1Hosea Elaha, Israel pavapavana, ena lohia laḡanina ihatoina ai, Hesekia Ahasa ese Iuda e lohiaia matama.
2E lohia matama negana ai ena mauri laḡanidia na ruahui-ima; ena lohia laḡanidia Ierusalem ai na ruahui taurahani-ta. Sinana ladana na Abi Sekaria.
3Ia na Iehova vairanai e kara maoromaoro, senena David ena kara iboudiai heḡereḡeredia.
4Atai gabudia helaḡadia e abidia oho, bona au-tubua e hakwaidudia, bona kaivakuku e utudia. Gaigai laulauna, Mose ese auri labora-labora amo e karaia ḡauna, danu ia ese e hamakohia rohoroho. Gunaguna ema bona unu dinadia Israel taudia ese muramura mai bonadia na una ḡau vairanai e gabuva; ladana e gwauraiava Nehustana.
5Ia ese Iehova, Israel Diravana, e abidadama henia; una dainai ia na asi heḡereḡerena ta, Iuda pavapavadia gunadia eiava gabedia iboudiai lalodiai.
6Badina be ia ese Iehova e badinaia tarika-tarika, ia iḡavana amo se raka oho; a Iehova ese Mose e henia haheḡanidia ia ese e badinadia.
7Iehova na ia ida; e lao heniva gabudia iboudiai na ena namo e varava. Ia ese Asuria pavapavana e gwau daḡe henia, bona isiaina se lao heni.
8Ia ese Filistia taudia e rahudia mamase, gima kohorona amo ela hanua mai maḡuna, ela bona Gasa mai tanona ida.
9King Hesekia ena lohia laḡanina ihahanina ai, bona Hosea Elaha, Israel pavapavana, ena lohia laḡanina ihahituna ai, Salmanesere, Asuria pavapavana, ese Samaria e tuari henia, e koua heḡeḡe;
10bena laḡani toi e ore ai na e abia. Hesekia ena lohia laḡanina ihatauratoina ai, bona Hosea, Israel pavapavana, ena lohia laḡanina ihataurahani-tana ai, Samaria vada e abia.
11Asuria pavapavana ese Israel taudia na Asuria e laohaidia, Hala ai bona Haboro, Gosan sinavaina, badibadinai, bona Mede hanuadia ai, e hanohodia.
12Badina be Iehova, edia Dirava, gadona asie kamonaiva, a ena taravatu, Iehova ena hesiai tauna Mose ese e haḡanilaidia ḡaudia iboudiai, na e tata utuva; idia na asie hakalava, bona asie kamonai heniava.
13King Hesekia ena lohia laḡanina ihagwauta-hanina ai, Senakerib, Asuria pavapavana, ese Iuda hanuadia mai maḡudia iboudiai e tuari henidia bona e abidia.
14Bena Hesekia, Iuda pavapavana, ese hereva na Asuria pavapavana enai e siaia, Lakisi ai; eto, Lau vada na kerere; egu amo ba raka oho, bena dahaka dahaka latagu ai bavatoa kau na baina huaia. Bena Asuria pavapavana ese silver talent sinahu-toi bona gold talent toi-ahui e gwaurai, Hesekia, Iuda pavapavana, ese baine henia eto.
15Bena Hesekia ese silver idoinai Iehova ena dubu ai bona pavapava ena ruma ai habou-habou gabudia amo e abi, e henia.
16Una negana ai danu Hesekia ese Iehova ena dubu iduaradia e ḡovalai gold na e koki oho, bona iduara kahadia kahadia audia Hesekia, Iuda pavapavana, ese e ḡovalai gold danu ma e koki, Asuria pavapavana e henia.
17Bena Asuria pavapavana ese Taratana bona Rabsarisi bona Rabsake na e siaidia lao, mai tuari oreana badana ida, Lakisi amo King Hesekia dekena ela Ierusalem ai. Idia na e dae ela, Ierusalem ai e kau. E kau negana ai, idia na ela, atai gohuna dadairana badibadinai e gini, Dabua-huri Taudia Edia Tano lao dalana ai.
18Idia ese hanua pavapavana e boi henia negana ai, Eliakim Hilkia, hanua pavapavana ena ruma ireḡuna tauna, bona Sebna, toretore tauna, bona loa Asaf, e tore pepadia inaridia tau, tatoiosi na e raka lasi dekediai.
19Bena Rabsake ese e hereva henidia, eto, Hesekia na ba hamaoroa, baoto, Pavapava badana, Asuria pavapavana, na ini e gwau tomamu: Dahaka ai o helahalahamu dainai so daradaramu?
