1Ŋoŋerao Kristore erâ sawaŋ qaqac me maŋjauŋko muketeŋ, me Mârohec ʒâʒâfic, me miriŋ â buuruc, wiac i sasawa fokacko
2bubiaŋ‐nane ferâ foocte mamanasu‐ŋeŋic qâturenʒepieŋ, erâ maŋzi ʒâʒâfic ehuc mocjaha efârerâ wiac irecteaŋ henʒiriŋnehuc junʒepieŋ.
3Ŋoŋe hehefaricko â sahac mumuteŋko wiac mi enʒepieŋ, moc e jahacne maŋ bawahahuc âgofâcne jaŋere maname fezejec.
4Erâ moc e jahacne wiac embiaŋkeocte sawa mâcne, âgofâcne jaŋere fua biaŋ eocte mâmâc manasuzejec.
5Kristo Jesure maŋ mamanasu fowec, iŋuc jaha ŋoŋerezi fozejec.
6E Anutu juju jeweczi ine, Anuture sâcko juekopac weniŋuc behepemu, iŋuc muhuc mi sakarewec.
7Aricne, e juju‐ticne hetararâ kiŋaŋ qaqa hawari rohuc ŋic iŋucne fuawec, â eebapa‐ticne honepie ŋic nâŋâcne sâc ewec.
8E wahakicne erâ juhuc micrereŋte hata âte raku hâmoc maickewec, maripoŋko hâmoc hâcne.
9Iŋuc ewecte Anutuzi bafehuc fekicne sâko âkendâŋnewec. Âkendâŋnerâ ʒâŋe biŋe‐ticne fuŋmoc izi haŋ bahuc ŋic ʒâŋe biŋe getâcke‐fâreocte mucnewec.
10Eme sambâŋko â mâreŋko â mâreŋ jujuwicnao jueŋgopieŋ jaŋe ʒeŋgoma Jesure ʒâŋe muhuc dieŋzi hecnenʒepieŋ.
11â micne mic sâc Jesu Kristo e Wofuŋ jukac iŋuc musereckenʒepieŋ. Eme mumuteŋ izi Anutu Mamacte biŋe ezejec.
12Jorocfâc‐nane, ŋoŋe dameŋ sâc micrereŋ eeŋgopieŋ, ŋoŋehec juhape sawa mâcne, taicko juhape wâc ejâmbâŋkeeŋgopieŋ, irec bâbâpiaŋ‐ŋeŋicte fârine bâfuaniŋte mezac‐ŋopaha fotac qatarienʒepieŋ.
13Anutu e jahac hâcne, honec‐ŋopame biaŋkeocte aafecke mecne fârine bâbâfua mecne irec tâpiri ŋareekac.
14Ŋoŋe wiac sasawa kâroŋ â maŋguru tâmiric enʒepieŋ.
15Erâ bahacmâc â maŋtaniŋ junʒepieŋ, ehuc ŋicguru bac bâŋoricne â qaqaharicne jaŋere dapâc ŋondeŋko Anuture naru motecfâc maŋɋaɋac erâ juhuc bâpiŋ iŋucne tamaenʒepieŋ.
16Tamaehuc jujure dâŋ paŋnea bajunʒepieŋ. Iŋuc epie juku Kristo fifisi dameŋ‐ticnao, ʒâic mi mana‐bipiepo â gie mi bâipiepo, irec fuŋne taniŋkeme ʒeri bubiaŋ manazepac.
17No mamanasiŋ‐ŋeŋic Anutu taha bacnehuc sahac‐nane due bapemuo sifu irec ʒeri ehuc ŋoŋehec bubiaŋ manapemu.
18Â ŋoŋe iŋuc jaha ʒeri ehuc nohec bubiaŋ mananʒepieŋ.
19Wofuŋ Jesuzi maname sâckeme Timoteo biac ŋoŋerao sorepe fâocte mukopac. Eme ŋoŋere dâŋ biŋe moc risie wareme manarâ bunane mâteŋkezejec.
20Ŋic e iŋucne moc mi junareŋgopieŋ, eki jâmbomac ŋoŋere manoniehuc maŋticnezi dopec‐ŋopaocmu.
21Ŋic gâcne jaŋe jaŋacnere sawa manasuhuc Jesu Kristo gie‐ticnere mi mueŋgopieŋ.
22Timoteo ine juju‐ticnere fuŋne manaeŋgopieŋ, ŋokâzi mamac‐ticne bafickeekac iŋuc jaha no Biŋebiaŋte giere baficnuekac.
23Eme no nahacnao wiac iŋuc me iŋuc fuaocmu i mana‐hâmorâ e hâcne biac sorepe fâocmu.
24Erâ Wofuŋzi mana‐nareme no nahac wâc mi ʒoraha ŋoŋerao fâpemu, iŋuc manakopac.
25No wiac basahuc juhape ŋoŋe Epafodito sorepie ware dope hutuŋ enarewec, ehuc qomâ‐nane â babafic‐nane â momori âgo‐nane juekac, e sifu bârisie‐ŋarezo mukopac.
26E huc bame biŋene manambiŋ, eme ere manabâc enʒipiŋte ŋoŋere maŋhâhâŋ ecnekac.
27E huc ŋemâcne bame hâmozo ewec. Anutuzi ine ehâmocnewec, erâ e sawa mâcne, norao busâqoczi busâqoc fuazacte no mâmâc ehâmo‐narewec.
28Ŋoŋe honerâ buŋeŋic biaŋkeocte â no iŋuc jaha manabâc tâmiric jupemurâ e mi sakarehuc ʒiŋuczia râepe fakac.
29Irec fâme bubiaŋ manacnehuc Wofuŋte erâ âgo ecnenʒepieŋ. Ŋoŋe ŋic iŋucne hâcne sâsac‐jopanʒepieŋ.
30E Kristore giere erâ hâmozo ewec. Ŋoŋere okacne kiŋaŋ qanareocte sahac‐ticne qaisockewec.
