Filipai 2

1

2

3

4

¹Tamo a xuvulaian simi xuvul pa Krais a fagut nami o a vubuxan xasingitan sina a famalulum nami o mi waan xuvul lapaana Vovau Xaradak o mi fo siak a fangaasixan o mamaaluxan,

²mi taa fabas xapin a faamamaasan siak layaan mi faxuvul lapaana lamonan saxa e vubuxan xasingitan saxa e mi taa faxuvul lapaana vovau saxa e mi taa vil a faisok saxa mon.

³Muta vil a mo xena siak a roxoyan xami mon o xena siak a isin lava, piau. Taasaxa fasivi nami xa e lamon a xasanofuna malaan seri peraroxo semi.

⁴Nami xapiak mi taa lamon pana maana mo i taa xavang nami xa taasaxa mi taa lamon vaxa pana maana mo i taa xavang a xasanofuna.

⁵A fufuna lamonan simi i taa fexaxaas sena fufuna lamonan si Krais Yesus:

⁶“Lana mu vilaana e lamonan sina nane ve a Piran fatak, taasaxa lamon faati o i taa pife tao fatateak a mu vilaana e lamonan xapiak aave xena waan la vepen sina Piran.

⁷Taasaxa nane faamamaas o i taa timin patak a maana mo xapiak aava fapirane xena falak a vilaana e lamonan sina saxa sisiak. Nane savat mataa e a vipin sina ve a vipin sina mataa.

⁸Nane pife bilai malaan sena matalava taasaxa nane fatapal nane xa pana langai faroxo vulai fefexaxaas a yaan ina maatan sina- a maatan xuluna bolo.

⁹E voxo a Piran a faneie la nobina pelalava e faꞌisine pana isin aava pelalava sena xasano isin xapiak.

¹⁰E a maana mo xapiak la xunavata, la xavala e lapaana xavala aava bina sina mu mamaat, ri taa bukaak xena nangus a isi Yesus

¹¹e ri taa kuus fasavat o na Yesus Krais ve a Memai e ri taa vil malaane xena tavai a Piran Tamataara, pana isin molava piis.”

¹²E voxo, kamu fesing, malaan seꞌ mi langai vulai layaan ne waan xuvul pami, a roxo paaliu o naboxo mi taa langai. A Piran fo fakaxup nami e voxo, mi taa lo faisok faagut vulai pana matautan e radakuian xena faxalitaana.

¹³Senaso a Piran i taxa faisok la vubuxanan e lamonan simi talo mi taa vubuk bilai faroxo xena fasavat a vubuxanan sina.

¹⁴Vil a maana mo xapiak e muta fefinaas o fegagelai.

¹⁵Pana vilaana aave, mi taa piau ta fetusaian e mi taa pife vupuno. Nami ve mi mu rafulak tuuna sina Piran e mi piau ta lalosaat la palou ina mu rabuna saat ti la xavala. La palou iri nami, mi rarapak malaan sena vapara

¹⁶layaan mi kuusan fasavat a ferawaian sena toyan tuuna. Tamo mi vil malaane layaan ne tigina la mata Krais ne taa ferawai pana faamamaasan o a faisok siak la palou imi a pife savat palau.

¹⁷Tamo ri taa punuxau a vilaana aave a malaan sena saxa tatavai pana wain aava ri tiuane xuluna falfaalan la matana Piran, e tamo ri taa tiuan a ria iga malaan xuluna falfaalan e faisok aava savat sena namkaian simi ne taa faamamaas e merao xuvul pami.

¹⁸E nami vaxa mi taa faamamaas e merao xuvul paga.

¹⁹Tamo na Memai Yesus i taa turoxo pana, monabeꞌ mon ne taa feng na Timoti xe simi talo ne taa faamamaas layaan ne langai semi.

²⁰Ne pi ta saxa fulaa malaan sena senaso nane toxan a nanasam semi la xunus ina, malaan sega e vulai nane sei soxot nami pana roxoyan.

²¹Senaso a xasanofuna ri taxa faxatang a vubuxanan siri xa e pife mu vubuxanan si Yesus Krais.

²²Taasaxa mi texaas o na Timoti fo faxalit a vilaana tuuna sina layaan nane faisok xuvul paga xena kuusan fasavat a Lagasai Roxo malaan sena lak tomexaan xuvul pa tamana.

²³E voxo layaan ne texaas sena so ta mo i taa savat sega ne taa fenge xe simi.

²⁴E ne lamon tuuna o faasilak a Memai i taa turoxo o nenia xa ne taa falet xe simi.

²⁵Taasaxa ne lamon o a mo roxo ne taa feng faꞌuli a fefeng simi, na Epafrodaitas aava mi fenge xena xavangau. Nane ve na tiak aava faisok e tigina xuvul paga malaan sena mataa ina rawen.

²⁶Nane toxan a lagafan senaso nami, mi langai o nane fo giis e nane buk xalum nami xapiak.

²⁷A tuuna, nane fo giis e faasilak i maat. Taasaxa Piran a muluxe e pife muluk nane mon, taasaxa muluxau vaxa e pife tavaiau pana xasano lagafan fulaa maan.

²⁸E voxo ne vubuk faagut rao ne taa feng faꞌulie talo mi taa faamamaas layaan mi xalum fulane e nenia, ne taa pife lamon faaxaves fulaa.

²⁹Faamamaas pana savatan sina senaso nane ve na timi lana xuvulaian xuvul pa Krais. Mi taa suai sena rabuna malaan sena

³⁰senaso faasilak nane i maat sena faisok si Krais: nane lamon fepalauan a toyan sina xena xavangau la nobina simi.