Efɛɛsi 5

1

2

3

4

5

6

¹Ntũnnɛ Kuyie nkó mɛborimɛ, kɛ yɛ̃́ di túmɛ̀ ku bí nyi, kù dɔ́ ì.

²Ndɔ́nɛ̀ ditɔbɛ̀ Kirisi ti dɔ́ mɛ̀ɛ̀ botí kɛ duɔ́ nhomɑ́ɑ̀ kɛ̀ bɛ̀ ò kùɔ kòò dò ndipɑ̃nnì kufɔ̃ɔ̃ku nɑtikù kpɛri Kuyie ndɔ́ dì.

³Di tú Kuyie nkɔbɛ mbɛ, di bɑ́ ndɔuti dɔutinɛ̀ ditɔbɛ̀ di bɑ́ nsĩnkùnko dimɑ́ɑ̀, di bɑ́ duɔ́ ndi yɛ̀mmɛ̀ tikpɑ̀tì. Dɛ̀ ketɛ́ kɛ í dò mbɛ̀ nyo dɛ kó tinɑ́ɑǹtì di cuokɛ̀.

⁴Di bɑ́ nnɑ́ɑntɛ ifɛi kpɛti nɛ̀ tiyɛìnnɑ́ɑǹtì nɛ̀ tinɑ́ɑnyɛiti, dɛ̀ í wenni. Petìnkɛ nsɑ̃ntínɛ̀ Kuyie nku sɑ̀ɑ̀ nkpɛ́í.

⁵Nyɛ̃́nɛ̀ kɛ dò nwèè dɔuti dɔutinɛ̀ bɛtɔbɛ̀ nɛ̀ wèè sĩ̀nkùnko omɑ́ɑ̀, nɛ̀ wèè í diɛ̀ ntikpɑ̀tì, dɛ̀ í cɑ̃́ɑ̃́nnɛ̀ wèè feu yɛbɔkɛ̀. Dɛ yiɛ̀ mbotí í tɑti Kirisi nɛ̀ Kuyie mbɛ kpɑ̀ɑ̀tìyuu miɛkɛ.

⁶Di bɑ́ɑ́ yie nkòò mɔù di soutɛ́ nɛ̀ dɛtetìrɛ̀ kó tinɑ́ɑǹtì: Dɛɛ̀ te kɛ̀ Kuyie mmiɛkɛ cɔ́ú bɛ̀ɛ̀ yetɛ ku kpɛti.

⁷Di bɑ́ mmɔkɛnɛ̀ dɛ kó bɛnìtìbɛ̀ botí mɛtɑummɛ̀ mɑmɛ̀.

⁸Di do tú dibiìnnì kɔbɛ mbɛ di mmɔ̀nnì kɛ tɑunnɛ̀ ti Yiɛ̀ kɛ tú kuwenniku kɔbɛ. Nfòùnɛ̀ kɛ dò mmɛnɑ́ɑ̀ nkó ibí.

⁹Kuwenniku kó mutɔ̃mmú tú: Tinìtì, mɛwetímmɛ̀, nɛ̀ timɔ́mmɔnti.

¹⁰Mbɑɑ̀tìnɛ̀ ti Yiɛ̀ ndɔ́ dɛ̀.

¹¹Di bɑ́ nkɔkɛ́ dibiìnnì kɔbɛ kó mutɔ̃mmú miɛkɛ, mù tú mutetìmù mmu, di petìnkɛ mmù dɑ́ɑmmu mmu.

¹²A bo nɑ́kɛ́mɛ̀ bɛ̀ dɔ̀ɔ̀ri dɛ̀ disɔ̀rì dɛ̀ mɔ̀kɛ ifɛi nyi.

¹³Dɛ kó mutɔ̃mmú yɛ̀nní dìì mɔ̀nnì kuwenniku miɛkɛ, kuwenniku ɔ̃ɔ̃ mù feimmu.

¹⁴Mɔ́mmuɔ nwe bɛ̀ dènnɛní dɛ̀ kuwenniku dɛ̀ ɔ̃ɔ̃ wenkɛmu. Tì wɑ̃̀rimu kɛ tú: Entɛ, fɔ̃́ nwèè duɔ́ bɛcíríbɛ̀ miɛkɛ! Kɛ̀ Kirisi dɑ míítɛ́.

¹⁵Ndɑkɛnɛ̀ mɛsɑ̀ɑ̀ di fòù mɛ̀ɛ̀ botí. Di bɑ́ɑ́ ndò tiyɛìntì, ntúnɛ̀ mɛciì nyɛmbɛ̀.

¹⁶Bɑ́ nfétìnkonɛ̀ di fíè, ti bo yɛmɔ̀rɛ̀ yɛiyɛ nyɛ.

