Filippi 2

1

2

3

4

¹Gur ke gelnagmed e ngongol romed u fithik’ Kristus, ni aram e rogon ni gimed ba t’uf rok e ke fal’eg lanin’med? Gimed be par nib ta’reban’med ngak fare Kan Nthothup fa? Gimed be runguymed ma gimed be t’ufegmed fa?

²Ere ri gu be wenig ngomed ni nge ta’reb e leam romed, me bigimed mi i t’ufeg bigimed, ma ba ta’reban’med, ngam felfelan’ niged gag.

³Dabi suk’ ngan’med ni ngam muruwliyed ban’en ni gimed e ngam m’onod riy ni fan e nganogmed riy ni gimed e soromed, ara bochan e nge yib ufan ngomed; machane nge bigimed me sobut’nag ir, ma dabi finey bigimed ni ir e ba sorok ngak e tin ni kabay e girdi’.

⁴Ra bigimed ma ngi i leamnag bigimed ngi i ayuweg u rogon nrayag rok, ma gathi go ir e ngi i leamnag ir.

⁵Rogon e leam nge pangin ni nge yag ngomed e fare leam nge fare pangin ni immoy rok Kristus Jesus ni ba’aray:

⁶Gubin ngiyal’ ni immoy rok rarogon Got, machane de guy rogon ni nge gelnag ir nge yan i par nib ta’reb rogon ngak Got.

⁷Ya ir e leam rok me pag e fla’ab rok ni gubin, nge fek rarogon ba tapigpig. Mi ni gargeleg ni bod e girdi’, me m’ug ni bod rogon e girdi’;

⁸mi i par nib sobut’an’ ma be fol rok Got nge yan i mada’ ko ngiyal’ ni yim’ riy — ni yam’ ni tay u daken e kuruth.

⁹Ireray fan me fek Got Jesus nge tay ni ir e th’abi tolang u tharmiy, me pi’ fare ngachal ngak ndariy reb e ngachal ni ba ga’ ngay,

¹⁰ya nge urngin e pi’in yad bay u tharmiy, nge pi’in yad bay u daken e fayleng, nge pi’in yad bay ko bin nu ar e fayleng ni ngar ragbuggad, ngar ted fan fithingan Jesus,

¹¹ma yad gubin ni bay rogned u fithik’ e girdi’ ni Jesus Kristus e ir e Somol, minog e sorok riy ngak Got ni Chitamangiy.

¹²Ere pi tafager rog, um moyed ni gubin ngiyal’ ni gimed be fol rog ko ngiyal’ ni ug moy romed, me ere chiney nda kug moy romed e ri ba ga’ fan ni ngam folgad rog. Um ngongolgad ni bay madgun Got u wun’med mu um t’on gad ko marus nge mada’ ko ngiyal’ ni kam marod ngak Got,

¹³ya Got e gubin ngiyal’ ni be maruwel u fithik’ i lanin’med ni be pingeg lanin’med ni nge m’agan’med ngay ni ngam folgad ko tin be finey.

¹⁴Um rin’ed urngin ban’en ndab um gun’gun’gad ara um tugthingad,

¹⁵nge yag ni mpired ndariy thibngimed ma gimed bmachalbog, ma pifak Got gimed ni gimed ba yal’uw ni gimed be par u fayleng u fithik’ e girdi’ ndar yal’uwgad ma yad ba kireb. Thangri gal rama’emed u fithik’rad ni bod e t’uf ni be gal’ lanelang,

¹⁶mi gimed weliy e thin rok Got ngorad ni murung’agen e yafos ndariy n’umngin nap’an. Fa’anra mu rin’ed ni aray rogon mra yib tapgin ni nggu felfelan’ ngomed ko Chirofen ni bay sul Kristus riy; ya aram e ra m’ug ni urngin e athamgil nge maruwel ni ug tay e de yan i aw nib m’ayfan.

¹⁷Racha’eg e sana bay ni pu’og nga daken e maligach ni be pi’ e michan’ romed ngak Got ni ngan pu’og nga daken ni bod ban’en ni kan pi’ ngak Got. Fa’anra nge yan i yodorom, me ere kug felan’, ma ngam uned ngog ni gimed gubin ko felfelan’.

¹⁸Ere aray rogon ni ngu’um felfelan’gad, mu gu un ngomed ko felfelan’.

¹⁹Ba pagan’ug ngak Somol Jesus ni bayi gagiyegnag nge yag ni gu l’oeg Timothy nge yib ngomed ni kane’, ya nge sul nge weliy salapmed ngog nggu felfelan’.

²⁰Kemus ni go ir e ba ta’reb lanin’mow ngomed, me ir e cha’ nri ba’adag ni nge ayuwegmed.

²¹Ma tin kabay e girdi’ e ra be’ ma tirok’ e ir e be finey, ma gathi tirok Jesus Kristus e yad be finey.

²²Gimed manang ni kad guyed ni bay fan Timothy, nge rogon nike par ni bod be’ ni fakag ngog ni be un ngak e chitamngin ko maruwel ni fan ko fare Thin Ni Bfel’.

²³Gu be finey nnap’an ni nggu nang e n’en ni ngan rin’ ngog mu gu l’oeg nge yib ngomed;

²⁴ma ba pagan’ug ngak Somol ni bayi gagiyegnag nge mang gag e gub ngomed ni kane’.

²⁵Gu be finey ndabisiy ni nggu l’oeg walagdad ni girdi’en Kristus i Epafroditus nge sul, ni ir e i un ngog ko maruwel nge athamgil, mi ir e be ayuwegneg nrogon ni mol’oged ni nge rin’.

²⁶Be finey ni manga yigi guymed ni gimed gubin, ma kari kireban’ ni bochan e kam rung’aged nib m’ar.

²⁷Riyul’ ni yib e m’ar ngak nge chugur i yim’. Machane i Got e runguy; ni gathi go ir ya ku errogon gag, nde pag Got e kireban’ nib gel nge yib ngog.

²⁸Ere ri gu be finey ni nggu l’oeg nge yib ngomed, ni bochan e ngam guyed mikigimed felfelan’, me chuw e kireban’ rog.

²⁹Ere mfeked nga tabinaw romed u fithik’ e felfelan’, ni bochan e ir reb i walagmed u daken Somol. Mu ted fan urngin mit e girdi’ ni bod ir,

³⁰yi pag fan e pogofan rok nge chugur ni ngem’ ni fan ko maruwel rok Kristus, ni bochan e nge ayuwegneg ko n’en ndabiyag ni ngam ayuweged gag riy.