1نٍبُكَدَنسَرِ شَ مَنفّيَ حّ قِرِن ندٍ رَ، عَ نَشَ شِيٍ ندٍ سَ. عَ شَشِلِ نَشَ عِقُ هَن عَ مُ نْ شِدٍ.
2عَ نَشَ كَرَ مْشْييٍ، سٍمَتٌييٍ، مَندُرُلَيٍ، نُن بَبِلْن سّرّشّدُبّيٍ شِلِ عَلَكٌ عٍ شَ عَ شَ شِيٍ تَفِرَبَ عَ بّ. عٍ نَشَ قَ، عٍ تِ عَ يَ عِ.
3مَنفّ نَشَ عَ مَسٍن عٍ بّ، «ﭑ شِيٍ ندٍ نَن سَشِ، نَشَن بَرَ ﭑ شَشِلِ عِقُ. عَ شْلِ ﭑ مَ ﭑ شَ نَ شِيٍ كُي عِقٍ كٌلٌن.»
4بَبِلْن سّرّشّدُبّيٍ نَشَ مَنفّ يَابِ عَرَ مِ شُي رَ، «مُشُ شَ مَنفّ، عَلَ شَ سِمَيَ قِ عِ مَ. عِ شَ شِيٍ يَبَ عِ شَ كٌنيِيٍ بّ، عَلَكٌ مُشُ شَ نَ تَفِرَبَ عِ بّ.»
5مَنفّ نَشَ عَ قَلَ سّرّشّدُبّيٍ بّ، «ﭑ مَ نَتّ تٌنفٌشِ نَن يَ؛ شَ وٌ مُ ﭑ مَ شِيٍ نُن عَ كُي عِقٍ تَفِرَبَ ﭑ بّ، ﭑ وٌ عِبٌلٌنمَ نّ عَ شُنتُن شُنتُنيِيٍ رَ، ﭑ وٌ شَ بَنشِيٍ قَن كَنَ.
6كْنْ شَ وٌ نْ ﭑ مَ شِيٍ نُن عَ كُي عِقٍ تَفِرَبَدٍ ﭑ بّ، ﭑ هَرِفٍ نُن بِنيّ فبٍفبٍ قِمَ نّ وٌ مَ. عَوَ، وٌ ﭑ مَ شِيٍ نُن عَ كُي عِقٍ تَفِرَبَ ﭑ بّ كٍرٍن نَ.»
7عٍ نَشَ مَنفّ يَابِ، «مَنفّ، عِ شَ نَ شِيٍ مَسٍن مُشُ بّ عَلَكٌ مُشُ شَ عَ تَفِرَبَ عِ بّ.»
8مَنفّ نَشَ عَ قَلَ عٍ بّ، «ﭑ عَ كٌلٌن وٌ وَ مَ وَشَتِ تٌنفٌقٍ عَ قٍ مَ، بَرِ مَ وٌ عَ كٌلٌن ﭑ مُ ﭑ مَ نَتّ تٌنفٌشِ كَنَمَ!
9كْنْ شَ وٌ مُ ﭑ مَ شِيٍ تَفِرَبَ ﭑ بّ، وٌ بِرِن قَمَ نّ نَ حَشَنكَتّ سْتْدٍ. وٌ وَ مَ ﭑ مَدَشُقٍ وُلٍ نَن نَ هَن ﭑ شَ ﭑ مَ نَتّ مَسَرَ. وٌ ﭑ مَ شِيٍ تَفِرَبَمَ ﭑ بّ نَ نَن مَ كٍرٍن نَ، عَلَكٌ ﭑ شَ عَ كٌلٌن وٌ قَتَ نَ رَبَدٍ.»
10سّرّشّدُبّيٍ نَشَ مَنفّ يَابِ، «مَنفّ، مِشِ يٌ مُ نَ يِ دُنِحَ بّندّ قُحِ قَرِ نَشَن نْمَ يِ يَامَرِ رَبَدٍ. نَ نَن عَ تٌشِ مَنفّ يٌ مُ نَ نَشَن يِ قٍ مْولِ مَشْرِنمَ عَ شَ كَرَ مْشْييٍ، سٍمَتٌي، نُن سّرّشّدُبّيٍ مَ، هَلِ عَ سّنبّ تٌ فبٌشِ.
11عِ نَشَن مَشْرِنشِ، نَ شْرْشْ. مِشِ يٌ مُ نْمَ نَ يَابِ سٌدٍ عِ يِ رَ قٌ عَلَيٍ، كْنْ نٍيٍ مُ دْشْشِ عَدَ مَدِيٍ تَفِ.»
