1Rey-Ezequías deyob ega ibmar-soge itosgua, e-mor-yoid na siir-siir imaksad. Geb wile-itoged-mor yosad, degi, Bab-Dummadse-goled-negse geb naded.
2Degine, Rey-Ezequías, e-neg-dakdiid-Eliaquim, degi, ibmar-gusmalad-narmaked-Sebna, degine, dule-irwa-Bab-Dummadse-gormalad-sergan, wile-itoged-mor yoyoi, Amoz-machi-Bab-Dummad-gayaburba-barsoged-Isaíasʼse barmisad, adi, daknamalagar.
3Amar ega sogdapmalad: “Weyob Rey-Ezequías soged: ‘Emi-iba-naidi, suli-suli-itoleged-iba naid, sabsur-odurdakleged-iba naid, degine, bingeguleged-iba naid. Ar igi sikwi we-napnegse-aidesokalile, na ome e-abagan-nolloo naddae, deyob emi-iba naid.
4Bitigine, be-Bab-Dummad-Jehová, Asiria-sorda-daked-dummad-e-ibmar-sogsadi bela itosana gadin. Ar ade, e-dummad-Asiria-e-rey, Bab-Dummad-Dula-Maidgi dodoar-sunmakega barmiar gusad. Bitigine, be-Bab-Dummad-Jehová, we-dule-gayaburba-itosadba sabsur-odurdaksunnana gadin. Emide, Israel-dulemar-napi-gudimaladga be Bab-Dummadse gorsun.’ ”
5Rey-Ezequíasʼga-arbamalad Isaías-dakapmargu,
6Isaías ega sogsa gusad: “Weyob be-dummad-Ezequíasʼga be sogmalo: ‘Bab-Jehová weyob sogye: Be, Asiria-rey-e-maigan e-ibmar-soge-itosadgine, nue angi ise-yolegar sunmaksadgine, mer-be gwayo.
7Ani, an Senaqueribʼse gayaburba-isgana-warmakega an imakoed, adi, gannar e-yarse naegar. Geb agine es-suidgi oburgwemalaga an imakoed.’ ”
8Asiria-sorda-idued-e-dummad, Asiria-e-rey Laquis-neggweburgi-mai nadye wisguargu, balimakde gusad. Agine, Asiria-e-rey, Libna-neggweburgi bila-ononai dakdapid.
9Geb agine, Rey-Senaquerib wisgualid, Etiopía-dulemar-e-rey-Tirhaca, ebo bila-onogega egi daniye. Geb gannar Rey-Ezequíasʼse dule-gayaburba-berbemalad barmisad.
10Adi, ega sogega: “Judá-e-rey-Ezequías: ‘Be, mer be be-Bab-Dummadgi-bensulidse be yamolego, ar bega sokalir: Asiria-e-rey Jerusalén-neggwebur-suosurye.
11Ar be Asiria-e-reymar yarmar nue obelodii-gusadi nue-itodiid. Degite, ¿Ar bedi unni-san-onogo na be itosi?
12Ar an-babgan, Gozán-neggwebur, Harán-neggwebur, Resef-neggwebur, Edén-wagan Telasar-neggweburgi-bukwad obelosgusad. Degite, ¿e-bab-dummagan bendaksa be daksi?
13Deginbali, Hamat-dulemar-e-rey, Arfad-dulemar-e-rey, Sefarvaim-dulemar-e-rey, Hena-dulemar-e-rey, degine, Iva-dulemar-e-rey, gwen e-dulemar-bendaksurmogad.’ ”
14Degine, Ezequías, dule-gayaburba-berbemalad-abin garda susad, geb absosad. Geb a-sorbali, Bab-Jehováʼse-goled-negse-naded. Agine Bab-Jehová-asabin garda nallaa imaksad.
15Geb degi, Ezequías, Bab-Jehováʼse goted: “Bab-Jehováʼye Israel-dulemar-e-Bab-Dummadye, baliwiturmar-wagar-darbakegwad-abargi be negsemaid. Bebi unnila we napaneg-naid e-Bab-Dummadga gued. Be nibneg, degine, napneg, be nasiksad.
16Bab-Jehová nue wis be an-itoge. An-ibmar-soged be wis-itoge. Be anmargi ibmar-gunaid nue be dake. Senaquerib begi ise-gwisguar anga gayaburba-barmialidi, nue be itoge.
17”Bab-Jehováʼye, ar nabirid, Asiria-e-reymar we-yarmar, degi, e-napamar bela obelos gusad.
18E-bab-dummadyob-imaklemalad bela soogi ogumaksa gusmalad. Ar ade, bab-dummagansurmalad, unnila suar-sobarmaladid, degi, akwa-sobarmaladid. Ar we-ibmar dulemar sobsamaladid. A-ulale, bela obelosgusmalad.
19Emigindi, Bab-Jehová-anmar-Bab-Dummad, we-dulegi wis be anmar-bendake, adi, dulemar bela we-napneggi be-wisgumalaga, unnila bebi Bab-Jehová wargwenna Bab-Dummadga maiye.”
20Geb degi, Amoz-machi-Isaías, Ezequíasʼse weyob gayaburba barmisad: “Bab-Jehová Israel-dulemar-e-Bab-Dummad weyob soged: ‘Be anga Asiria-e-rey-Senaqueribʼgi, ibmar sogsadi, bela an be-itosye.’
