1मिनु पिप नेबुकदनेसर आ सासन पशो बर्स निक्शी जाक्दीम्मेनु, मेको पिपमी ङोमु का तवा बाक्त। मिनु ङोमु तशा नोले मेको मार पङ, दो पङ दुम्शा, आं थुं ग्येत्थ लुक्च दुम्शा, लेंशा इप्ने मचबा बाक्त।
2मिनु मेको पिपमी आ ङोमु मार बाक्मे, दे तुइक्चा कली “जादू, मन्तर तन्तर पाइब, टुना मुना पाइब नु सोरुल कोव़ब कल्दी आन कली चाक्चा माल्नीनी” दे हुकुम पाप्तु। मिनु मेकोपुकी पिप आ ङोंइती जाक्शा राप्तेक्म। यसैया ४७:१२-१३
3मिनु पिपमी मेको आन कली “गो ङोमु का ताता। मेको तशा, आं थुं ग्येत्थ लुक्च दुम्त” देंत।
4मिनु सोरुल कोव़ब कल्दीपुकीमी आरामेइक लोव़ पा पिप कली “पिप, शुश ब्रोंइशा बाक्कीन। इन वाइल आन कली इन तशो ङोमु शोव़ङीन। मिनु गो, इन वाइलपुकीमी, मेको रे मार रुम्सीबा मेको शेंनीकी” देंतेक्म।
5मिनु पिपमी सोरुल कोव़ब कल्दी आन कली “गो मेको आ पर्बम हुकुम पाता। गेपुकीमी आं ङोमु नु मेको रे मार रुम्सीबा, मेको शोव़ने मचाप्तीनी हना, इन गुइ खोइल ख्रोइश्शा, साइक्नन्नी। मिनु इन खिं प्रेश्शा गेनन्नी।
6तन्न आं तशो ङोमु नु मेको रे मार रुम्सीबा, मेको शोव़तीनी हना, गो इन कली मार मार रिम्शो थोव़क, इनाम नु ठेयब मान गेनुङ। मोपतीके आं तशो ङोमु शोव़शा, मेको रे मार रुम्सीबा, शेंदीनी” दे माइक्तीमी।
7मिनु मेकोपुकीमी लेंशा पिप कली “पिपमी इन वाइल, आंइ कली ङोंइती इन तशो ङोमु शोव़ङीने। मिनु नोले गोपुकीमी मेको रे मार रुम्सीबा इन कली शेंनीकी” देंतेक्म।
8मिनु पिपमी “गो थमा पा तुइक्नुङ, गेपुकीमी आं कली क्योल्नीनी। मारदे हना इन कली साइक्तीक हुकुम थमा बाक्ब।
9गेपुकीमी आं कली आं तशो ङोमु शोव़ने मचाप्तीनी हना, गे साइक्चा पुंइसीनीनी। गे आं कली जोल पा, शेंखु पतीक आ पर्बम गारशो बाक्नीनी। मोपतीके आं कली आं तशो ङोमु मशोव़तीनी हना, आ अर्थ मार बाक्बा, दे शेंने मचाप्नीनी, दे तुइक्नुङ” दे माइक्तीमी।
10मिनु सोरुल कोव़ब कल्दीपुकीमी पिप कली “एको रागी नेल्लेमी पिप आ हिल्लो पशो लोव़ शोव़ने चाप्ब सुइ मबाक्नीम। ठेयब नु सक्ति पाइश्शो पिपमी जादू, मन्तर तन्तर पाइब नु सोरुल कोव़ब कल्दी आन कली सुइम मोदेंशो लोव़ गेनायो हिल्लो मपाम।
11पिपमी हिल्लो पशो लोव़ सुइमी शोव़ने मचाप्चा ङा बाक्ब। देवी देवतामी ला तुइक्पाइक्ने चाप्नीम। तन्न मेको देवी देवता मुर आन दातेमी मबाक्नीम” देंतेक्म।
12मिनु मेको लोव़ नेंशा, पिप शुश गाइश्शा, बेबीलोन रागीम बाक्ब जोक्ब तुइक्ब नेल्ल आन कली साइक्चा नम, दे हुकुम पाप्तु।
