ፒሊጲሲዮሳ 2

1

2

3

4

¹ኪሪስቶሳን ሂንቴንቱ ዴዒያ ዴዑ ሂንቴና ዎዛንꬂ? ኣ ሲቁ ሂንቴና ሜንꬄꬂ? ጌሻ ኣያናና ሂንቴንቶ ኢቲፔቴꬃይ ዴዒ? ሂንቴ ኢቱ ኢቱዋሲ ኬኪቴኔ ቃሬቲቴ?

²ያቶፔ፥ ሂንቴንቱ ቆፋን፥ ሲቁዋን፥ ዎዛናኒኔ ቆፋ ፖሉዋን ኢቱዋ ጊዲዴ፥ ታና ፖሎ ናሼቺቴ።

³ሂንቴና ሲቂያዋን ዎይ ጬቄታናው ኮዪያ ሜላ ኣሙዋን ኢቲባኔ ኦꬆፒቴ፤ ሺን ኢቱ ኢቱዋፔ ꬎቃይ ያጊዴ ቆፔናን፥ ኢቱ ኢቱዋሲ ሂንቴንቱ ሁጲያ ካዉሺቴ።

⁴ቃሲ ኢቱ ኢቱዋ ጎዒያዋ ኮያናፔ ኣቲን፥ ሂንቴንቱ ሁጴ ፃላላ ጎዒያዋ ኮዮፒቴ።

⁵ኪሪስቶሳ ዬሱሳን ዴዒያ ሃ ኣሺኬቴꬃ ቆፋይ ቃሲ ሂንቴናንካ ዴዓናው ቤሴ።

⁶ኢ ኡባ ዎዴ ፆሳ ጊዲዴ ዴዔዳ፤ ሺን ኢ ዎልቃን ፆሳ ኬና ጊዲያ ማታይ ዴዒያዋ ቤሲያዋዳን ፓይዲቤና።

⁷ሺን ኢ ባሬ ሼኒያን ኡባባ ኣጊዴ፥ ኣይሊያ ሜꬌታ ኣኬዳ፤ ቃሲ ኣሳ ማላቲዴ ቆንጬዳ።

⁸ኢ ባሬና ካዉሼዳ፤ ሃይቆ፥ ኡባ ሃራይ ኣቶ፥ ማስቃሊያ ቦላ ሃይቃናዉካ ኣዛዜቴዳ።

⁹ሄዋ ዲራው፥ ፆሳይ ኣ ሎይꬂ ꬎቁ ꬎቁ ኦꬄዳ፤ ቃሲ ሱንꬃ ኡባፔካ ኣꬊያ ꬎቃ ሱንꬃ ኣው ኢሜዳ።

¹⁰ሄዋ ዲራው፥ ሳሉዋኒኔ ሳዓን ሳዓፔ ጋርሳን ዴዒያ ኡባይ ዬሱሳ ሱንꬃ ቦንቻናው ጉልባታና።

¹¹ቃሲ ኣሳይ ኡባይ ዬሱሲ ኪሪስቶሲ ጎዳ ያጊዴ፥ ፆሳ ኣዉዋ ቦንቾ ማርካታና።

¹²ሄዋ ዲራው፥ ታ ዳባቶ፥ ታኒ ሂንቴናና ዴዒያ ዎዴ ኡባን ሂንቴንቱ ታው ኣዛዜቴዳዋዳን፥ ሃዒ ታኒ ሂንቴንቱ ማታን ዴዔና ዎዴካ፥ ሂንቴንቱ ካሴዋፔ ኣꬂዴ ታው ኣዛዜታናው ቤሴ፤ ያሻቴꬃኒኔ ኮኮርሳን ሂንቴንቱ ኣቶቴꬃ ፖላናው ኦꬂቴ።

¹³ኣዪሲ ጎፔ፥ ፆሳይ ሂንቴና ባሬው ኤኖ ጊሳናዳኒኔ ቃሲ ኢ ቆፔዳዋ ሂንቴንቱ ኦꬃናዳን ሂንቴንቱ ጊዶን ኡባ ዎዴ ኦꬄ።

¹⁴ጌላኔ ናጋራንቻ ኣሳ ጊዶን ፖኩ ባይናዋንታ፥ ጌሻቱዋ፥ ፆሳ ናናቱዋዳንካ ፖኩ ባዪናዋንታ ጊዲቴ፤ ቃሲ ዙዙሜናን ዎይ ኢታባ ቆፔናን ኡባባ ኦꬂቴ። ሄ ኣሳ ጊዶኒካ ሳሉዋን ፖዒያ ፆሊንቲያዳን ፖዒዴ፥

