APOSETOLO EDIA KARA 3:9-24

⁹Taunimanima ibounai idia itaia, ia raka bona Dirava ia hanamoa noho.

¹⁰Bona idia diba, ia be Dubu Helaga ena iduara ladana “Namo Herea” dekenai ia helai noho bona moni ia noinoi tauna, bona idia hoa dikadika ia dekenai ia vara gauna dainai.

¹¹Aena ia namo tauna ese Petero bona Ioane ia dogoatao noho. Taunimanima ibounai be mai hoa bada danu idia heau lao idia dekenai. Unai gabu ena ladana be “Solomona ena Dehe.”

¹²Vadaeni Petero ese idia ia itaia neganai, taunimanima dekenai ia hereva, ia gwau, “Israela taudia e, badina dahaka inai gau dekenai umui hoa bada? Badina dahaka ai umui itaia noho? Umui laloa aiemai siahu bona aiemai namo dekenai inai tauna ai hanamoa, ma ia raka, a?

¹³Aberahamo bona Isako bona Iakobo edia Dirava, bona iseda sene taudia edia Dirava ese iena hesiai tauna Iesu ia hanamoa vadaeni, to umui ese Pilato ena imana dekenai umui atoa, bona Pilato ia ura ruhaia neganai umui ura lasi ia.

¹⁴Helaga bona Kara Maoromoaro Tauna umui ura lasi, to Pilato dekenai umui noinoi, ala-ala tauna ia ruhaia umui dekenai.

¹⁵“Mauri ia havaraia Tauna be umui alaia ia mase, to Dirava ese mase dekena amo ia hatorea isi vadaeni, inai gaudia dekenai ai be itaia bona diba taudia.

¹⁶Iena ladana ena siahu dekena amo inai aena dika tauna ese goada ia abia, inai tau umui itaia bona umui diba. Momokani, abidadama Iesu dekenai ese inai tau ia hanamoa vadaeni, umui ibounai emui vairana dekenai.

¹⁷“Lauegu varavara e, lau diba Iesu dekenai inai kara umui karaia badina be umui diba lasi dekenai. Emui lohia taudia danu be idia diba lasi.

¹⁸To Dirava ese guna iena peroveta taudia edia uduna dekenai ia hereva Keriso ese hisihisi do ia abia, bona hari inai hereva be ia momokani vadaeni.

¹⁹“Inai dainai umui emui lalona umui giroa, bona Dirava ese emui kara dika do ia kokia. Gabeai Lohiabada ese goada matamata do ia henia umui dekenai.

²⁰Bona Dirava ese Keriso umui dekenai do ia siaia mai, ia ese guna umui totona ia Abia Hidi Tauna, Iesu unai.

²¹To guba dekenai do ia noho, ela bona Dirava ese gau ibounai do ia karaia matamata, ia ese guna iena peroveta taudia helagadia edia uduna dekenai ia hereva bamona.

²²“Mose ese iseda sene taudia dekenai ia hereva, ia gwau, ‘Lohiabada emui Dirava ese peroveta tauna ta do ia siaia umui dekenai, emui varavara tauna ta, lau bamona. Ia gwauraia herevadia ibounai do umui kamonai.

²³Bona unai peroveta tauna idia kamonai henia lasi taudia ibounai be dohore idia kokia Dirava ena bese taudia dekena amo, bona do idia mase.’

²⁴Momokani, bona peroveta taudia ibounai danu, Samuela dekena amo ia mai bona hari, be inai dina idia gwauraia vadaeni.