13मिनु पिपमी जोक्ब तुइक्ब मुर नेल्ल आन कली साइक्चा माल्ब देंशो लोव़ ब्रेक्शा ग्रुंइताक्व। मिनु मेको देंशो खोदेंशो पा दानीएल नु आ वारच आन कली यो साइक्चा कली माल्तेक्म।
14मिनु दानीएलमी मेको नेंशा, शुश मिम्शा, पिप आ साइक्तीक गेय पाइब अरयोक नु लोव़ पाप्तु। मेको बेबीलोन ङा जोक्ब तुइक्ब मुर आन कली साइक्चा कली लशो बाक्त। दानीएल १:२०
15मिनु दानीएलमी मेको पिप आ गेय पाइब कली “मारदे पिप आ हुकुम मोदेंशो रीब पा पचा माल्नीमी? दे हिल्लो पाप्तु। मिनु अरयोकमी दानीएल कली नेल्ल शेंताक्व।
16मिनु मेको तुइक्ता नोले दानीएल पिप आ बाक्तीकेम लशा ‘इच्का नाक्त रिम्दीन। मिनु गो मेको ङोमु नु मेको आ अर्थ इन कली शोव़नन्नी’ ” दे पुंइतु।
17मिनु नोले दानीएल आ खिं लशा, आ वारच हनान्याह, मीशाएल नु अजारयाह आन कली मेको लोव़ नेंपाइक्तु।
18दानीएलमी मेको आन कली “गोपुकी नु बेबीलोन ङा जोक्ब तुइक्ब नेल्ल साइक्चा मपुंइसीचा कली स्वर्ग ङा परमप्रभु कली मेको ख्रुइश्शो ङोमु तुइक्पांइसीचा कली आ शिशी पुंइय” देंत।
19मिनु मेको नाक्दो परमप्रभुमी दानीएल कली कोंइतीकेमी मेको ख्रुइश्शो ङोमु नु आ अर्थ कोंइताक्व। मिनु दानीएलमी स्वर्ग ङा परमप्रभु कली
20“परमप्रभु, इन नें गेना हना यो ठेयब बाक्ब। मारदे हना सक्ति नु जोक्ब तुइक्ब थुं इन केन बाक्ब।
21गे हिउंद नु बर्खा फाइक्ब, पिप आन कली वोइक्ब नु तिल्ब बाक्नीनी। गे जोक्ब तुइक्ब आन कली तुइक्तीक थुं गेनीनी। मिनु रुप्ब थुं पाइश्शो मुर आन कली जोक्तीक थुं गेनीनी। दानीएल ४:१४,२२,२९
22गे ठेयब नु ख्रुइश्शो लोव़ तुइक्पाइक्नीनी। छिङछिङम बाक्शो मारेइ मारेइ नेल्ल तुइक्नीनी। मारदे हना गे छेङछेङम बाक्नीनी।
23आं किकी पिपी आन परमप्रभु, गो इन कली ‘गे रिम्शो पाइब बाक्नीनी। गे नेल्ल क्येङा ठेयब बाक्नीनी। मारदे हना गे आं कली तुइक्तीक थुं नु सक्ति गेतीनी। मिनु आंइ पुंइशो नेल्ल गेतीनी। पिप आ तुइक्चा माल्शो नेल्ल आंइ कली तुइक्पाइक्तीनी’ ” दे परमप्रभु कली ठेयब सेल्शा, देंत।
24मिनु दानीएल बेबीलोन रागी ङा जोक्ब तुइक्ब मुर नेल्ल आन कली साइक्चा, दे योव़चा पुंइसीशो मुर अरयोक आ बाक्तीकेमी लशा, मेको कली “बेबीलोन रागी ङा जोक्ब तुइक्ब मुर आन कली मसतीन। आं कली पिप आ ङोंइती चाक्दीय्यीनी। मिनु गो पिप कली आ ङोमु शोव़नुङ। मिनु मेको रे मार रुम्सीबा नेल्ल शेंनुङ” देंत।
