyo sikandin taking te keluba te pegkità niyo kandin, so sikandin se kedowa tadon diyà te Pengolo. Keilangan segmanen niyo se kedita te otaw iling kandin,
30so agpet sikandin nematay tandà te inang din tepad ki Cristo. Mepakay diyà kandin aw matay amon metoman din se ibeg niyo megtabang kanak.
