1Cristo animasunquichis; munacuyninwan cusichisunquichis; Santo Espíritun kancunawan cachcan; munacuyninta qhuyapayacuynintawan rejsinquichis.
2Chayraycu cusichiwaychis tucuyniyquichis allinpi ujcunawan causaspa, uj munacuyllapi, uj sonkolla caypi, uj quiquin yuyaypi ujchaska.
3Ama imatapas ruwaychischu envidiacuspa chayri pay pay tucuspa, manachayri humilde sonkowan kancunamantapas astawan allinpaj ujcunata khawaychis.
4Ama pipas masc'achunchu paypaj allinnillantaka, manachayri ujcunapaj allinnintawan.
5Imaynatachus Cristo Jesús ujcunapaj allinnincupaj pensarkan, ajinata pensaychis.
6Jesucristo Dios carkan chaywanpas, mana jap'icorkanchu Dios cayninpi;
7manachayri uj ladoman Dios cayninta churaspa, sirvej jina tucorkan, nacerkan runapaj wawan jina. Runa jina cachcaspa,
8pay quiquin humillacorkan. Diospaj munayninta casucuspa, wañorkan p'enkay cruzpi.
9Chayraycu Dios Jesusta okharin sinchi athun honorwan alabaska cananpaj. Kontaj sinchi athun sutita tucuy sutimanta nejtin,
10Jesuspaj ñaupakenpi tucuynincu konkorinancupaj, janaj pachapi cajcuna, cay pachapi cajcuna, uqhu pachapi cajcunapas,
11tucuynincu Jesucristo Señor caskanta rejsinancupaj, Dios Tata honrawan alabaska cananpaj.
12Munaskay hermanoycuna, kancunawan cachcajtiy, casuwarkanquichispuni. Ajinata cunanka carupi cachcajtiypas, astawan casuwaychis. Salvaska causayniyquichispi afanacuychispuni, Diosman sinchi respetowan.
13Allincuna ruway munaskayquichis Diosmanta jamun, Diostaj yanapasunquichis sumaj allin munayninman jina ruwanayquichispaj.
14Tucuy imata ruwaychis ama thutuspa, nitaj achqhata parlaspa,
15mana pipas kancunapi juchata ni ima juchachanata jinapas ricunancupaj. Diospaj allin ch'uwa wawancuna caychis, sajra millay runacuna uqhupi causachcaspa. Paycuna uqhupi tutapi c'anchaj koyllurcuna jina c'anchaspa,
16causay koj evangeliota altoman okhariychis. Ajinapi Cristo jamojtin, kancunamanta cusiska casaj, llanc'askay mana yankhapaj caskanta yachaspa.
17Creeskayquichisraycu, causayniyquichista ofrendata jina Diosman konquichis. Chay ofrendayquichisman, listo cani wañuskaywan junt'achinaypaj. Imayna cajtinpas, tucuy kancunawan cusca cusicuni.
18Kancunapas cusicuychis nokawan cusca.
19Señor Jesuspi confiacuspa, Timoteota cachamusajña, kancunamanta noticiata jap'ekaspa cusicunaypaj.
20Pay jina mana ni mayken waj canchu, noka jina pensaj, allinniyquichispaj afanacojpas.
21Tucuynincu masc'ancu paycunaj allinnillancupaj, manataj Jesucristoj obranpaj allinninpajchu.
22Yachanquichisña Timoteopaj allin causayninta, imaynatachus nokawan evangeliota willaskantapas. Churiypas canman jina yanapawan.
23Imaynacha puriwanka chayta yachaytawan, cachamusaj.
24Chaywanpas Señorpi confiacuni, noka quiquiy uskhayta jamunaypaj.
25Ajinallatataj yuyacuwan necesario caskanta cachamunaypaj hermano Epafroditota, llanc'ajmasiy, sufrejmasiytaj. Kancuna quiquiyquichis payta cachamuwarkanquichis yanapanawanpaj.
26Pay sinchita puriyta munan tucuyniyquichista khawarej. Onkoska caskanta yachaskayquichismanta Epafrodito llaquicun.
27Ciertopuni onkoska carkan, yakapuni wañunpas. Chaywanpas Dios payta qhuyapayan, mana payllatachu, nokatapiwan, mana noka astawan sinchita llaquicunaypaj.
28Chayraycu apurata cachamuni, ujtawan khaujataspa kancuna cusicunayquichispaj, noka mana sinchi llaquiska canaypaj.
29Tucuy cusicuywan payta jap'ekaychis, Señorpi creej hermanota jina. Respetowan estimaychispuni pay jina cajcunata.
30Cristota sirvispa yaka wañorkan, causayninta peligroman churaspa, mana yanapay atiwaskayquichista yanapanawanraycu.
