AONEGA HEREVADIA 4:1-25

¹Egu natuna tau ibounai e, lau, emui tamana, egu hadibaia hereva do umui kamonai. Egu hereva edia anina do umui tahua, bona laloa kehoa do umui davaria.

²Badina be lau ese hadibaia hereva namodia, be umui dekenai lau henia noho. Egu hadibaia hereva do umui rakatania lasi.

³Lau be mero neganai, lau danu be mai egu tamana. Lau be egu sinana ena natuna tamona, bona ia ese lau ia lalokau henia bada.

⁴Unai neganai egu tamana ese lau ia hadibaia, ia gwau, “Egu hereva be oiemu kudouna dekenai do oi dogoatao goada. Egu oda hereva do oi badinaia, bona oi be do oi mauri.

⁵Aonega bona laloa kehoa do oi abia. Egu hereva do oi laloaboio lasi, bona idia dekena amo do oi raka siri lasi.

⁶Aonega do oi rakatania lasi, bona ia ese oi do ia naria. Aonega do oi ura henia, bona ia ese oi do ia gimaia.

⁷Gau badana momokani be aonega. Sedira do oi abia totona oiemu kohu, oiemu moni bona gau ibounai do oi negea haorea, to laloa kehoa do oi tahua bona abia.

⁸Aonega do oi ura henia, bona ia ese oi do ia hanamoa bada. Aonega do oi dogoatao auka, bona ia ese oiemu ladana do ia habadaia.

⁹Ia ese oi dekenai hairai, bona matauraia do ia henia.”

¹⁰Egu natuna e, kamonai, lau aonega, egu hereva do oi abia dae, bona oiemu mauri lagani do idia momo.

¹¹Aonega ena dala oi dekenai lau hadibaia vadaeni, bona noho mauri ena dala maorona dekenai, oi lau hakaua vadaeni.

¹²Bema mai aonega danu oi raka neganai, gau ta ese oiemu dala do ia koua lasi, bona do oi heau neganai do oi hekwakwanai lasi.

¹³Egu hadibaia hereva do oi dogoatao, do oi rakatania lasi. Inai diba do oi gimaia, badina ia be oiemu mauri ena badina.

¹⁴Kara dika taudia edia dala dekenai, do oi raka vareai lasi. Kerere taudia edia kara do oi karaia lasi.

¹⁵Unai edia dala dekena amo do oi siri, ia dekenai do oi raka lasi. Unai dala do oi rakatania momokani, bona oiemu dala dekenai do oi lao.

¹⁶Badina unai dika taudia idia mahuta diba lasi, ela bona kerere ta idia karaia vadaeni. Mahuta idia davaria lasi, ela bona tau ta idia hadikaia vadaeni.

¹⁷Kara dika bona dagedage, be edia aniani bona edia ranu bamona.

¹⁸To kara maoromaoro taudia idia raka noho dalana, be daba rere bamona. Edia dala ena diari be ia bada lao noho, ela bona dina tubua momokani ia hedinarai.

¹⁹Kara dika taudia edia dala, be dibura masemase bamona. Idia be idia moru noho, to idia hekwakwanai gauna idia itaia diba lasi.

²⁰Egu natuna e, egu hereva, be do oi kamonai henia namonamo.

²¹Oi naridia noho, oi dekena amo do idia boio garina. Oiemu kudouna lalonai, egu hereva do oi dogoatao noho,

²²badina idia davaridia taudia dekenai, inai aonega herevadia be mauri, bona idia ese tau ta ena tauanina, be idia hanamoa noho.

²³To gau badana momokani, oiemu kudouna, oiemu laloa ia havaraia gauna, do oi naria namonamo, badina be oiemu laloa dekena amo, oiemu mauri be ia heau noho.

²⁴Hereva gagevagageva be, oi dekena amo do oi atoa siri. Hereva koikoi be nega ta do oi gwauraia lasi.

²⁵Oiemu matana dekena amo. vairana kahana do oi itaia noho. Mai laloa maoromaoro danu gau do oi itaia noho.