Aposol 3:9-24

⁹Ngan di tooltool le imot tikamata tina yo ipa inbe iyitmaka Maro ene nga,

¹⁰le nga titakrai welewele ye so yo pombe panga i, yesoo tikilla ngan ya in tool tani yo kanakana ngan iwurur dada koonoo ke bareme mai ke sungunu yo tiweta ye Dada Taunu Punu i, inbe igaugau pat le so ye di tooltool i.

¹¹Di tooltool le imot tilongo bingi ke tool tani le titakrai, inbe tidada a timan be man tikamata. Timan ngan tikamata yo iparama Pita ye Yowan a iye di tikododo ye kookoowoo ke bareme mai ke sungunu yo tiweta ye Kookoowoo ke Solomon i.

¹²Ngan Pita ikamata di tooltool tina yo tiyei nen nga, le nga iwete pang di nen, “Ai, ang di tooltool ke Isrel nga, ngan yelei a katakrai ye so yo pombe i nga? Inbe nga yelei a matamim ikenen yam amru nga? Ngan o lomim tar be amru gurana kiam am tapmam, ngan la le amyeii a ipa nga, too? Tiap! Too, o lomim tar be amru amtoo dada dook mata le imot yo Maro lono be amtoo nga, ngan la le amkarata a ipa nga, too? Tiap lapau!

¹³Bong Maro ke di sasa kiidi yo Apram ye Esaka ye Yakop, in la iyei nen i, a be nen ngan iyeie kapraingi ki yo Yesu i, in ene le ilo ete ke be di tooltool tipayiti. Ngan Yesu tani, in la kataru la di koi ki baedi a be tiraumate i. Le tikauu lo ye Pailot, ngan Pailot ikamata ngan taukan busunu le be ipamule a isi, bong ngan kawala murimim panga le kawete pang Pailot be tiraumate a imata.

¹⁴Yesu in tool noonoonoo tani yo Maro ipootoo panga ya taunu i, bong ngan kawala murimim panga, inbe katoro Pailot a kamangmang ye be ipadu tool dook tiap yo ke raumatenge di tooltool in a isi tana.

¹⁵Ngan tool tani yo be ikaua yepongo dook mata yo taukan motingi in paidi i, in la ang karaumate koot i. Bong ngan Maro ipamaditi mulu ye ni ke matenge. Le amru nga amkamata ye matamam ngan la amwetewete pang ye bingi ki nga.

¹⁶Amru nga amtara lomam medana pang Yesu, ngan la ye Yesu tani in ene nga, ngan iyeie tool tani yo kakamata a lomim galanga ye i, in le gurana mulu i. Yesu ya taunu la ipamede lomam nga, ngan la le ye lomam medana tani yo amtaru panga i, in la ikarata tool i a le dook mata ben tina yo nookoot nga kakamata ye matamim nga.

¹⁷“Ang di diek nga, ngan au i lok galanga be ang kaye di kuto maimai kiang, ngan lomim galanga dook tiap, ngan la le kayei dada nen pang Yesu nga.

¹⁸Bong mukot yege ni nga, ngan Maro iwete pang di Maro koonoo ki le imot be tiwete nen, be Kirisi tani yo ipootoo be si ikap di tooltool ki a ipamulu di i, in ole isolo masngana muku ngan. Ngan nen le dada yo nookoot kayeii pang Kirisi i, in iyei betanga ke Maro tina yo iwete ngan le itar kanono moolmool.

¹⁹Ngan nanga, ole kaportak lomim ye dada dook tiap kiang, inbe kamulu pang ye Maro, a be nen ngan igiri noonoo yo kiang nga.

²⁰Kumata le be kayei nen nga, ngan la be Tool Mai ikaua gurana paunu pang, inbe ole iwanga Kirisi yo ipootoo be si ipamulu di tooltool ki i, in pang. Ngan Kirisi tani yo Maro ipootoo pang i, in la Yesu i.

²¹Le Yesu tani in ole iyepe la malala ke Maro ngo, inbe inam ye lal yo Maro itaru be ole iyei so tina nga le imot a iportak le iyei paunu mulu ye i. Ngan ole iyei nen ben tina yo mukot yege ni nga, ngan ipamede betanga medana pang di tooltool yo ipootoo di panga ya taunu nga, inbe tikaua koonoo a tiwete nga.

²²Ngan le Mose iwete nen, ‘Maro yo Tool Mai kiang i, in ole itara tool kiang atu kataunu yang le iyei Maro koonoo pang dawa ben au i. Le kin katoo betanga ki le imot yo iwete pang nga.

²³Ngan kumata sei tool be ilongo betanga ke Maro koonoo tani in tiap nga, ngan ole Maro itirkede la diki le ke be iyepe kataunu ye di tooltool ki mulu tiap.’

²⁴“Mukot yege ye Maro koonoo yo Saumel i, in le ise ye di diene Maro koonoo kapala nga, ngan di le imot tiwetewete ye so yo nookoot pompombe nga.