SALAMO 81:2-16

²Ane a ladaia isi, tareko a hareḡedia; gitara bona hatai-hatai ḡauna badana danu a hatai.

³Hua matamatana negana ai kibi a hiriria, hua e idoi negana ai danu, eda aria dinana bunai.

⁴Badina be taravatu bunai Israel ena; Iakob ena Dirava ena haheḡani bunai;

⁵ena hahediba herevana Iosef e henia, Aigupto ai e loa eva-eva negana ai. Asi dibagu gadona ta na kamonaia;

⁶Maduna na paḡamu amo na abia oho, imamu na bosea amo na kokidia.

⁷Emu hisihisi ai o boi henigu, bena na hamaurimu; guba rahu-rahu ena gabu hehunina ai na haere henimu, Meriba ena ranu gabudia ai na tohomu. (Selah)

⁸Egu bese taumui e, a hakala, baina sisiba henimui; Israel e, boma kamonai henigu bema namo.

⁹Bogaragimui ai dirava idauna ta basine noho, idau taudia edia dirava ta basio toma henia diho.

¹⁰Lau binai Iehova, emui Dirava, Aigupto amo na hakaumui lasi. Udumui a haḡadia, bena baina hahonudia.

¹¹A egu bese taudia na gadogu asie kamonaia; Israel ese e dadaraigu.

¹²Taunabunai na negedia, sibodia edia lalo-auka bae badinaia, sibodia edia lalo-hadai karadia bae kara.

¹³Egu bese taudia bema kamonai henigu bema namo; Israel na egu dala ai bema raka bema namo.

¹⁴Bena idia inaidia bama hadareredia haraga, e tuari henidia taudia bama tuari henidia.

¹⁵Iehova e inai heniamu taudia na ia vairanai bema igo diho; matadia ihakanidia bema hesiriu hanaihanai.

¹⁶Uit namo-hereana amo bama ubumui, bada-ranuna nadi amo e abiamu na bama ubulaimui.