12نَ كُي، مَنفّ نَشَ شْنْ عٍ مَ، عَ بْحّ نَشَ تٍ هَن عَ يَمَرِ قِ بَبِلْن لْننِلَيٍ بِرِن شَ قَشَ.
13مَنفّ تٌ يَامَرِ قِ لْننِلَيٍ بِرِن شَ قَشَ، شّيرَيٍ نَشَ سِفَ دَنِيّلِ نُن عَ بٌورٍيٍ قٍندٍ عَلَكٌ عٍ شَ عٍ قَن قَشَ.
14مَنفّ كَنتَمَيٍ شُنيِ عَرِيٌكِ تٌ مِنِ بَبِلْن لْننِلَيٍ قَشَدٍ،
15دَنِيّلِ نَشَ عَ مَشْرِن مَيَندِ رَ، «مُنقٍ رَ مَنفّ يِ يَامَرِ شْرْشْي مْولِ قِشِ؟» عَرِيٌكِ نَشَ نَ تَفِ رَبَ دَنِيّلِ بّ.
16نَ تّمُي دَنِيّلِ نَشَ سِفَ مَنفّ يِرٍ، عَ قَ عَ مَيَندِ عَ شَ تّمُي ندٍ قِ عَ مَ عَلَكٌ عَ شَ نْ نَ شِيٍ نُن عَ كُي عِقٍ قَسَرِدٍ عَ بّ.
17دَنِيّلِ نَشَ سِفَ عَ شْنيِ، عَ يِ قٍ بِرِن مَسٍن عَ بٌورٍ شَنَنِيَ، مِكَيٍلِ، نُن عَسَرَيَ بّ.
18عَ نَشَ عَ قَلَ عٍ بّ، عٍ شَ كٌورٍ عَلَ مَكُلَ عَ شَ كِنِكِنِ عٍ مَ، عَ شَ يِ فُندٌ مَسٍن عٍ بّ، عَلَكٌ دَنِيّلِ، عَ بٌورٍيٍ، نُن بَبِلْن لْننِلَيٍ بِرِن نَشَ قَشَ.
19نَ كْي رَ، عَلَ نَشَ نَ شِيٍ شَ فُندٌ مَسٍن دَنِيّلِ بّ لَامَتُنيِ رَ. دَنِيّلِ نَشَ كٌورٍ عَلَ تَنتُ
20يِ مَسٍنيِ رَ، «عَلَ شِلِ شَ تَنتُ تّمُي بِرِن، دَن مُ نَ نَشَن مَ،
21بَرِ مَ عَ تَن نَن فبٍ نَ قٍ كٌلٌنيِ نُن سّنبّ رَ. عَ تَن نَن وَشَتِ نُن عَ كّحَ مَسَرَ مَ. عَ تَن نَن مَنفّيٍ بَمَ، عَ تَن نَن مَنفّيٍ رَ سَبَتِمَ. عَ لْننِ قِمَ لْننِلَيٍ مَ، عَ شَشِلِ قَنيِ قِمَ شَشِلِمَيٍ مَ.
22عَ فُندٌ تِلِنشِ مَكّنّنمَ، عَ قٍ نْشُنشِ رَ مِنِمَ نَءِيَلَنيِ رَ.
23ﭑ بٍنبَيٍ مَرِفِ عَلَ، ﭑ عِ مَتْشْمَ، ﭑ عِ تَنتُمَ، لْننِ نُن سّنبّ شَ قٍ رَ عِ نَشَن قِشِ ﭑ مَ. عِ بَرَ ﭑ نَكٌلٌن قٍ مَ، مُشُ نَشَن مَشْرِنشِ عِ مَ، عِ بَرَ مُشُ رَكٌلٌن مَنفّ شَ شِيٍ رَ.»
24نَ تّمُي دَنِيّلِ نَشَ سِفَ عَرِيٌكِ يِرٍ، مَنفّ يَامَرِ قِ نَشَن مَ عَ شَ بَبِلْن لْننِلَيٍ قَشَ. عَ نَشَ عَ قَلَ عَ بّ، «عِ نَشَ بَبِلْن لْننِلَيٍ قَشَ. عِ شَ ﭑ مَتِ مَنفّ شْنيِ، ﭑ شَ عَ شَ شِيٍ تَفِ رَبَ عَ بّ.»
25عَرِيٌكِ نَشَ دَنِيّلِ مَتِ مَنفّ يِرٍ كٍرٍن نَ، عَ قَ عَ قَلَ عَ بّ، «مَنفّ، ﭑ بَرَ يُدَيَكَ ندٍ تٌ نَ مِشِ سُشُشِيٍ يَ مَ، نَشَن نْمَ عِ شَ شِيٍ تَفِ رَبَدٍ.»
