1Ruma kꞌu kꞌo alaq puqꞌabꞌ ri Cristo, lik nimarinaq chi kꞌuꞌx alaq y bꞌochiꞌim chi kꞌuꞌx alaq rukꞌ ri rutzil ukꞌuꞌx Rire. Ekꞌu ri Ruxlabꞌixel ri Dios kꞌo ukꞌ alaq y uꞌanom chi xa jun che alaq, yey kꞌulum chi kꞌu alaq ri relej ukꞌuꞌx y ri kꞌaxnaꞌbꞌal ukꞌuꞌx ri Cristo.
2E uwariꞌche tzꞌaqatisaj ko alaq uwach ri nukiꞌkotemal rukꞌ waꞌ: Chuꞌana xa jun kꞌuꞌx alaq, xa jun ri rutzil kꞌuꞌx alaq y xa jun ri naꞌoj alaq chiwach alaq.
3Makꞌo maꞌan alaq xew re kakꞌojiꞌ más wach alaq chikiwa ri jujun chik o re yakbꞌal qꞌij alaq. Ri lik usukꞌ e ꞌana alaq chꞌutiꞌn che ibꞌ alaq rukꞌ ri kaꞌan alaq y yaka alaq kiqꞌij ri jujun chik.
4Na utz ta kꞌu riꞌ we kꞌo junoq e xew kutzukuj ri utz chiribꞌil ribꞌ, ma ri lik chirajawaxik wi e kutzukuj ri utz chike ri nikꞌaj chik.
5E chuꞌana ri kꞌuꞌx alaq jelaꞌ pachaꞌ rukꞌuꞌx ri Qanimajawal Jesucristo.
6Rire na xuꞌan ta nim che ribꞌ; tobꞌ ne lik junam uwach rukꞌ ri Dios, na xuchꞌoꞌjij ta ri taqal che.
7Tobꞌ lik kꞌo uwach, xuya kan ranimaꞌ ri taqal che; xuꞌan pachaꞌ aj chak che ribꞌ chaꞌ kebꞌutoꞌ taq ri tikawex. Xuꞌan kꞌu tikawex.
8Echiriꞌ junam chi uwach kukꞌ ri tikawex, xuꞌan chꞌutiꞌn che ribꞌ. Lik kꞌut xukoj utzij ri Dios, ma xuya ribꞌ pa kamik. Yey wa kamik lik kꞌixbꞌal uwach, ma xkamisax chwa cruz pachaꞌ junoq lik aj mak.
9Ruma kꞌu wa xuꞌan ri Jesús, ri Dios e más xuyak uqꞌij Rire chikiwa konoje ri lik kꞌo kiwach. Xuya kꞌu che ri Jesús kaqabꞌiꞌij “Qanimajawal” che, ma rubꞌiꞌ Rire e más kꞌo uwach chwa ronoje taq ri bꞌiꞌaj.
10Chwach kꞌu ri Qanimajawal Jesucristo kakixukubꞌaꞌ kibꞌ konoje ri e kꞌo chilaꞌ chikaj, ri e kꞌo che ruwachulew y ri e kꞌo chuxeꞌ ulew.
11Y konoje kꞌut kakibꞌiꞌij “ri Jesucristo e Rajawal ronoje ri kꞌolik”, y kakibꞌiꞌij kꞌu waꞌ re yakbꞌal uqꞌij ri Qaqaw Dios.
12Ekꞌu ralaq, ri lik kꞌax kannaꞌ alaq, chwi petinaq loq, lik taqem alaq ri kꞌutunik re ri Utzilaj Tzij; ꞌana kꞌu alaq waꞌ na xew ta echiriꞌ in kꞌo ukꞌ alaq, ma e más chirajawaxik kataqej alaq waꞌ woꞌora echiriꞌ na in jinta ukꞌ alaq. Rukꞌ kꞌu xiꞌin ibꞌ alaq chwach ri Dios, e lik qꞌalajisaj alaq ri kolobꞌetajik alaq rukꞌ ri bꞌinik silabꞌik alaq.
13Ma e ri Dios kuya che alaq kacha kꞌuꞌx alaq che uꞌanik ri utz chwach y e Rire ri katoꞌw e alaq che uꞌanik ri karaj Rire.
14Janipa ri kaꞌan alaq, maꞌan alaq rukꞌ yaj o rukꞌ chꞌaꞌoj
15chaꞌ jelaꞌ lik jusukꞌ ri bꞌinik silabꞌik alaq chwach ri Dios y jekꞌulaꞌ na jinta kꞌo katzꞌaqaw chiꞌ alaq y kaqꞌalajin kꞌu riꞌ alaq saqil ralkꞌoꞌal ri Dios, ma lik alaq junwi chikixoꞌl taq ri winaq na e ta jusukꞌ yey itzel kikꞌuꞌx. Jekꞌulaꞌ riꞌ, kuꞌan alaq pachaꞌ taq ri chꞌumil lik kewon pa ri qꞌequꞌmalil re ruwachulew
16echiriꞌ kaqꞌalajisaj alaq ri Qꞌijsaq kuya kꞌaslemal. Jekꞌulaꞌ echiriꞌ kakꞌun tanchi ri Cristo, riꞌin kannaꞌ jun kiꞌkotemal na jinta kꞌo wi, ma lik kꞌo xutiqoj ri nubꞌinik y ri nuchak ukꞌ alaq.
