Filipi 2

1

2

3

4

¹Naa, tolanoo susue nggala ei, fo mana dadik Yesus Karistus hataholi nala! Ana fee dedeꞌa neulauk makadotok neu ei. De, ei bisa tao matea ei esa no esa dalem. Ei bisa manoli-mafada hata fo naoka neme ei dale susuem mai. Ei bisa masoda malole esa no esa, huu Lamatuak Dula Dale Malalaon tao ues nai ei lalada mala. Ma ei bisa matudu ei namemeda kasian ma dale malole esa no esa.

²Mete ma ei tao leo ndiak, na, au daleng namahoko. Nakalenak bali, mete ma ei masoda masueao mia dalek esa, masoda no hihiik esa, ma mala halak fo tao ues noꞌu.

³Boso tao hata-hata fo kada sangga nanalak soaneu ao-ina hehelik. Ma boso tao aok ana seli lena hataholi feꞌek. Naa te o koaom ndia ta naena netes. Tehuu ita musi dale taidaek, fo tao hataholi feꞌek lena heni ita.

⁴Ma boso kada makaneni ei esa-esako tataom. Tehuu ita boe oo mete hataholi feꞌe kala paluun boe.

⁵Huu ita dale nala musi sama leo Yesus Karistus dalen.

⁶Huu mae Ndia mata-aon sama leo Manetualain, ma Ndia boe oo, Lamatuak sama leo Manetualain, tehuu Ndia mboꞌi heni Ndia haak, ma ta pake Ndia panggan.

⁷Boe ma Ana konda neni daebafok ia mai, pake mata-aok leo hataholi basa faik. Ana laꞌo ela basa Ndia hak fo tao Aok dadik ata.

⁸Ta kada dadik hataholi kadiꞌik, tehuu Ndia boe oo tao Ndia aon dadik hataholi papake tak, fo tao tungga Manetualain hihii-nanaun. Mae hataholi la tao lisan nai ai ngganggek lain boe oo, kada Ana simbok, ma Ndia maten, sama leo hataholi manggalauk.

⁹Huu Ndia dale taidae leo ndiak, huu ndia de Manetualain soꞌu namadedema Ndia. Ma foi naden, fo ana seli. Huu ta hambu nadek esa boe fo ana seli lena Ndia.

¹⁰Manetualain soꞌuk namadedema Ndia naden leo ndiak, fo basan fee hada-holomata neu Ndia. Fo ndia: hataholi manai lalai, ma hataholi manai daebafok. Hataholi kasodak ma hataholi kamatek. Neu ko basa hataholi la sendek lunggulanggak, fo lakaluku-lakatele neu Ndia.

¹¹Ma dei fo hataholi la lae, “Yesus Karistus ndia, tetebes Lamatuak!” No leo ndiak, na sila boe koa-kio Amak Manetualain.

¹²Tolanoo susue nggala ei! Mamanene neulalau! Makahulun, faik fo au bei nai kota Filipi, ei mamanene au, boe ma ei tungga Manetualain dala ndoon. Hatematak ia ita taelak dook nai mamana feꞌek, tehuu au oke fo ei mbalak ei mala makandoo, fo masoda ndoos. Masaneda, huu mete ma ei ta mamanene Ndia, na neu ko ei hambu huhukuk! Huu Ndia nasalaꞌe nala ei, mima ei sala-singgo mala mai. Boe ma ei musi masoda no mandaan, huu ei dadik Ndia hataholi nala so

¹³Huu Manetualain mesa kana tao ues nai ei dale mala. Ndia ndia, soi dalak, fo ei mamanene Ndia. Ma Ndia ndia, fee koasa fo ei bisa tao ues fo mamahoko Ndia dalen.

¹⁴Boe ma, mete ma ei tao sudi hata, na, boso manggalau, ma masisimbo bafak.

¹⁵Tatao leo ndiak, na ei dadik hataholi dale malalaok, ma hataholi fo sala tak. Ei masoda nai hataholi manggalauk ma mana masapepeko kala lalada nala. Tehuu ei boso tungga sala! Ei soda mala musi malalaok, huu ei ndia, Manetualain ana nala. De, ei soda mala musi lasaꞌa, fo matudu dalak neu sala, sama leo nduk lasaꞌa neu daebafok.

¹⁶Boe ma ei masoda ndoos ma makalalaꞌok Manetualain Dedeꞌa-kokola nala. No leo ndiak, dei fo ei tao au daleng namahoko, faik fo Yesus fali main. Ma au sosotang ndia, hambu buna-boa malole, huu ta nana nggali henik no sosoa tak.

¹⁷Tehuu leo au tao heni basa au sodang, fo dadik neu tunu-hotuk, fo ei bisa boe mamahele matea ma makalalaꞌok Lamatuak uen, na, au simbok no namahokok. (Ndia, sama leo Malangga anggama diꞌa anggol oek neu mei tunu-hotuk fo nakaluku-nakatele neu Manetualain.) No leo ndiak, na ita bisa tamahoko noꞌu, huu tunu-hotuk ndia, ta hiak.

¹⁹Au amahena, ta dook so bali, Lamatuak Yesus soi dalak fo au haitua Timotius, tao natea ei dale mala. Basa ndia, na ana fali neni ia mai bali, fo nafada au laꞌeneu ei nanggatutu-nambadedein, ma tao natea au daleng.

²⁰Au ta haitua hataholi feꞌek. Kada au haitua Timotius, huu ndia dalek esa no au. Ma ndia sue tebe-tebe ei.

²¹Ndia ndia, ta sama leo tolanoo feꞌe kala. Huu sila kada duduꞌa sila dedeꞌa heheli nala, tehuu ta lakaneni dedeꞌa penting neu Yesus Karistus.

²²Tehuu ei bubuluk so, na Timotius tao ues mbilu mbuse fo nakalalaꞌok Manetualain uen. Ana tao ues noꞌu no au, sama leo kakanak esa tao ues fee ndia aman. Ai dua nggai miu mafada Lamatuak Yesus Hala Malolen sudi nai bee.

²³Mete ma ala laketu heni au dedeꞌang nai ia, bei fo au haitua Timotius neni ei neu.

²⁴Tehuu hatematak ia, Lamatuak tao natea au daleng nae, ta dook so bali, au boe oo bisa mai tilo ei.

²⁵Makahulun, au hambu totoꞌak. Boe ma ei madenu ita tolanoon Epafroditus mai tilo au. Ana nakalalaꞌok Manetualain uen noꞌu no au, leo soldadu manggatek tungga ndia malanggan palendan. Tehuu hatematak ia, au ameda musi haitua falik ndia neu tilo ei.

²⁶Huu ndia dalen haladoi sangga neu tilo ei. Huu ana bubuluk, ei mamanene ndia hedi-hedi.

²⁷Memak tetebes. Fai makahulun namahedi belak losa elabaꞌik maten. Tehuu Manetualain suen, de tao nahain. Ma Manetualain boe sue au, de Ana tao nahai Epafroditus, suek au boso boe toꞌa bali.

²⁸Huu ndia de au sangga haitua seluk ndia, fo ela ei mesa nggei bisa matonggo mian no dale namahokok. Mete ma leo ndiak, na, au daleng ndoo-ndoo.

²⁹De, ei musi simbok neulalau ndia, huu ndia, Lamatuak hataholin. Ma ei musi fee hada-holomata neu basa hataholi fo mata-aok sama leo ndia. Huu ana nakalalaꞌok Karistus uen, losa uak maten. Ma ta heok fa boe, huu ana nau tulu-fali au, nggati ei. De, ei musi simbo selu kana no dale malole.