26مَنفّ نَشَ دَنِيّلِ مَشْرِن، نَشَن شِلِ بٍلٍتٍسَسَرِ، «عِ تَن نْمَ ﭑ مَ شِيٍ نُن عَ كُي تَفِرَبَدٍ ﭑ بّ؟»
27دَنِيّلِ نَشَ مَنفّ يَابِ، «مَنفّ، عِ قٍ نْشُنشِ نَشَن مَشْرِنشِ لْننِلَيٍ، سٍمَتٌي، كَرَ مْشْييٍ، نُن مَندُرُلَيٍ مَ، عٍ مُ نْمَ نَ تَفِرَبَدٍ.
28كْنْ عَلَ، نَشَن نَ كٌورٍ مَ، عَ تَن نَن نْمَ قٍ نْشُنشِيٍ مَكّنّندٍ. عَ بَرَ مَنفّ نٍبُكَدَنسَرِ رَكٌلٌن نَشَن قَمَ رَبَدٍ. عِ شَ شِيٍ نُن عِ شَ لَامَتُنيِيٍ نَن يَ، عِ نَشَن تٌشِ عِ شَ سَدٍ مَ.
29مَنفّ، عِ تٌ عِ سَ، عِ نَشَ عِ مَحْشُن قٍيٍ مَ، نَشٍيٍ قَمَ رَبَدٍ. نَ كُي، نَشَن قٍ نْشُنشِيٍ مَكّنّنمَ، عَ بَرَ عِ رَكٌلٌن قٍيٍ مَ نَشٍيٍ قَمَ رَبَدٍ.
30شَ يِ قٍ نْشُنشِيٍ بَرَ مَكّنّن ﭑ بّ، نَ مُ رَبَشِ شّ بَرِ مَ ﭑ مَ لْننِ تٌ فبٌشِ بٌورٍ فبٍ بّ. يِ بَرَ مَكّنّن ﭑ بّ عَلَكٌ مَنفّ شَ نَ كُي كٌلٌن عَ نَشَن مَحْشُنشِ عَ شَشِلِ مَ.»
31«مَنفّ، عِ بَرَ فّمّ مَسٌلِشِ بٍلٍبٍلٍ تٌ عِ شَ لَامَتُنيِ كُي. عَ نُ تِشِ عِ يَ رَ، عَ نُ يَنبَقٍ، عَ نُ مَفَاشُ.
32عَ شُنيِ نُ يَءِلَنشِ شّيمَ رَ، عَ كَنكٍ نُن عَ بّلّشّ فبٍتِ رَ، عَ قُرِ نُن عَ تَبٍ يْشُي رَ،
33عَ بّلّنيِ وُرٍ رَ، عَ سَنيِ وُرٍ نُن بّندّ رَ.
34عِ نُ عَ مَتٌقٍ تّمُي نَشّ، فّمّ ندٍ نَشَ عِبْو، كْنْ عَدَ مَ بّلّشّ شَ مُ عَ بْوشِ. فّمّ عِبْوشِ نَشَ سِن نَ فّمّ مَسٌلِشِ سَنيِ مَ، نَشَن نُ يَءِلَنشِ وُرٍ نُن بّندّ رَ. عَ نَشَ عٍ عِ وُرُ.
35وُرٍ يٌ، بّندّ يٌ، يْشُي يٌ، فبٍتِ يٌ، شّيمَ يٌ، نَ بِرِن نَشَ عِوُرُ، عَ لُ عَلْ سَنسِ شْرِ قٍنتَ لٌنيِ مَ، قٌيٍ نَشَن قَمَ سٌفٌقُرٍ رَ. كْنْ فّمّ نَشَن سِنشِ فّمّ مَسٌلِشِ مَ، نَ نَشَ قِندِ فٍيَ بٍلٍبٍلٍ رَ، عَ بْشِ بِرِن نَقٍ.»
36«شِيٍ نَن نَ كِ. يَكْسِ مُشُ شَ عَ تَفِرَبَ مَنفّ بّ.
37مَنفّ، مَنفّيٍ شَ مَنفّ نَ عِ تَن نَ، بَرِ مَ كٌورٍ عَلَ نَن نَ مَنفّيَ قِشِ عِ مَ سّنبّ نُن بِنيّ رَ.
38عَ تَن نَن عِ دْشْشِ مِشِ، سُبٍ، نُن شْنِ بِرِن شُن مَ. عَ بَرَ نَ نْي قِ عِ مَ. نَ نَن نَ كِ، عِ تَن نَن نَ شّيمَ شُنيِ رَ.
