1Tó á kunna Kirisi gũn lɛ́damma vĩ, tó a yenyĩ tɛn tɛ́ kpáái, tó á lɛ́dokↄ̃nↄ vĩ kũ a Ninio, tó á kↄ̃ wɛ̃nda vĩ kũ sùruuo,
2à laasun dokↄ̃nↄ kɛ, àgↄ̃ yenyĩ dokↄ̃nↄ vĩ lɛ́dokↄ̃nↄdenↄ ũ, pↄyeinayãdokↄ̃nↄdenↄ ũ, de ma pↄnna gↄ̃ papana.
3Àsun yãke kɛ denlana ke yↄ̃̀gↄ̃kɛna yãiro. Zĩdabusanaa gũn à a gbɛ̃dake kũ kũ bɛ̀ɛrɛɛo de á zĩdala.
4Gbɛ̃ke sún laasun lɛ́ a zĩda mɛ̀n do yãaro, à gbɛ̃ pãndenↄ pↄ́ lɛ́ dↄ.
5Àgↄ̃ nɛ̀sɛ kũ Kirisi Yesu vĩ vĩ se.
6A ludakɛnaa gũn adi a zĩda kɛna lɛɛlɛ kũ Ludao yã daro,
7akũ à a zĩda gwenaa tòn, à zĩ̀rikɛ sɛ̀, à gↄ̃̀ bisãsiri ũ, à bisãsirikɛ sɛ̀.
8À a zĩda bùsa, à mìi nàtɛ ari à gɛ̀ɛ à gào, ari lígbãndurukpana ganaa.
9Abire yãi Luda a sɛ̀ musu, à tↄ́ kũ à de tↄ́ sĩnda pínkila kpànɛ,
10de tó ò Yesu tↄ́ sì, gbɛ̃ sĩnda pínki ni kútɛnɛ ludambɛ kũ zĩtɛo kũ zĩtɛ gɛ̃io,
11gbɛ̃ sĩnda pínki ni o kũ a lɛ́o kũ Yesu Kirisimɛ Dikiri ũ De Luda tↄ́bona yãi.
12Abire yãi ma gbɛ̃ yenyĩdenↄ, lákũ adì ma yã ma gↄrↄ kũ má kú kãáo nà, atɛ̃nsa kũ má kú kãáo tera doro, àgↄ̃ á bona mana lɛ́ papa kũ vĩnao kũ lukanaao.
13Zaakũ Luda mɛ́ àtɛn zĩ kɛ á gũn de àgↄ̃ ye a pↄyenyĩnaai gbasa à kɛ.
14À yã sĩnda pínki kɛ yãkete kũ lɛ́kpakↄ̃anaao sari,
15de àgↄ̃ taari sari, gbãsĩ sari, Luda nɛ́ mamberusaridenↄ ũ tera gbɛ̃ sãtɛna nɛ̀sɛpãsĩdenↄ tɛ́, kũ átɛn gu puńnɛ andunia gũn lán susunɛnↄ bà,
16àgↄ̃ wɛ̃̀ndi yã kũna, de mà le mà ĩa dã kãáo Kirisi sugↄrↄ zĩ yãi. Tó átɛn kɛ lɛ, de mádi bà pã lɛ́ro akũsↄ̃ mádi zĩ pã kɛro.
17Bee tó ma aru ni kↄ́tɛ á ludanaanikɛna sa'o'i ũ, ma pↄ nigↄ̃ nna, matɛn pↄnna kɛ kãáo á pínki.
18Ákↄ̃nↄ sↄ̃, à pↄnna kɛ lɛ, ò kɛ lɛɛlɛ.
19Kũ Dikiri Yesu arubarikaao mani Timↄti zĩáwa tera, de mà le mà á baaru ma, ma laakari kpátɛ.
20Má gbɛ̃ke vĩ kũ à ye á yãi yãpura lákũ a bàro.
21Gbɛ̃ sĩnda pínki zĩda yã mɛ́ àdi donɛ arɛ, adi kɛ Yesu Kirisi yãnlo.
22Á dↄ̃ lákũ Timↄti a zĩda bì nà, à baaru nna zĩ kɛ̀ kũmao lán nɛ́ kũ a deo bà.
23Tó má a zɛna dↄ̃ súsu, má ye mà a zĩáwa gↄ̃̀nↄ.
24Má Dikiri náani vĩ kũ mani su á gwa tera ma zĩda.
25Ma gbɛ̃ Ɛpafarↄditu, ma zĩkɛri dake, ma zĩ̀kari dake kũ a a zĩ̀ à kpámai kũ pↄ́ kũ matɛni a ni dɛnↄ, ma è à mana mà a gbarɛáwamɛ.
26Àtɛni á bɛgɛ kɛ á pínki, akũsↄ̃ a nɛ̀sɛɛ yàka, kũ a a gyãkɛna baaruu mà yãi.
27À gyã kɛ̀ yãpura ari à kà gana, akũ Luda a wɛ̃nda gwà. Adi kɛ àkũmɛ adoro, kũ makũomɛ se, de ma pↄsira sún kararo yãi.
28Abire yãi matɛn wã mà a gbarɛáwa, de á wɛ́ sikↄ̃lɛ, á pↄ kɛ nna, ma laakari kpátɛ.
29À gbãnakɛ kpái Dikiri gũn kũ pↄnna zↄ̃kↄ̃ↄo. À bɛ̀ɛrɛ lí gbɛ̃ bire takanɛ.
30À gↄ̃̀ fíti kũ ani ga Kirisi zĩ yãi. À a zĩda kpà gaa de à le à kpányĩ kũ áni fↄ̃ à kɛmɛnɛro kɛmɛnɛ yãi.
