Salmos 81:2-16

²Le gul-la, ne le capa xídedau'. Le quinne xrtan da con zríadi'i na du, ne da dxúl-lale̱nle.

³Le gucuezre luzu da dxulucuezre̱' gate naca beu' dxe'ene, da naca na zra nuzúadxu gundxu laní lá'azxa.

⁴Naca na tu da dxun na ba xen xelún benne' Israel ca', da bdxixruj bea Dios xelún zri'ine zre sua Jacob.

⁵Bzue̱' na ca tu da gulé'e lau na zri'ine zre sua José gate beledxúaje̱' lu xe̱zr la xu Egipto, naga benda' tu xrtizra' bénneache da quebe guxéajni'ida'.

⁶Gunná Dios: “Begúa' xua' da buludé̱'e̱' benne' chia' ca'. Bsezrá'a benne' chia' ca' da zi'i.”

⁷Lu da ba xa' da guzúale, bláwizrale neda', na' bselá' le'e. Beche̱ba' chee̱le naga nagacha' lu beuj bza gate na' gunné̱le̱'e̱ guziu', na' bxua' ájala gunle naga zaj de̱ beaj nisa zaj nazí le Meriba.

⁸Le xene, bénneache chia', na' gusízreda' le'e. Le'e, benne' Israel, che dxaca lázrele sile da dxennía',

⁹quebe gápale tu dios chee̱ benne' xula, ne quebe guzú zríbele lau tu dios chee̱ benne' zitu'.

¹⁰Neda', Xránale, naca' Dios chee̱le. Bebéaja' le'e lu xe̱zr la xu Egipto. Le salaj dxú'ale, na' gunna' da gágule.

¹¹Bénneache chia' quebe belúe lazre̱' da gunnía'. Benne' Israel ca' quebe gulaca lazre̱' xelezí' lu ne̱'e̱ neda'.

¹²Chee̱ le̱ na' bsana' benne' ca' lawe' da gulaque̱' lázxdau zide'. Belune̱' ca da guléquene̱' xrlátaje.

¹³Che la gulebé' gunne xue bénneache chia' chee̱ da gunnía', ne che la belún benne' Israel ca da ble'eda' le̱',

¹⁴na' chadite̱ bzria xi'a benne' guledábague̱' le̱', ne gudíl-lale̱na' benne' guledíl-lale̱ne̱' le̱'.

¹⁵Che la belún benne' Israel caní, na' benne' ca' dxelecuídene̱' Xránadxu buluzúe̱' xrtizre̱', (san chadía chacanna zaj nabague̱' zria),

¹⁶na' Dios gune̱' xelawe̱' zrua' xtila cháwedau', ne gune̱' xelélajquezne̱' nen bzrína'dau'.