Cânticos dos Cânticos 2

1

2

3

4

5

6

7

8

¹Aiko ma'eputyr hozà her ma'e Xarom ywy rehe har romo ihe. Aiko ma'eputyr iri her ma'e ywyàpyznaw rehe har romo no.

²Heremiamutar amogwer kuzà wainuinuromo a'e, nuzawy kwaw ma'eputyr iri her ma'e xu wainuinuromo har a'e.

³Heremiamutar amogwer awa wainuinuromo a'e, nuzawy kwaw màxà 'yw amo ywyra ka'a pe har wainuinuromo a'e. Herurywete izywa rehe hereko mehe. Hemumuràgaw nuzawy kwaw hete katu ma'e ihewe.

⁴Hereraha ipupyaikaw pyrer pupe mynykawhu iapo haw pe. A'e pe uruzemono urezeamutar katu haw pe.

⁵Perur uwà imuxinig pyrer ihewe nehe. Nezewe mehe hekàgaw uzewyr putar ihewe nehe. Perur màxà ihewe hekene'o haw ihewi imuhem kar pà nehe. Ta'e urezeamutar katu awer hemukàzym kar tària'i a'e.

⁶Omono opo ahurehe har heàkàg iwy pe. Heàzuwàn opo awyze har pupe.

⁷Kuzà Zeruzarez pe har wà, pemume'u ko ma'e ihewe nehe. Pemume'uahy ko ma'e ihewe nehe. Pemume'u arapuha hehaite ma'e kor zàwenugar her ma'e nehe. Pemume'u arapuha kazer her ma'e rehe nehe. — Nuruzapo kwaw ma'e pemupytu'u kar pà pezeamutar katu re nehe, peze nehe.

⁸Aenu heremiamutar katu teko ize'eg mehe ihe. Ur iko na'arewahy a'e kury. Wezyw iko ywytyruhu wi. Uzàn wà iko ywytyr wanehe.

⁹Heremiamutar nuzawy kwaw arapuha kazer. Nuzawy kwaw arapuha kor ra'yra'i. Heremiamutar wiko pe pe katu pe ureràpuz huwake. Ume'e iko ipupe ukenaw rupi. Ume'e iko herehe ipari haw rupi.

¹⁰Heremiamutar uze'eg iko ihewe. Awa Ezur kury, heremiamutar. Ezur herupi nehe, heremiamutar.

¹¹Tuwixàgaw uhem oho. Àmàn upik oho.

¹²Ma'eputyr uzexak kar kaiwer pe. Zanezegar haw 'ar uhem kwez kury. Teko wenu pyku'i kaiwer rehe waze'eg mehe wà.

¹³Pi 'yw i'a kwer uzypyrog iazu pà kury. Uwà 'yw rehe heta iputyr. Hyàkwegatu. A'e rupi, ezur nehe, heremiamutar. Ezur herupi nehe, heremiamutar.

¹⁴Ereiko pykahu itawokaw pupe uzemim ma'e ài. Exak kar neruwa ihewe nehe. Tuwe uruenu neze'eg mehe ihe nehe. Ta'e neze'eg hete katu a'e xe. Neruwa ipuràg eteahy a'e no.

¹⁵Pepyhyk awara pe wà nehe. Pepyhyk awara'yr pe wà nehe. Pemupytu'u kar uwà tyw zaneremitygwer imuaiw 'ym mehe we pe wà nehe. Iputyr a'e kury.

¹⁶Aiko heremiamutar izar romo ihe. Wiko hezar romo a'e no. Weraha weimaw àràpuhàràn hawitu ma'e ma'eputyr iri her ma'e wainuinuromo a'e wà. U'u kar ka'api'i wanupe a'e,

¹⁷ku'em mehe we ipytunaw iho 'ym mehe we a'e. Heremiamutar, ezewyr na'arewahy nehe. Ezàn ezuwà kazer ài nehe, arapuha kor ra'yra'i Meter ywytyr rehe har ài nehe.