Filipos 2

1

2

3

4

¹Nadid, gapu en biyag moy kánni Cristo ay mangpabegsák dikomoy, sakay en págmahal na ay mangpasaya dikomoy. Tehud kam a pákpagkaessa ten Banal a Ispiritu, sakay tehud kam a kabaitan sakay págmalasakit ten agum.

²Agidán ku dikomoy a pasayaánnák moy ti hustu, magkahud kam ti essa a kaisipan, essa a págmahal, essa a pusu sakay kagustuwan.

³Dyan kam maggamet ti ányaman a bagay gapu la ten kagustuwan moy a metanyag, nan magpakababa kam sakay dyan moy isipán a mas mataas kam nan ten agum.

⁴Isipán moy en para ten kapiyyaan nen agum, bakán la a para ten sadili moy a kapiyyaan.

⁵Dapatid, ay en kaisipan moy ay kona ten kánni Cristo Jesus.

⁶Maski ni tunay siya a Diyos, ay awan na impilit en sadili na a pumantay ten Diyos.

⁷Nan kinusa na a tinanggiyan a magin kapantay nen Diyos, sakay nagin kona ten essa a alipin. Neenak siya a kona ten karaniwan a tolay. Sakay dikona magin tolay ti Cristo,

⁸ay nagpakababa siya sakay nagin masunurin ten Diyos hanggan kamatayan, maski ten kákkatay na ten kudus.

⁹Kaya inlangkaw siya nen Diyos ten kalangkawan a lugar dilanget sakay inátdenan siya ti ngaran a kataasan ten atanan a ngaran.

¹⁰Tánni ten ngaran ni Jesus ay lumuhud en atanan dikona, en ked dilanget, ked ten luta, sakay en ked ten mundu nen patay hidi.

¹¹Sakay atanan ay magpahayag a ti Jesu-Cristo en Panginoon, ten kapuriyan nen Diyos Ama.

¹²Kaya ngani, mahal ku hidi dapat ay mas masunurin kam nadid nan dikona kagumanák moy palla. Sumunud kam a tehud a ánteng sakay pággalang ten Diyos hanggan magin ganap en kaligtasan moy.

¹³Gapu en Diyos en mangatád dikomoy ti sor sakay begsák a maggamet ten kaluuban na.

¹⁴Gamitán moy en atanan a bagay a awan ti reklamu sakay pamágtalu-talu,

¹⁵tánni magin malinis kam sakay awan ti kapintasan a anak nen Diyos ten ditángnga nen tolay hidi a liwat ti kákkabiyag sakay mágkadukás. Ni magkakonahud, ay magin demlag kam dikodi a kona ten biton a magdemlag dilanget,

¹⁶mentras a ipangaral moy dikodi en mensahi a makapangatád ti biyag. Káddemát ni Cristo ay mepagmadikál takam gapu awan nawanan ti kabuluhan en pagud ku.

¹⁷En pánnampalataya moy sakay págserbi ten Panginoon ay kona ten handug a iyalay moy dikona. Sakay en digi ku ay mebuhus a mekuyug ten handug moy. Ni magkakonahud ay ikasaya ku sakay mákpagsayaák dikomoy.

¹⁸Kona labi hud, dapat kam a magsaya sakay mákpagsaya kam dikoku.

¹⁹Ni ipagkaluub nen Panginoon a Jesus ay paangayán ku haán a pagdaka ti Timoteo tánni bumegsák isip kuwidi ni matukuyan ku dikona en kalagayan moy.

²⁰Awan ti makaparehu dikona ten pákpagkaessa na dikoku ten págmalasakit ten kapiyyaan moy.

²¹Gapu en gustu nen agum ay en pangsadili di la a kapiyyaan, bakán a en para kánni Jesu-Cristo.

²²Tukoy moy labi en katapatan ni Timoteo. Magkaguman kami a kona ten matama a magserbi alang-alang ten Maganda a Bareta.

²³Gustu ku nakuwan a paangayán siya haán ni matukuyan ku dán ni ánya i mangyariyid dikoku háddi.

²⁴Umasaák ten Panginoon a awan dálla magmalay ay makaangayák haán.

²⁵Naisip ku a kailangan a paangayán haán ti Epafrodito. Siya ay kaparehu ku a manggagawa sakay sundalu nen Diyos, pinaangay moy siya háddi tánni tulunganák na.

²⁶Tunay dán sor naid a ketan na kam haán a atanan. Mabalisa siya a tarud gapu natukuyan moy a nagkasakit siya.

²⁷Nagkasakit ngani siya ti mahigpit a ngari-ngari na dán a ikatay. Peru kinagbiyan siya nen Diyos sakay bakán la a siya nan pati sikán, sakay nakaiwasák ti purus dálla a kalungkutan.

²⁸Kaya ngani gustu ku dán a paangayán siya haán tánni masaya kam a maketa dikona a ruway. Sakay tánni maibut dán en kákkabalisa ku.

²⁹Kaya tanggapán moy siya a tehud a kasayaan bilang essa a kapatkaka ten Panginoon. Igalang moy en tolay hidi a kona dikona,

³⁰gapu ngaringari dán siya a matay para ten págserbi na kánni Cristo tánni tulunganák na ten tulung a awan moy magamet para dikoku.