1Iehosafat, Iuda pavapavana, ena lohia laḡanina ihagwauta-taurahanina ai, Iehroam, Ahaba natuna, na Israel pavapavana ai ela, Samaria ai. Ena lohia laḡanina na gwauta-rua.
2Iehova vairanai e kara havara, a dia tamana sinana heḡereḡeredia; badina be Baal ena au-tubua, tamana ese e karaia ḡauna, na ia ese e abia oho.
3Ḡau tamona, Ieroboam Nebata ena kara dika, Israel e hakaralaia dika ḡauna, na ia ese e dogoa tao, se rakatania.
4Mesa, