Cânticos dos Cânticos 6

1

2

3

4

5

6

7

8

¹Ne kuzàgwer wanuwi ipuràg eteahy wera'u ma'e ne. Ewazar ko ureze'eg urepuranu haw nehe. Ma'e pe neremiamutar katu oho. Ma'enugar pe rupi ihon a'e. Urupytywà putar hekar haw rehe ure nehe.

²Heremiamutar katu oho ma'etymaw pe. Oho ma'etymaw hyàkwegatu ma'e pe. Wiko a'e pe weimaw àràpuhàràn hawitu ma'e wapoz pà. Opo'o ma'eputyr iri her ma'e iko a'e pe no.

³Aiko heremiamutar katu izar romo ihe. Heremiamutar katu wiko hezar romo a'e no. Weraha weimaw àràpuhàràn hawitu wapoz pà ma'eputyr iri her ma'e wainuromo wà.

⁴Heremiamutar katu, nepuràg eteahy tawhu Zeruzarez ài ne. Eremur kar teko nezeupe tawhu Xiza ài. — Kwa, ipuràg eteahy a'e mokoz tawhu wà, i'i teko wà. Ereiko a'e tawhu wazàwe.

⁵Epytu'u herehe neme'e re nehe. Nereha heputupykahy a'e wà. Ne'aw penopenogaw nuzawy kwaw àràpuhàrànete imono'og pyrer wà. Wezyw wà waiko ywytyruhu Zireaz ywy rehe har wanuwi wà.

⁶Neràz xigatu àràpuhàràn hawitu ài wà. Wazar omonohok wanawer wanuwi. A'e re umuzahak wà. Xigatu wà kury. Ni pitài neràz nu'ar kwaw nezuru wi wà. Uzuawygatu wà.

⁷Neruwa imuma'ema'e pyrer heny katu pàn neruwa ipykaw ikupe kutyr.

⁸Tuwihawete romo aiko. Heta ru'u 60 heremireko ihewe wà. Heta ru'u 80 heremirekoagaw ihewe wà no. Heta tetea'u kuzàwaza heremireko romo heko wer ma'e wà.

⁹Xo pitài kuzà zo azamutar katu ihe. Ikatuahy pykahu ài. Naheta kwaw amo tazyr tu pe. Ihy uzamutar katu a'e. Kuzà paw ume'e heremiamutar katu rehe wà. — Hurywete a'e, i'i izupe wà. Kuzà tuwihawete hemireko a'e wà, hemirekoagaw a'e wà no, uze'egatu hehe wà.

¹⁰Mon aipo a'e, i'i izupe wà. — Nuzawy kwaw kwarahy ihem mehe har. Ipuràg eteahy zahy ài. Uhyape katu kwarahy ài. Teko hurywete a'e mokoz ywak rehe har wanexak mehe wà. Heny katu ywak ài, zahytata pupe tynehem ma'e ài.

¹¹Aha amen tyw pe ihe, ma'e hezuz romo ma'e kwer ywyàpyznaw rehe har wanexak pà. — Uwà 'yw huwer aipo, a'e hezeupe. — Homà 'yw iputyr aipo, a'e hezeupe.

¹²Aryryryryz iteko ihe. Erezeamutar katu kar ihewe. Hepuruamutar katu wer nerehe. Ywyramawa heraha har iho wer zeàmàtyry'ymawhu pe na'arewahy a'e. Nezewegatete heho wer newe tàrityka'i no.

¹³Ezewyr nehe, ezewyr nehe, Xuràm parer. Ezewyr nehe, ezewyr nehe. Urepurexak wer nerehe nepynyk mehe ure. Kuzà Màràzàwe tuwe pepuruexak wer herehe imen ma'e ràm ipynykaw iapo mehe.