Buka Linge 81:2-16

²Huluvia na linge uto ma kau nia hulu ghalevu: te manilu na rongoviana.

³Lovua na tavuli ni savukolu: tana torogha ni vula, maia ghua tana vovogho.

⁴A eni gaia na vetena ni Israel: ma nina arevaghi a God ta Jacob.

⁵Gaia te hera na vure ni Israel na vetena keri, Tana bona te suravia na komu i Egypt.

⁶Inau tu rongovia na talama na manga keha te ghaghua, “Inau ku huia vanighau na hahala te mavatighau: mu ku hangaghau ta nimiu na lutu vahola.”

⁷Lokana na gunaguna tau holou mu volaghau. Tana maraghata ma na viviha tu tala mai, igaa nigua na vatei polo. Inau tu tabotaboghau i Meribah, tana bona tau nia kokoe na beti te taho igaa.

⁸Ghau kulagu na vure, kau rongovia na bosagu: Israel, e liogu ngangata ko rongovia mai!

⁹Kau bei holohabaa siki god keha. Kau bei nia kikinima didira god vana voo.

¹⁰Inau a Lord, nimiu God: tu lavihorughau mai Egypt, Kau hangavi utoi na mangamiu, mu ku kutighau nia na lei totobo uto.

¹¹Hauvaa, mara mua rongovia na bosamu na lei kulagu na vure: Israel te mua taonia nigua na vetena.

¹²Keri ke, ge u sanira ga vamua: ma kara tona taonia na liodira.

¹³E liogu sughua kara rongovia na bosagu, kulagu na vure! Me liogu sughua ghua kara sakutua taoniu!

¹⁴Keri ke, ge ku mina kuku lagavulera ghadira na kana! Mu ku pisura ghadira na levunimate!

¹⁵Gaira tara niu sika kara kikinima vaniu nia a Lord vamua, ma kara lavia na totoro ke va me vaa.

¹⁶Inau ku kutighau nia na lei puku ni vanga: mu ku mu inuinughau nia na midua ni talu.