Text copied!
CopyCompare
MARO KINDENI KAWA ŊGUA - Pilipai

Pilipai 2

Help us?
Click on verse(s) to share them!
1Kirisi nde ipasipa kumi lâ, aku ŋinde ipu tini kaika pa ilomi kalomi. Aku i ne tini-mwasa kala iveta wisimi puu ndue tona. Koroani Sapâŋa nde imo kumi, aku miki kalomi sukâŋa ŋananzi tinimi pinde ku kaveta kemi ara panzi.
2Mine kala naŋa ano pami tu miki ma kapaveta kuku ilo-kalo taitu nâ. Aku naŋa kala ano pami tu miki ma kamo taitu ŋana kao nemi tini-mwasa ilâ mao nâ panzi nimi-nambwe kalo-tawana tamâta. Naŋa ano pami kilo tu miki ma kamo ilomi kalomi taitu nâ. Ambo miki ma kaveta mine, ande naŋa ma andeka ndo.
3Miki ma kapasuka warakami tinimi ku ilomi tu tamâta ma sipanea miki ŋami, mine ndimo. Ara ŋana miki ma kapatawa warakami tinimi lâ kalo-tawana tamâta naonzi, aku ara ŋana miki taitu-taitu ma ilomi mine; “Naŋa nde tamâta kaa nâ, aku tamâta pinde rârâni ŋanzi ipole naŋa ŋâŋgu”.
4Miki ma ilomi ŋalae koŋa ŋana warakami nâ ŋami ndimo. Miki ma ilomi ŋana tinimi pinde ŋanzi tona.
5Ara ŋana miki ma ilomi ŋana warakami ŋami lâ vetâŋa kie taituni, itogo Yesu Kirisi muŋga itula mine.
6Nia ndoyo, aku imâ lee ikura zo rârâni, Maro Kindeni tamwata kilala nde ipipi ndo lâ Yesu Kirisi ilo. I imo rege-rege kuku Maro Kindeni, andeta i ŋandai isilikana ŋine kaika ŋga.
7I tamwata ilo patea tu ma ipile i nia ara ŋinde, aku ipâŋga itogonzi tamâta kaa ŋinde uru siveta wurâta koa tia nâ. Ipâŋga itogo kinda tamâta mine,
8aku kinzi tamâta simora i tu i nde tamâta mao. Aku ipatawa tamwata tini ku ipono muli pa Maro Kindeni kawa ŋgua. Iveta mine lee mateŋa ne zo imâ ipâŋga papa lâ. Mao nâ, ipono muli pa Maro Kindeni kawa ŋgua kala isâu panzi tu sipu i pâta imâte tava maŋeti ŋalae lâ kâi popole tini, ikura Maro Kindeni ne pateâŋa mine.
9Ŋana duvi ŋinde kâ, ande Maro Kindeni isuka Yesu Kirisi kâki ndo lâ. Aku i ŋoa ara toŋge ilua i, ipolenzi ŋoa pinde rârâni.
10Mine kala muli ŋga, kinzi aŋelo rârâni sitavanzi tamâta rârâni wa kelekele rârâni simo vianzi lâ samba ilo wa tâno kulu wa mateŋa nianzi wa, kinzi ŋinde rârâni ma sipare tukunzi pa Yesu sipanea i ŋa.
11Aku kinzi rârâni taitu-taitu ma siporo situla pwataki mine tu, “Yesu Kirisi i nde Maro Ŋalae”. Aku ŋana nenzi ŋgua ŋine kâ, ande Tamânda Maro Kindeni ŋa ma ipâŋga ŋalae ndo.
12Niŋgu-nambwe wukale, muŋga, lâ zo ŋinde naŋa amo kumi, ande miki uru kapaloŋo pa naneŋgu ŋgua ikura zo zo. Mine kala kaloŋo ŋga; ambo miki ma kaveta mine nâ lâ zo ŋine naŋa amo malawae ŋanami tona, ande ŋinde ma ara ku ara ndo. Maro Kindeni iyaute miki piti lâ kondoma ilo marumbu lâ. Mine nde ara ŋana miki ma kamege ndo ŋana i kâ, aku kamakâsa ŋana kapaveta kuku vetâŋa arara ipatea pami ŋinde.
13Ŋana tu Maro Kindeni tamwata uru ikai wurâta lâ miki taitu-taitu ilomi kalomi ikura zo rârâni. Igagati miki ilomi ŋana kapaveta kuku vetâŋa ndia i tamwata ilo papa ŋinde, aku i walo kaika ilami tona ŋana kaveta vetâŋa arara kie-kie ŋinde kâ.
14Taitu lâ zo ndia miki ma kaveta vetâŋa ara pinde, ande miki ma ilomi makisa ŋana ku kapawa ŋgua potomule ŋana, mine ndimo.
15Ambo miki ma kapaveta kuku vetâŋa arara ŋinde, ande miki ma kamo Maro Kindeni natu wukale sondo ndo, aku ma kamo ilomi mbâra-mbâra ndo lâ i nao, nemi soki toŋge tia. Mao nâ, miki kamo lâ tâno ŋine kulu kunzi kiesaka tamwatanzi, nenzi vetâŋa potomule kie-kie. Andeta miki kamo katogo sinâla mine panzi, aku katula ŋgua ŋana via mao kâ pwataki panzi, itogo pitu isinala nia maa mine. Ambo miki ma kamo mine, ŋineŋga lâ zo ŋana Yesu Kirisi ma itaulo imâ kilo kâ, ande naŋa ma akura tu andeka nâ, ŋana tu nemi vetâŋa ŋinde ma itula pwataki tu wurâta ŋalae naŋa muŋga amakâsa ŋana aveta ŋinde, ande naŋa ŋandai aveta wurâta ŋinde koa tia nâ.
17Naŋa ao nemi kalo-tawana ŋinde ilâ pa Maro Kindeni itogo naneŋgu patarawâŋa mwasina. Ambo kinzi ma sipu naŋa pâta amâte, ande naŋa seeŋgu kala ma ipâŋga itogo patarawâŋa mine tona, aku ma iveta wurâta ŋinde miki kaveta papa i tu ipâŋga kanaŋo. Ambo vetâŋa mine ma ipâŋga pana, ande naŋa ma andeka nâ, aku naneŋgu ndekâŋa ŋinde ma imâ pa miki rârâni.
18Mine nde ara ŋana miki kala ma ilomi ara ku kandeka kuku naŋa.
19Ambo Maro Ŋalae Yesu Kirisi ma isâu pa naŋa, ande naŋa iloŋgu tu malawa tia ma ao Timoti imâ pami. Ŋineŋga lâ zo ŋana i ma itaulo imâ kilo kâ, ande i ma itapâri pana ŋana miki kâ, aku i ne ŋgua ŋinde ma ipu tini kaika pa iloŋgu kaloŋgu.