25मिनु अरयोकमी दानीएल कली दोरोर पा पिप आ ङोंइती चाक्दीश्शा, पिप कली “गो यहूदा रागी रे ग्याइश्शा चाक्चा पुंइसीशो मुर आन दातेमी इन ङोमु आ अर्थ शोव़ने चाप्ब मुर का थित्ता” देंत।
26मिनु पिपमी बेल्त-शजर नें वोइश्शो दानीएल कली “गे आं तशो ङोमु शोव़शा, मेको आ अर्थ मार बाक्बा मेको शेंने चाप्नेवे?” दे हिल्लो पाप्तु।
27मिनु दानीएलमी पिप कली “पिप, इन हिल्लो पशो ख्रुइश्शो लोव़ जोक्ब तुइक्ब, मन्तर तन्तर पाइब जादू नु चिन्ड आ अर्थ तुइक्ब सुइमी यो देंने मचाप्नीम।
28तन्न स्वर्गमी परमप्रभु का बाक्ब। मेकोमी ख्रुइश्शो लोव़ कोंइब। मिनु मेकोमी पिप नेबुकदनेसर, इन कली रागी नुप्ची ना मार दुम्बा, दे कोंइशो बाक्ब। मिनु इन इप्ची ना तशो ङोमु मार बाक्त देंशा हना, उत्पत्ती ४१:१६
29गे इन इप्ची ना नोले ‘मार दुम्बा?’ दे मिम्ताक्नी। मिनु नोले मार दुम्बा, दे कोंइबमी मेको इन कली तुइक्पाइक्तु।
30गो मुर नेल्ल आन क्येङा शुश रुप्ने मचाप्नुङ। तन्न इन ङोमु आ अर्थ तुइक्पाइक्चा नु इन थुं ङा लोव़ रुप्पाइक्चा कली परमप्रभुमी मेको आं कली तुइक्पाइश्शो बाक्त। उत्पत्ती ४१:३९
31हजुर, गे कोव़शा बाक्नीनु, इन ङोंइती ठेयब मूर्ति का राप्शो ताइतीनी। मेको मूर्ति थम ठेयब नु थाम्पान टल्केशो बाक्त। मिनु इन ङोंइती शुश हिंचा ङा मूर्ति का राप्शो ताइतीनी।
32मेको आ पिया क्येख सुन के बाक्त। आ कुचु नु गुइ चांदी के नु आ कोव़ज नु फिला कांसा के बाक्तेक्म।
33मेको आ पोक्च फलाम के बाक्त। मिनु आ खोइली फलाम नु खप ब्वांइसीशो बाक्त।
34गे मेको कली कोव़शा बाक्नीनु, फुल्लु का यित। तन्न मेको फुल्लु मुर आन गुइम मख्रोइश्शो बाक्त। मेकोमी मूर्ति आ फलाम नु खप ब्वांइसीशो खोइलीमी ख्राप्तु। मिनु मेको मूर्ति कली प्रोल्शा, रोब चिब सेल्तु
35मिनु मेको फलाम, खप, कांसा, चांदी नु सुन नेल्ल ब्रोल चिल दुम्तेक्म। मिनु फशेमी खला ङा भूस हुरशा लाइश्शो खोदेंशो पा मारेइ मवोइक्थु, ग्यौ फिक्शा योल्ताक्व। मिनु मेको मूर्ति कली ख्रशो फुल्लु बारना बारन लशा, ठेयब डांडा दुम्शा, रागी नेल्ल ब्रीत।
36इन तशो ङोमु एकोन बाक्त। मुल पिप इन कली मेको ङोमु आ अर्थ शेंनुङ।
37हजुर, गे पिप आन पिप बाक्नीनी। स्वर्ग ङा परमप्रभुमी इन कली राज्य, सक्ति, अधिकार नु शुश मान गेशो बाक्ब। इजीकीएल २६:७
38मिनु मेकोमी तेइ तेइ बाक्ब मुर, ब्वाकी ङा जन्तु नु सरीङम बेरब चिक्ब नेल्ल आन कली इन कली गेशो बाक्ब। मिनु गे मेको नेल्ल आन कली सासन पाइनीनी। गे मेको मूर्ति आ सुन के पिया बाक्नीनी। येरमीया २७:६; येरमीया २८:१४