20Oi o laloamu hereva kavakavadia na tuari ihaerolaina bona igoadalaina a? Daika enai o hetao kaumu dainai vada o gwau edeede henigu?
21A itaia, oi na Aigupto enai o hetao kaumu, a ia be siriho kwaiduna tau ta ese hetao-kau ai imana baine gwadaia uru ḡauna na heto. Farao, Aigupto pavapavana, na unuheto, ienai e hetao kaumu taudia iboudiai ediai.
22A boma hamaorogu “Ai na Iehova, emai Dirava, enai a hetao kaumu”; matona, iena atai gabudia bona ena ihaboulaina patadia na Hesekia ese vada e abi oho, bona Iuda taudia bona Ierusalem taudia vada e hamaorodia, eto “Ina ihaboulaina patana Ierusalem ai vairanai ba toma diho”, ani?
23Be, biagugu Asuria pavapavana ida ba gwau hamata. Ia e tomu “Lau ese hosi daha-rua baina henimu, bema oi ese gui taudia na latadiai ba hahelaidia kau diba negana ai”.
24Aigupto edia kariota bona edia hosi-gui taudia ediai o hetao kaumu negana ai, biagugu ena hesiai taudia bogaragidia amo tuari biaguna maraḡi-maraḡina tamona mo ede ba hadarerea toma?
25Ina danu, oi o tomamu ina gabu ituari-henina bona ihabua-tarina vada nama lalonai Iehova na dia lau ida a? Lasi, Iehova ese e haḡanigu, eto, Ina tano ba tuari henia bona ba habuaia tari.
26Bena Eliakim Hilkia bona Sebna bona loa ese Rabsake e hereva henia, eto, Mani emu kara emu hesiai taudia na Aram gadona ai ba hereva henimai, badina be ikamonaina mai dibamai, a Iuda gadona ai basio hereva henimai, maḡu latanai e helairnu taudia bae kamonai na garina.
27A Rabsake ese e hamaorodia, eto, Biagugu vada e siaigu, ini hereva na umui biagumui bona umui emui ai mo baina gwaurai totona, dia unu maḡu latanai e helaimu taudia, idia na umui ida vada e ahumui vaitani sibomui taḡemui bavani bona meimui ba inu taudia, ediai a?
28Bena Rabsake na e tore isi, Iuda gadona ai e boi lolo, eto, Pavapava badana, Asuria pavapavana, ena hereva a kamonai.
29Pavapava na ini e gwau tomamu: Hesekia ese basine koirnui, badina be ia ese lau imagu amo basine harohomui mauri diba.
30Bona Hesekia ese Iehova enai baine hahetaomui kau, baineto “Momokani Iehova ese baine hamaurida; ina hanua na Asuria pavapavana imana ai basine atoa kau”, na basio abia dae.
31Hesekia basio kamonai henia; badina be Asuria pavapavana na ini e gvau tomamu: umui na lau ida baita herohe maino; lau dekegu ba raka lasi mai. Bena iboumui ai na ta ta ena vine ena vine ena suke ena suke anidia baine ani, bona ena guri ena guri ranuna baine inu;
32ela bona lau baina vasi, bena tano ta baina laohaimui, umui emui tano heḡereḡerena, uit bona vine-ranuna tanona, flaoa bona vine imeadia tanona, olive audia bona bada-ranuna tanona; bena ba mauri, basio mase. Bona Hesekia baine koimui, baineto “Iehova ese baine harohoda mauri”, na basio kamonai.
33Bese idau-idau diravadia ta ese nega ta ai ena tano na Asuria pavapavana imana amo vada e hamauria a?
34Hamat bona Arapada diravadia be edeseni ai? Sefaravaimi bona Hena bona Iva diravadia be edeseni ai? Samaria na imagu amo vada e hamauria a?
35Tano idau-idau diravadia iboudiai bogaragidiai daidia ese edia tano na lau imagu amo vada e hamauridia? Matona, Iehova ese Ierusalem na lau imagu amo baine hamauria a?
36A taunimanima na asi reḡereḡedia e nohova, hereva ta asie haere henia; badina be hanua pavapavana ese vada e haḡanidia, eto, Basio haere henia.
37Bena Eliakim Hilkia, hanua pavapavana ena ruma ireḡuna tauna, bona Sebna, toretore tauna, bona loa Asaf, e tore pepadia inaridia tau, na edia dabua e dare, bena Hesekia dekenai e raka vareai, Rabsake ena hereva e hamaorolaia.