17Ekꞌu riꞌin na kambꞌisoj taj tobꞌ ne kinkamisaxik y katuruw kꞌu ri nukikꞌ pachaꞌ juna qasaꞌn chwach ri Dios, ma waꞌ e kutzꞌaqatisaj ri qasaꞌn re ri bꞌinik silabꞌik alaq yaꞌom chi alaq puqꞌabꞌ ri Dios ruma ri kubꞌulibꞌal kꞌuꞌx alaq rukꞌ. Lik kꞌut kinkiꞌkot uma onoje alaq ma lik yaꞌom ibꞌ alaq che uloqꞌnimaxik ri Qanimajawal.
18Y jekꞌulaꞌ kuaj kakiꞌkot onoje ralaq wukꞌ.
19We e karaj riꞌ ri Qanimajawal Jesucristo, kantaq bꞌi tan ri Timoteo re keꞌrila alaq y jekꞌulaꞌ ri wanimaꞌ kakiꞌkotik echiriꞌ rire kukꞌam lo rason alaq.
20Na jinta chi kꞌu junoq lik junam rukꞌuꞌx wukꞌ pachaꞌ ri Timoteo, ma rire lik uyaꞌom ukꞌuꞌx che alaq.
21Ma e taq ri tikawex xew kakitzukuj ri kakaj rike y na e ta kebꞌok il che ri karaj ri Qanimajawal Jesucristo.
22Ilom chi kꞌu alaq ri utzilaj chak uꞌanom ri Timoteo, ma lik inutoꞌom che utzijoxik ri Utzilaj Tzij. Rire uꞌanom pachaꞌ nukꞌajol ma chakuninaq wukꞌ jelaꞌ pachaꞌ kuꞌan juna ala rukꞌ ruqaw.
23Ekꞌu uwariꞌche lik kuaj kantaq bꞌi ri Timoteo ukꞌ alaq, we xqꞌalajin na saꞌ ri kaꞌan chwe wara, we kinel bꞌi o kinkanaj pa cárcel.
24Yey kubꞌul ne nukꞌuꞌx kiꞌnwila tan wach alaq, we e karaj riꞌ ri Qanimajawal.
25Kanchꞌobꞌ kꞌut lik chirajawaxik kantaq tanchi ubꞌi ukꞌ alaq ri hermano Epafrodito, ri xtaq lo alaq wukꞌ re kinutoꞌ che taq ri kajawax chwe. Rire junam chakuninaq wukꞌ y junam qatijom kꞌax pa ruchak ri Dios.
26Rire lik karaj chik karil wach onoje alaq, ma xretaꞌmaj tom chi alaq echiriꞌ lik xuchap yabꞌil. Lik kꞌu kubꞌisoj waꞌ, ma laj paxinaq kꞌuꞌx alaq che ri xukꞌulumaj.
27Paqatzij wi rire xuchap yabꞌil, xa jubꞌiqꞌ chi xraj laj xkamik, pero ruma kꞌu ri kꞌaxnaꞌbꞌal ukꞌuꞌx ri Dios na xopon ta chupa ri kamik. Jekꞌulaꞌ ri Dios xutoꞌo yey lik xinutoꞌ ne riꞌin, ma we ta e laꞌ xkam na, riꞌ lik kuriq ribꞌ ri nubꞌis.
28Ruma kꞌu waꞌ lik kuaj kantaq bꞌi tan ri Epafrodito ukꞌ alaq chaꞌ jelaꞌ kakiꞌkot alaq che echiriꞌ kil tanchi alaq uwach. Y ruma kꞌu wa kiꞌkotemal alaq, kapaktaj ri nubꞌis riꞌin che alaq.
29We xopon tanchi rire ukꞌ alaq, kꞌulu alaq rukꞌ kiꞌkotemal chupa rubꞌiꞌ ri Cristo. Lik takꞌabꞌaꞌ alaq uqꞌij, ma e taqal riꞌ chike konoje ri e jelaꞌ pachaꞌ rire.
30Ma rire laj xkamik ruma ri kachakun chupa ruchak ri Cristo; xuya kꞌu ranimaꞌ kukꞌulumaj waꞌ chaꞌ kinutoꞌ riꞌin wara. Y jekꞌulaꞌ, rire lik xoluꞌana pakꞌaxel ralaq janipa ri kajawax chwe riꞌin.