39मिनु इन नोले इन क्येङा ग्युम्शो राज्य का जाक्ब। मिनु मेको आ नोले ङा अरु कांसा के खोदेंशो राज्य का जाक्ब। मिनु मेकोमी रागी नेल्ल आन कली अधिकार पाइब।
40मिनु मेको आ नोले फलाम खोदेंशो बोल्यो अर्को राज्य का जाक्ब। दोपा फलाममी मारेइ मारेइ रोबल चिबल सेल्बा, मोपान मेको राज्यमी अर्को राज्य नेल्ल आन कली ब्रोले चीले पा तेइ तेइ फ्राइब।
41मिनु इन तशो फलाम नु खप ब्वांइसीशो खोइली नु ब्रेप्चोपुकी खोदेंशो पा ब्राशो राज्य का यो जाक्ब। तन्न मेको राज्य फलाम खोदेंशो इच्का बोल्यो बाक्ब। मेको फलाम खप ब्वांइसीशो बाक्त हना यो, मेको फलाम खोदेंशो पा इच्का बोल्यो बाक्ब।
42मिनु खोइली ङा ब्रेप्चोपुकी फलाम नु खप ब्वांइसीशो बुद पा मेको राज्य सक्ति पाइश्शो बोल्यो नु सक्ति मपाइश्शो बाक्ब।
43इन तशो फलाम नु खप ब्वांइसीशो खोदेंशो पा मेको राज्य ङा मुरपुकी ग्युंबे पा ब्वांइसीनीम। मिनु फलाम नु खप मगारशो बुद पा मेको राज्य यो का दुम्शा, लीने मचाप्ब।
44मेको पिप आन पालामी स्वर्ग ङा परमप्रभुमी अर्को राज्य का सेल्ब। मेको राज्य गेनायो ब्रोल चिल मदुम्ब। मेको राज्य ङा मुर खाल का ङा बाक्नीम। मेकोमी अरु राज्य नेल्ल आन कली रोब चिब पा थुम्पाइक्ब। तन्न मेको आ राज्य गेना हना यो लीब। दानीएल १४:२७; यसैया ९:६; १कोरिन्थी १५:२४; प्रकाश ११:१५
45मिनु गे दोदेंशो पा मुरुमी मख्रोइक्थु डांडा रे फुल्लु का यिशो ताइतीनी। मिनु मेकोम फलाम, कांसा, खप चांदी नु सुन नेल्ल कली रोबल चिबल पोक्गा, मोदेंशो पा ठेयब परमप्रभुमी ‘नोले मार दुम्बा’ दे पिप, इन कली कोंइशो बाक्ब। एको ङोमु नु आ अर्थ यो थमा बाक्ब” देंत।
46मिनु पिप नेबुकदनेसरमी खुम्की पा दानीएल आ ङोंइती बाप्शा, मेको कली ठेयब सेल्तु। मिनु “दानीएल कली अन्न नु धूप चढ़ेचा” दे हुकुम पाप्तु।
47मिनु पिपमी दानीएल कली “थमान, इन परमप्रभु देवी देवता आन परमप्रभु नु पिप आन परमप्रभु बाक्ब। मिनु ख्रुइश्शो लोव़ तुइक्पाइक्ब बाक्ब। मोपतीके गे एको ख्रुइश्शो लोव़ रुप्पाइक्ने चाप्तीनी” देंत। दानीएल ३:२९; यहोसु २:११; भजन संग्रह ८६:८; यसैया ४२:८
48मिनु पिपमी दानीएल आ मान बारपाइक्तु। मिनु शुश शोंप गेप्तु। मिनु बेबीलोन रागी नेल्ल कली हुकुम पाइब नु जोक्ब तुइक्ब मुर नेल्ल आन ठेयब मुर सेल्तु।
49मिनु दानीएलमी “शद्रक, मेशक नु अबेद-नेगो आन कली बेबीलोन रागी ङा सासन पतीक गेय गेचा” दे पिप नु लोव़ पा पुंइतु। दानीएल चहिं पिप आ दरवारमीन बाक्त। दानीएल ३:१२
