Aisaia 55

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Hina Gode da amane sia:sa, “Nowa da hano hanai galea, misa! Hano na misa! Amola, dilia muni hame gagui dunu! Gagoma bidi lamusa:, misa! Waini hano amola bulamagau dodo maga:me bidi lamusa:, misa! Amo lama:ne, dilia da muni hame imunu.

²Dilia da abuliba:le, hame sadisu liligi, amo lamusa:, dilia muni udigili ha:digisala:? Dilia abuliba:le dilia hawa: hamosu muni bidi lai amo udigili ha:digili, bu ha:i bagade ba:ma:bela:? Na sia: nabima amola nabawane hamoma! Amasea, dilia da ha:i manu baligili noga:idafa amo manu.

³Na fi dunu! Nabima! Amola Nama esalusudafa lama:ne misa. Na da eso huluane dialalalumu gousa:su dilima hamomu. Amola hahawane iasu hou, Na musa: Da:ibidima imunu ilegei, Na da amo dilima imunu.

⁴Na hamobeba:le, e da fifi asi gala fi ilima hina bagade amola ouligisu dunu ba:i. Amola e da Na gasa amoga hawa: hamobeba:le, Na da Na gasa amo fifi asi gala, ilima olelei.

⁵Wali dilia da ga fifi asi gala ilima, dilima misa:ne sia:mu. Musa: dilia da amo fi hame dawa:i galu, be wali ilia da dilima gilisima:ne, hehenane misunu. Na, Hina Gode, Isala:ili fi ilia Hadigi Gode, Na da amo hou huluane ba:ma:ne, hamomu. Na da dilima nodosu amola hadigi imunu.”

⁶Hina Gode da gadeneiba:le, Ema sinidigili, sia:ne gadoma.

⁷Wadela:i hamosu dunu da ilia wadela:i hou fisili, ilia wadela:i asigi dawa:su afadenema:mu. Ilia da ninia Gode, amo Hina Godedafa, Ema sinidigimu da defea. Bai Gode da asigisa, amola E da hedolo gogolema:ne olofosu dawa:.

⁸Hina Gode da amane sia:sa, “Na asigi dawa:su da dilia asigi dawa:su defele hame gala. Amola Na hou da dilia hou amoma hisu agoane gala.

⁹Muagado da osobo bagadega gadodafa gala. Amo defele, Na asigi dawa:su da dilia asigi dawa:su amoga baligili gadodafa gala.

¹⁰Na sia: da anegagi mugene amola gibu agoai gala. Ilia da muagado misini, osobo bagadega hano iaha. Ilia dabeba:le, ha:i manu da heda:sa, ninia hawa: bugima:ne amola ha:i manu moma:ne ba:sa.

¹¹Na sia: amola da agoaiwane gala. Na sia: sia:i, da Nama udigili sinidigimu da hamedei. Be Na sia: da Na ilegei huluane didili hamoi dagoi ba:mu.

¹²Dilia da Ba:bilone yolesili, hahawane gadili masunu. Na da amo moilai bai bagadega dili gadili oule masunu. Fedege agoane, goumi amola agolo ilia da gesami hea:mu, amola ifa huluane da hahawaneba:le, ilia lobo famu.

¹³Sogebi amoga wali gagaloba: fawane dialebe ba:sa, amoga ‘saibalase’ ifa heda:lebe ba:mu. Amola, aya: gaga:nomei sogebi amoga ‘medele’ ifa da heda:lebe ba:mu. Amo da eso huluane dialalalumu dawa:digisu olelesu agoane ba:mu. Na, Hina Gode, Na hamosu dawa:ma:ne, amo dawa:digisu olelesu da lelumu.”