Efɛɛsi 3

1

2

3

4

5

6

¹Mí mPɔɔri Yesu Kirisi kóo tɔ̃ntì, bɛ̀ n kpetí n nɑ̀kɛ́ mɛ̀ɛ̀ kpɛ́í nkɛ díndi bɛ̀ɛ̀ í tú Sifubɛ Kuyie nnɑ́ɑǹtì.

²Di yɛ̃́mu Kuyie nni nkuɔ́mmɛ̀ mɛsémmɛ̀ kɛ n dɔ̀ɔ̀ mɛsɑ̀ɑ̀ kɛ yɛ̃ n nɑ̀kɛ́ Tinɑ́ɑǹsɑ̀ɑ̀tì, díndi bɛ̀ɛ̀ í tú Sifubɛ.

³Tìì do sɔri Kuyie nti nni mbɛnkɛ, kɛ̀ n yĩ̀ɛ̃́tɛ́ ku kó disɔ̀rì kpɛti, m mɛ̀ mbo kɛ ti nwɑ̃ũní.

⁴Kɛ̀ di ti kɑ̀ɑ ndi bo bɑntɛ́ Kuyie nni mbɛnkɛmɛ̀ Kirisi kpɛti tìì do sɔri.

⁵Kù do í bɛnkɛ dɛ kó disɔ̀rì kpɛti dimɔ̀nnì kɔbɛ, kù mɛ̀ ntì bɛnkɛmɛ̀ di mmɔ̀nnì Yesu tɔ̃rɛ̀ nɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ nɛ̀ Muyɑɑ́nsɑ̀ɑ̀mù kó muwɛ̃rímú.

⁶Dɛ kó disɔ̀rì tu: Sifubɛ nɛ̀ bɛ̀ɛ̀ í tú Sifubɛ bɛ̀ wɛ̃nnɛ́mɛ̀ onìtì omɑ́ɑ̀, kɛ yóó di tikpɑ̀tì, kù yɛ̃ nkù yóó duɔ́ ntì bɛ̀ɛ̀ yie nYesu Kirisi kó Tinɑ́ɑǹsɑ̀ɑ̀tì.

⁷Kù duɔ́ nkɛ̀ n nɑ̀ɑ́ ntì, kù n dɔ̀ɔ̀ mɛsɑ̀ɑ̀ mmɛ kɛ n duɔ́ ndɛ kó mutɔ̃mmú kɛ bɛnkú nɛ̀ n tɔ̃mmú miɛkɛ ku wɛ̃rímú dɛumɛ̀.

⁸Bɑ́ nɛ̀ m mɛ ntumɛ̀ Kirisi kɔbɛ bɛmɔu kó bɛsɑ́m̀pɔ́bɛ̀ kóo sɑ́m̀pɔ́ù, kɛ̀ kù duɔ́ nkɛ̀ m bo nɑ́kɛ́ Tinɑ́ɑǹsɑ̀ɑ̀tì bɛ̀ɛ̀ í tú Sifubɛ, Kirisi kpɑ̀tì dɛumɛ̀ kɛ í mɔkɛ kumɑ̀nku,

⁹kɛ bɛ̀ bɛnkɛ Kuyie nkó disɔ̀rì kpɛti, kunku kùù dɔ̀ɔ̀ dɛmɔu kuù mɛ̀ dɔ́ nɛ̀ dimɔ̀nnì,

¹⁰kɛ dɔ́ bɛ̀ɛ̀ bɑkɛ́ kɛĩ́nkɛ̀ nɛ̀ bɛ kó bɛkperíbɛ̀ɛ yɑ̀ Kirisi kɔbɛ tĩ̀nnì, kɛ́bɑntɛ́ Kuyie nciì ndɛumɛ̀ mɛdiɛ̀ kɛ í mɔkɛ kumɑ̀nku.

¹¹Kuyie ndɔ̀ɔ̀ kù dɔ́mɛ̀ mmɛ nɛ̀ dimɔ̀nnì ti Yiɛ̀ nYesu Kirisi kpɛ́í.

¹²Di mmɔ̀nnì ti bo nɑ kɛ́ kù tɔ̀ɔ́nnɛ̀ kɛ bɑ́ nyĩɛ̃̀kù, ti tɑ̃́ mɛ̀ɛ̀ kpɛ́í nYesu, koò tɑunnɛ̀.

¹³N di nɑ́ɑ́mmu kɛ tú di kɔ̃̀ntì bɑ́ɑ́ yɑ̃rikɛ, bɑ́ kɛ̀ n fɛ̃́ṹrì, n fɛ̃́ṹrì díì kpɛ́í nkɛ̀ dɛ̀ bo di dɔɔ̀ mɛsɑ̀ɑ̀.

¹⁴Dɛɛ̀ kpɛ́í nte kɛ̀ n nínkú n núù ti cicɛ Kuyie nyììkɛ̀.

¹⁵Kunku kùù te kɛ̀ kɛĩ́nkɛ̀ kɔbɛ nɛ̀ kɛtenkɛ̀ kɔbɛ kɛ̀ bɛ̀ bo.

¹⁶N kù bɑ̀ɑ́mmu kɛ tú kù di duɔ́ nku kpɑ̀tì diɛtì, kɛ̀ Muyɑɑ́nsɑ̀ɑ̀mù di kpénkùnnɛ,

¹⁷kɛ̀ Kirisi mbo di miɛkɛ, kɛ̀ di nfííkú tei tei, Kuyie nkó mɛdɔ́kùmɛ̀ miɛkɛ,

¹⁸kɛ́wɛ̃nnɛ́nɛ̀ Kirisi kɔbɛ tɔbɛ̀ kɛ́bɑntɛ́ Kirisi ti dɔ́ kɛ̀ dɛ̀ dɛu mɛ̀ɛ̀ botí kɛ okù mɛ̀ɛ̀ botí kɛ cũmpúrì mɛ̀ɛ̀ botí bɑ́ kɛ í mɔkɛ kumɑ̀nku,

¹⁹kɛ́yĩ́ɛ̃́tɛ́ Kirisi ti dɔ́mɛ̀ kɛ̀ dɛ̀ pɛ̃ɛ̃tɛ́ ti yĩ́ɛ̃́tímɛ̀, kɛ́pɛ́tɛ́ Kuyie nkpɛrɛ dɛmɔu.

²⁰Ti sɑ̃ntímu Kuyie nkùù wɛ̃rímú diɛmù bo ti miɛkɛ, kɛ bo nɑ kɛ́dɔɔ̀ kɛ̀ dɛ̀ɛ pɛ̃ɛ̃tɛ́ ti kù mɔ̀ú dɛ̀ nɛ̀ ti toti tì ti yɛ̀mmɛ̀.

²¹Ku yètìrì ndɛu Yesu Kirisi kɔbɛ cuokɛ̀ sɑ̃́ɑ̃̀ Kirisi pĩ mmùù tɔ̃mmú kpɛ́í. Kɛ̀ dɛ̀ mmɛ̀ ndò.