AONEGA HEREVADIA 15:5-26

⁵Bema oiemu tamana ena sisiba hereva oi kamonai henia lasi, oi be kavakava, to bema iena matakani kara oi abia dae, oi be aonega.

⁶Kara maoromaoro tauna ena ruma dekenai kohu momo idia noho, to kara dika taudia be nega dikadia neganai, edia kohu idia boio.

⁷Aonega taudia ese diba namona idia habadaia noho, to kavakava taudia ese unai bamona idia karaia lasi.

⁸Taunimanima namodia idia guriguri neganai, Lohiabada ia moale noho, to kara dika tauna ena boubou gauna, be Lohiabada ese ia ura henia lasi momokani.

⁹Lohiabada ese kara dika taudia edia dala, dekenai ia badu noho, to kara maoromaoro taudia ia lalokau henidia noho.

¹⁰Dala maorona ia rakatania tauna ese, matakani auka do ia davaria. Sisiba dekenai ia badu tauna be do ia mase.

¹¹Mase gabuna bona hel gabuna danu, be Lohiabada ena vairana dekenai idia hedinarai noho. Unai dainai edena bamona tau ta ese, iena kudouna ena laloa Dirava dekena amo ia hunia diba?

¹²Hekokoroku taudia be, idia ura lasi haida ese idia sisiba henidia. Idia ese aonega taudia edia sisiba idia tahua lasi.

¹³Tau ena kudouna ia moale neganai ia kiri noho, to lalohisihisi ese, unai tau ena lauma ia hamanokaia noho.

¹⁴Laloa kehoa tauna ese aonega ia tahua noho, to kavakava taudia be, kavakava sibona dekenai idia moale noho.

¹⁵Iena hisihisi ia laloa noho tauna, ena mauri dinadia ibounai be dika, to kudouna dekenai ia moale tauna ese, nega ibounai iena noho ia moalelaia noho.

¹⁶Do oi ogogami, bona Dirava do oi gari henia noho be namo, to do oi kohu momo, bona mai oiemu hekwakwanai be dika.

¹⁷Raisi sibona, oiemu lalokau taudia danu do oi ania be namo, to vamu namo herea, badu noho taudia danu do oi ania be dika.

¹⁸Badu haraga tauna ese heai ia havaraia noho, to haheauka tauna ese maino ia havaraia noho.

¹⁹Lahedo tauna ena dala, be mai hekwakwanai gaudia momo danu, to gaukara momokani tauna ena dala, be namo bona mai daradara lasi.

²⁰Aonega merona ese iena tamana ia hamoalea noho, to kavakava tauna ese iena sinana ia negea noho.

²¹Kavakava taudia be edia kavakava dekenai idia moale noho, to aonega taudia ese kara maoromaoro idia karaia noho.

²²Sisiba momo do oi tahua noho, bona do oi kwalimu, to sisiba do oi abia lasi neganai, do oi moru.

²³Iena haere maorona ese tau ta do ia hamoalea, bona ena nega korikori dekenai, hereva namona ta ia gwauraia, be namo bada!

²⁴Aonega tauna ese mauri dekenai ia lao dalana, ia raka daekau noho. Ia be mase dekenai ia lao dalana, ia raka diho noho lasi.

²⁵Lohiabada ese hekokoroku tauna ena ruma ia veria diho noho, to vabu ena tano do ia naria namo herea.

²⁶Lohiabada ese kara dika taudia edia laloa gaudia, be ia badu henia noho, to laloa maoromaoro taudia edia hereva, be Lohiabada ese ia moalelaia noho.