¹⁶ዴዑዋ ሚሺራቹዋ ቃላ ኡንቱንቶ ኦዲቴ፤ ሄ ዎዴ ታ ዳቡራዪኔ ታ ኦሱ ሜላ ꬋዪቤናዌ ኤሬቲያ ዲራው፥ ኪሪስቶሲ ሲሚያ ጋላሲ ታኒ ሂንቴናን ጬቄታና።

¹⁷ሃራይ ኣቶ ሂንቴንቱ ኣማኑ ፆሳው ያርሺያ ያርሹዋ ቦላ ታ ሱꬃይ ኡሻ ያርሹዋዳን ጉኮፔካ፥ ታኒ ናሼታይ፤ ሂንቴናና ኡባና ኢቲፔ ናሼታይ።

¹⁸ሄዋዳን ሂንቴካ ቃሲ ናሼታናው ቤሴ፤ ታናና ኢቲፔ ናሼቲቴ።

¹⁹ሺን ታኒ ሂንቴንቱ ዴዑዋባ ሲሳዴ ናሼታናዳን፥ ፂሞቶሳ ሂንቴኮ ኤሌካ ዬዳናዋ ጎዳ ዬሱሳን ኣማኔታይ።

²⁰ኣዪሲ ጎፔ፥ ሂንቴንቱ ዴዑዋባው ዎዛናፔ ሂርጊያ ኣ ማላ ኣሳይ ሃራይ ኦኒኔ ታው ባዋ።

²¹ኣዪሲ ጎፔ፥ ሃራቱ ኡባቱ ባሬንቱ ሁጴ ጎዓ ኮዪኖ፤ ዬሱሲ ኪሪስቶሳዋ ኮዪኪኖ።

²²ሺን ናዓይ ባሬ ኣቡ ኦꬂያዋዳን፥ ፂሞቶሲ ታናና ኢቲፔ ጊዲዴ፥ ዎንጋላ ኦሱዋ ኦꬄዳዋን፥ ኣማኔቲያ ኣሳ ጊዲያዋ ኤሪሴዳዋ ሂንቴንቱ ኤሪታ።

²³ሄዋ ዲራው፥ ታኒ ዬዉ ሃኒያዋ ቤዓዴ፥ ኤሌካ ኣ ሂንቴኮ ዬዳና ጋዴ ቆፓይ።

²⁴ታኒ ታ ሁጴው ማታ ዎዲያን ሂንቴኮ ባናዋ ጎዳን ኣማኔታይ።

²⁵ሺን ታኒ ታ ኢሻ ኤፓፊሮዲቶሳ፥ ታናና ኢቲፔ ታ ባጋ ጊዲዴ ኦꬄዳዋ፥ ኦሌቴዳዋኔ፥ ቃሲ ታና ማዲያዋን ሂንቴንቶ ኪቴቲዴ ኦꬄዳዋ ሂንቴኮ ኪታናው ኮሺያዋ ቆፓዲ።

²⁶ኣዪሲ ጎፔ፥ ኢ ሂንቴና ኡባ ቤዓናው ላሞቴ፤ ቃሲ ኢ ሳኬቴዳዋ ሂንቴንቱ ሲሴዳ ዲራው፥ ባሬ ዎዛናን ዳሮ ሜቶቴ።

²⁷ኢ ቱሙ ሳኬቲዴ፥ ሃዪቂ ኣቴዳ፤ ሺን ፆሳይ ኣው ቃሬቴዳ፤ ኣ ፃላላው ጊዴናን ካዩ ካዩዋ ቦላ ጉጄቴናዳን፥ ታዉካ ቃሬቴዳ።

²⁸ሲሚ ሂንቴንቱ ላዔንꬁዋ ኣ ቤዒዴ ናሼታናዳን፥ ታዉካ ታ ዎዛና ካዩ ኢርፃናዳን፥ ታኒ ኤሌካ ኣ ሂንቴኮ ዬዳና።

²⁹ሄዋ ዲራው፥ ጎዳን ዴዒያ ኢሻዳን፥ ኩሜንꬃ ናሼቻን ኣ ሞኪቴ፤ ቃሲ ኣ ማላቲያ ኣሳ ኡባካ ቦንቺቴ።

³⁰ኣዪሲ ጎፔ፥ ሂንቴንቱ ሂንቴንቱ ሁጴው ታና ማዳና ዳንዳዬና ማዱዋ ማዳናው፥ ኪሪስቶሳ ኦሱዋ ዲራው፥ ባሬ ሼምፑዋ ሼኔኮ ጊዴ፥ ሃዪቂ ኣቴዳ።