20Timoti simbo nâ imo ilo taitu mao kuku naŋa, aku maka rua simboma rua nâ iloma ndo ŋana kasuka miki kâ.
21Tamâta pinde rârâni kalonzi loko ŋana warakanzi nenzi kelekele nâ, aku ŋandai ilonzi ŋana sikai kuleŋa pa Yesu Kirisi ŋga.
22Andeta miki warakami kasama tu Timoti nde tamâta ara ndo. Miki kasama tu i uru isuka naŋa ŋana atula pâri ara kâ, itogo lâlu isuka tama mine.
23Mine kala lâ zo ndia naŋa ma asama sondo ŋana vetâŋa mana ma muli ipâŋga pana, ande naŋa iloŋgu tu lâ zoni ndaina naŋa ma ao i imâ walele nâ pami.
24Aku naŋa kaloŋgu tawana tu Maro Ŋalae ma isâu pa naŋa, aku ma ikai nzâla piti pana. Mine nde tini nâ naŋa warakâŋgu kala ma amâ amora miki.
25Andeta naŋa iloŋgu patea tu ma ao ninda-nambwe Epafroditus itaulo imâ imo kumi kilo. I uru iveta wurâta ŋana itula pâri ara kâ kuku naŋa, aku uru imandi naŋa waŋgirâŋgu lâ kazâŋa ŋine ilo. Miki muŋga kao i imâ pa naŋa ŋana ikai kuleŋa pana.
26I ilo ŋalae tu ma imâ imora miki rârâni. Isama tu miki muŋga kaloŋo pâri tu pukoŋa ikai i kaika lâ. Mine kala i kalo loko ŋanami.
27Mao nâ, muŋga pukoŋa ikai i kaika lâ, aku laiti ŋana imâte kâ. Andeta Maro Kindeni kalo sukâŋa ŋana i kâ, kala iveta tini ara kilo. Aku Maro Kindeni ne kalo-sukâŋa ŋinde imâ pa naŋa tona, ŋana tu isama mine; ambo Epafroditus ma imâte, ande naŋa ma iloŋgu malia ŋalae tina. Andeta tia.
28Mine kala naŋa iloŋgu ndo tu ma ao i imâ pami. Ŋineŋga lâ zo ŋana miki ma kamora i kilo, ande miki ma kandeka, aku naŋa wisiŋgu ma puu ndue tini mwata.
29Mine nde ara ŋana miki ma ilomi ndeka nâ ŋana kakai Epafroditus imo kumi, ikura kinda Maro Ŋalae ne tamâta uru taveta panzi ninda-nambwe mine. Miki ma kapaneanzi tamâta ea uru siveta wurâta ikura Epafroditus iveta mine.
30Ŋana tu i uru ikai kuleŋa panzi Kirisi ne wurâta tamâta, aku pukoŋa isânda i kulu lâ wurâta ŋinde tini, kala laiti ŋana imâte kâ. Taitu i ŋandai ilo ŋalae koŋa ŋana tamwata tu ma imo ara ŋga. I ilo ŋana wurâta ŋinde miki muŋga kalua i, ŋana ikai niami ku isuka naŋa kâ. Mine nde miki ma kandeka ŋana kakai i imo kumi.