¹⁷Di bɑ́ ndò ntiyɛìntì, yetɛnko kɛ́yĩ́ɛ̃́tɛ́ Kuyie ndɔ́ dɛ̀.

¹⁸Di bɑ́ mmuɔ̀ mmɛnɑɑ̀, mɛ̀ di tɑnnìnko mɛyɛi mmiɛkɛ nkɛ. Yóunɛ̀ kɛ̀ Muyɑɑ́nsɑ̀ɑ̀mù di píɛ.

¹⁹Kɛ̀ di nwɛ̃ nkɛ yɑ́úkùnko ditɔbɛ̀ kɔ̃̀ntì, kɛ́ndiè nKuyie nkó yɛsɑ̃ɑ̃, nnɛ̀ ku kó iyiɛ, kɛ diè Muyɑɑ́nsɑ̀ɑ̀mù di duɔ́ nyìì yiɛ, kɛ́nsɑ̃ntí Kuyie nnɛ̀ di yɛ̀mmɛ̀ mɛmɔu,

²⁰nsɑ̃ntínɛ̀ ti cicɛ Kuyie dɛmɔu kpɛ́í nsɑ̃́ɑ̃̀ nɛ̀ ti Yiɛ̀ nYesu Kirisi kó diyètìrì.

²¹Nyíénnɛ̀ ditɔbɛ̀ kpɛti, di dé mɛ̀ɛ̀ kpɛ́í nKirisi.

²²Bɛnitipòbɛ̀ nyíénnɛ̀ di dɑɑbɛ̀ kpɛti, di yie mmɛ̀ɛ̀ botí ti Yiɛ̀ nkpɛti.

²³Kɛ yɛ̃́ onitidɔ̀ù weè bɑkɛ́mɛ̀ o pokù Kirisi bɑkɛ́ mɛ̀ɛ̀ botí o kɔbɛ tĩ̀nnì dìì tú o kɔ̃̀ntì kɛ dì dɛɛrí.

²⁴Dɛɛ̀ te kɛ̀ bɛnitipòbɛ̀ dò nkɛ́nyíé mbɛ dɑɑbɛ̀ kpɛti timɔu, Kirisi kɔbɛ tĩ̀nnì yíé mmɛ̀ɛ̀ botí Kirisi kpɛti.

²⁵Bɑ́ wèè nitidɔ̀ù kòo ndɔ́ o pokù Kirisi dɔ́ mɛ̀ɛ̀ botí o kɔbɛ tĩ̀nnì kɛ ku di kpɛ́í,

²⁶kɛ dì ɔ̀útɛ́ nɛ̀ mɛniɛ nnɛ̀ Kuyie nnɑ́ɑǹtì.

²⁷Ò dɔ̀ɔ̀ mɛmmɛ kɛ dɔ́ dì ntú o kpɛri ndi kɛ́nwenni, kɛ́nkpɑ kuyɛ̀nkù, kɛ́nkpɑ mɛyɔ̃́ɔ̃̀, kɛ́nkpɑ mɛyɛi mmɛmɔu, kɛ́ndò mpɑ́íí kɛ í mmɔkɛ bɛ̀ bo dì sɛi ntìì ĩ́nkɛ̀.

²⁸Mɛɛ̀ botí nku bɑ́ wèè nitidɔ̀ù dò nkɛ́ndɔ́mɛ̀ o pokù ò dɔ́ mɛ̀ɛ̀ botí omɑ́ɑ̀. Wèè dɔ́ o pokù ò dɔ́ omɑ́ɑ̀ ndi.

²⁹Òmɔù ɔ̃ɔ̃ í mpóó nhomɑ́ɑ̀, ò ɔ̃ nyɑ́rímu omɑ́ɑ̀, kɛ piú omɑ́ɑ̀. Kirisi mɛ ndɔɔri o kɔbɛ tĩ̀nnì.

³⁰Kɛ yɛ̃́ ti túmɛ̀ o kɔ̃̀ntì kó itùòti nyi.

³¹Tì wɑ̃̀rimu kɛ tú: Onìtì bo yóu o cicɛ nɛ̀ o yɔ̃ kɛ́tɑunnɛ̀ o pokù, kɛ̀ bɛ̀ɛ nɑɑ́ ntikɔ̃̀ntì timɑ́ɑ̀.

³²Ti nnɑ́ɑǹtì tú disɔ̀rì diɛrì kpɛti nti, tì tú Kirisi nwe nɛ̀ o kɔbɛ tĩ̀nnì,

³³kɛ múnkɛ tú di kpɛti. Bɑ́ wèè nitidɔ̀ù wè ndɔ́ o pokù ò dɔ́ mɛ̀ɛ̀ botí omɑ́ɑ̀, kòo nitipòkù ndé o dɔù.