21Bab-Jehová weyob Rey-Senaqueribʼnik sogsad: ‘Senaquerib, Siónʼginmaladi bai be-daksurmalad, begi dodomalad. Jerusalénʼginmalad wakite be-dakmargu, bega nono-ege-ege imakmalad.
22Senaquerib, ¿Doagi be isdar sunmaksa? ¿Doagi be ise-dodoar sunmaksa? ¿Doagi urwedgi be ibmar-sogsa? ¿Doa-abin san-dummarba be itosa? Ar be Israel-e-Bab-Dummad-Isligwalednik, isdar be sunmaksad.
23Bega gayaburba-berbemaladba angi ise-yolegar be sunmaksad. Senaquerib, weyob be sogsad: An-moli-ur-bila-onomaladgi Líbano-yar-dummagan-birgi an nakwisye. E-urwarmar-dummagan-bubukwadi, ani, an ei-siksa-nanaye. Degi, e-baryawarmar yeerdaklegwismaladi an bela immisye. Dukumalad-neg-dikasur-bukwadi, ei an bela wisgusye. Degine, e-sapi-dummagan-bukwadi, ei an bela wisgusbarye.
24Dule-baigan-yargi, ani an dii-yaamar osisye. A-dii, an gobsaye. An-nanasadgine, bela Egipto-diwarmar an odinnosye.’
25”Bab-Jehová weyob Rey-Senaqueribʼnik sogbalid: ‘Senaquerib, ¿ar be wissursi? Bato dikasurgus an we-ibmarmar imaksabinned. Bato yola-birgabargus ilemakagwar an mesisad. Emisgwa, geb an we-ibmarmar oyoalid. A-ulale, neggwebur-sakdigar-bukmaladi, be obelosad.
26E-dulemar geg gue-itogedba, sikirmakdemalad, sulibinsa itodmalad. E-dulemar, gaganmar-ganguedsuliyobi, be-abin naded. Gagan-dutuganayobi be-abin nadmalad. Igi gagan neg-birgi ainiardibele, dinguddae, deyob be-abin dingusayob bukusad.
27” ’An nue bela-belad be-ibmar-imakedi an wisid. Sanagwadse be aineba naddae. Sanagwadse be dognonidabali, an nue wisid. Degine, be angi isdar-sunmaksadi, bela an nue wisid.
28” ’Ar be, angi ulusad, be angi apor-sunmaksadi an bela itosad. Degisoggu, igi moli-bebe-nikamaladga, e-asugi esgoro-wardummad yolege, deyobi, an be-asugi esgoro-wardummad yooed. Igi-molimar-e-gaya edilledae, deyobi, be-gaya an bei edinnoed, adi, mer bar be sunmakegar. Bia be danigusadba, gannar an be-barmidoed.’ ”
29Isaías, Ezequíasʼga sogdebalid: “We-ibmarmar bega e-wilubga guoed: We-birgagine, ibmar-gwag walagwen-ainiardaedi be gunmaloed. Geb baid-birgasedi, ibmar-gwag-babatoed-sanmakoedi be gunmaloed. Geb birgapaasedina, be ibmar-gwag digmaloed, degi, weemarbaloed. Uva be digmaloed, degi, e-sanmakoedi be gunmaloed.
30Judá-wagan amba dula-bukusmaladi, sapi-malimar-ainiardaedyobi gannar ainidagoed, degi, e-anagan gannar ambikudoed.
31Ar Jerusalénʼgi, amba dulemar ambikuoed, bela ukudba burgosurmalad. Sión-yargi amar bukumaloed. Bab-Jehová-Bela-Gangued-Nikadi, we-ibmar imakoed.
32”Deginbali, Bab-Jehová, Asiria-e-reynik weyob soged: ‘We-neggweburse, Senaquerib gwen dogosurguoed, gwen we-neggweburgi, sigu-gagwensaar miosulid. We-dule, we-neggweburse sigu-abgaedyalaba gwen dogosulid, deginbali, neggwebur-galu-matusulid-dikarba, gwen napa-nakwemaid sobosulid, adi, agi atursamalad ubogegar.
33Gebe-danigusadba gannar Senaquerib naoed, we-neggweburgi gwen dogosurguoed. Ani, an Bab-Jehová-guedgi an soged.
34An we-neggweburgi nue-binsasoggu, degi, an-mai-Davidʼgi na binsabalidgine, we-neggwebur-irwa an gwisguoed, degi, we-neggwebur an bendakoed.’ ”
35A-mutikidgine, Bab-Jehová-e-baliwitur, Asiria-sorda-bukwadgine, mili-dulabaabakebak-gakatar (185,000) dulemar-ogilosad. Degine, neg-oiboargu, Asiria-sordamar burgwar-burgwar-mamai daklealid.
36Degidgine, Asiria-sordamar-e-rey-Senaquerib nadegusad. Geb agi, gannar Nínive-neggweburse nonigusad, agine megidapid.
37Ibagwengi, Rey-Senaquerib, bab-dummad-Nisrocʼse-goled-neggi e-bab-dummadse gorsiidgi, e-machimala-Adramelec, degi, Sarezer, es-suidgi e-bab-oburgwismalad. Geb Ararat-yalaganse wakite gusmalad. A-sorbali, e-machi-Esar-Hadón yar sesad.
