Mantá Tanla 3:9-24

⁹Junni jeralela yaca quiralaquinue Diosica se tito nenaminca.

¹⁰Yaca quirato, yari Uraran Tamolante chumin jominheque tenhilainue. Lemosi calaca panhato chumin jominheque tenhilainue. ¿Niyaito manseinun? tilatinue. Tsantinato, duque wepananaminlanue.

¹¹Jancan jomin tsachiri Pédrobe Juánbeca cachurasanan, jeralela yalachica wepanato sujato layailainue. Salomonchi posto tinunte jera layailainue Diosichi yabi.

¹²Junni Pedro jera layainaminlaca quirato itsantinue: —Israelita tsachila, ¿niyaito inca wepanalainayun? tinue. ¿Ti quichun chiquilaca wepanato quiralaquinayun? tinue. Chiquilari in tsachica mansechun natiya sonban itolajoyoe tinue. Diosi cuwenta natiya itolajoyoe in jancan jomin tsachica jera manse suwachun.

¹³Chiquila tsanlaquitiyoe; Diosichi Nao tsanquee tinue. Diosi yachi Naochi duque mantá cuwanan, yari in jancan jominca manse suwae tinue. Aman Diosi chiquilachi matu to tatalaca, Abrahanbe, Isaabe, Jacóbobeca, aman yalaca Diosi wentenue yape yachi tsachila jolajosa. Junni nulachi tatalaca wentemin Diosi patsa Jesuchi mantá cuwaca joe. Junni tsan josanan nulari Jesuca cuwaponilaquee tinue yape yaca totelaquisa. Pilato miya yaca manlarichi tinasanan, nulari manlarisa carilaquitue tinue.

¹⁴Nulari Diosichi tsara sen tsachicari manlaritude! tito, tsachilaca toteminca manlaride! tilatie tinue.

¹⁵Sonnasa cariminca totesa carilaquee Jesucrístoca. Diosi mantimini yaca mansonhisa carinue tinue. Ya manson nenaminca chiquilari cacachi quiralaquiyoe tinue.

¹⁶Junni in jancan jomin tsachi ya Jesuca tennanue tinue. Jun tenchi Jesús yaca sonba wiruisa carinue tinue. ¿Inni jancan jomin tsachi joco? Aman Jesuca quereito, jera manseinue tinue. Jeralela quiranilaquede! tinue.

¹⁷Aman nulabe nulachi miyalabe Jesuca totesa cuwaponato, miitoto cuwapolaquee tinue. Junca mirayoe tinue.

¹⁸Aman jerale Diosichi mantate paminla matu mate pila chutenato, Jesucrístoca itsanque cuenta polarica jominlanue tinue: Diosi wenteca Cristo tinun tsachi padeseino jochunaeque chutelaquinue tinue. Junni Diosichi Pilabi tsantica josa, Diosiri jun tsannan isa carie tinue.

¹⁹Junni nulari jutsa quinunca telaquepoto, casan tala tenca mancalaquede! tinue. Diosibe cayailaide! tinue. Tsanlaquinari, Diosi nulachi jutsaca jera piyarichunae tinue. Miya Diosi nulaca pansi chusa carichunae tinue.

²⁰Junsi Jesucrístocanan numarile nechi manhereyanae tito, nulachica manherechunae tinue. Diosi yaca mantá tan suwaca joe yape nulachi tenchi Cristo tinun Miya josa.

²¹Tsan josanan, Jesucrístori tsainaleri camanjatuchunae. Casaleri Diosi jeraleca mansechunae tinue. Matunan Diosichi mantate seque paminlari junca cuenta polarica jominlanue tinue. Junni jera manseno fecári Jesucristo jamochinan cachuno jochunae tinue.

²²Matu to Moisés Jesucrístoca pila chutenue tinue. Ya pilabi israelítalabe itsanque cuenta quinue tinue: Miya Diosi israelítalachile nechi tsachi mancaca wenteto mantá tan suwachunaeque paca joe yape Diosichi mantate pasa. Ya tsachi Moisés cuwenta mantá tan jochunaeque paca joe tinue. Junni ya tsachi jano mate israelítala yachi fiquica jera seque meránola jochunae tie tinue.

²³Ya pacaca merátuchi timinlacari casticaquito toteno jochunae tie tinue.

²⁴Junni Diosichi mantate matu tote paminlanan cuenta polarilaquinue tinue Jesucristo nenano mate niyan jono jonunca. Casale matu to Samuel junca cuenta quinue; junte nechi jeralelanan jun tsanquenan cuenta quilaquinue tinue.