39عِ نَ دَنفِ، مَنفّيَ فبّتّ كٍلِمَ نّ نَشَن سّنبّ شُرُن عِ بّ. نَ دَنفِ شَنبِ، مَنفّيَ سَشَن ندٍ نَشَن لُمَ عَلْ يْشُي، نَ قَن قَمَ نّ دُنِحَ بِرِن يَمَرِدٍ.
40مَنفّيَ نَانِ ندٍ نَن قَن قَمَ، نَشَن شْرْشْ عَلْ وُرٍ. وُرٍ سٍ بِرِن بُتُشُنمَ كِ نَشّ، نَ مَنفّيَ قَن عَ بٌورٍيٍ بُتُشُنمَ نَ كِ نّ.
41عِ بَرَ عَ سَنيِيٍ نُن عَ سَنسٌلٍيٍ تٌ. عٍ رَقَلَشِ وُرٍ نُن بّندّ مَسُنبُشِ نَن نَ. نَ نَن عَ مَسٍنشِ لَنيِ مُ لُمَ نَ مَنفّيَ كُي. كْنْ سّنبّ ندٍ تَن لُمَ نّ نَ مَنفّيَ كُي عَلْ نَ وُرٍ شْرْشْي عَ مَسٍنمَ كِ نَشّ.
42سَنسٌلٍ نَشٍيٍ يَءِلَنشِ وُرٍ نُن بّندّ رَ، عَ مَسٍنمَ نّ عَ نَ مَنفّيَ سّنبّ فبٌ، كْنْ سّنبّ يٌ مُ عَ رَ يِرٍ ندٍيٍ.
43عِ بَرَ وُرٍ نُن بّندّ مَسُنبُشِ تٌ، نَ قِندِشِ نَ مِشِيٍ نَن نَ، نَشٍيٍ لَنيِ شِرِ مَ عٍ بٌورٍ تَفِ، كْنْ نَ لَنيِ مُ شِرِ مَ عَ قَنيِ رَ، عَلْ وُرٍ نُن بّندّ مُ عَ بٌرٍ سُشُمَ عَ قَنيِ رَ كِ نَشّ.»
44«نَ مَنفّيٍ شَ وَشَتِ، كٌورٍ عَلَ مَنفّيَ ندٍ رَ مِنِمَ نّ نَشَن مُ كَنَمَ عَبَدَن. نَ مَنفّيَ مُ لُمَ حَمَ فبّتّ شَ يَامَرِ بُن مَ. عَ قَمَ نّ نَ مَنفّيَ بِرِن عِوُرُدٍ. عَ مُ كَنَمَ عَبَدَن.
45نَ كُي عِ بَرَ نَ فّمّ تٌ، نَشَن كٍلِشِ فٍيَ مَ كْنْ مِشِ بّلّشّ شَ مُ عَ بْوشِ. نَ فّمّ بَرَ وُرٍ، يْشُي، بّندّ، فبٍتِ، نُن شّيمَ عِوُرُ. عَلَ شُنفبٍ بَرَ مَنفّ رَكٌلٌن يِ قٍيٍ مَ نَشٍيٍ قَمَ رَبَدٍ. يِ شِيٍ نْندِ يَتِ نَن عَ رَ. ﭑ نَشَن بِرِن تَفِرَبَشِ عِ بّ، عِ لَنمَ عِ شَ لَ عَ رَ.»
46نَ تّمُي مَنفّ نٍبُكَدَنسَرِ نَشَ عَ يَتَفِ رَقٍلٍن بْشِ مَ دَنِيّلِ بُن مَ. عَ نَشَ يَامَرِ قِ عَ سّرّشّ نُن سُرَيِ شَ بَ عَ بّ.
47مَنفّ نَشَ عَ مَسٍن دَنِيّلِ بّ، «وٌ مَرِفِ عَلَ شُنفبٌ عَلَيٍ بِرِن بّ، عَ تَن نَن نَ مَنفّيٍ بِرِن مَرِفِ رَ. عَ فُندٌي مَكّنّنمَ، عَلْ عَ يِ فُندٌ مَكّنّنشِ عِ بّ كِ نَشّ.»
48مَنفّ نَشَ دَنِيّلِ بِنيَ، عَ نَاقُلِ فبٍفبٍ قِ عَ مَ. عَ نَشَ عَ قِندِ شُنيِ رَ بَبِلْن بْشِ نُن لْننِلَيٍ بِرِن شُن مَ.
49دَنِيّلِ نَشَ مَنفّ مَشَندِ عَ شَ عَ لُ سَدِرَكِ، مٍسَكِ، نُن عَبٍدِنٍفٌ قَن شَ مَنفّ وَلِ رَبَ بَبِلْن بْشِ مَ. دَنِيّلِ نَشَ قِندِ مَنفّ نٍبُكَدَنسَرِ رَ سِمَ رَ.
