1Elah natuna Hosea i vigulau au Israel madeḡa tonuḡa i kwa. Wei maranaina au Judah Hezekiah, Ahaz natuna i vigulau.
2Tauna ana madeḡa 25 ma i vibada au Jerusalem da madeḡa 29 i kwa. Alona Abi, Zekariah natuna.
3Tauna kaua aiaii avai i kaukauei Bada awarina me noina David nanare.
4Ma god morumorui ai ani voepaepa gabui anatapui i votawatawanei. Ma kokoitau i viairikarikai ma Asherah tuatuana i taratuituina-naiei. Ma wariaḡa Moses mota bronzei, kokoitaui i kauei, i viviborumei. Hezekiah motana kokoitauna maiteni i viaigimagimai. (Mai Israel motana i ḡorei Nehushtan.)
5Hezekiah Bada, Israel ana God i vitumaḡanana-kauei. Eḡa gulau ḡelauna au Judah nanare me tauna, ma eḡa aiai ḡelauna nanare au naona i mae bo muriai i mae.
6I vipatutu Bada awarina au anatapuna ma i vovoguratei da God ana tarawatu Moses i vereverei anatapuna i vovotaḡotaḡoi.
7Bada tauna awarina i mae ma ana nola anatapuna i davudavu. Tauna Assyria ai gulau i parivirevirei ma eḡa aubaina ita vilaraga.
8Ma mai Philistia anatapui i vovaiubai, melaḡai da taon ḡaimei garigarina anatapuna i pupuni da au Gaza i ḡeta.
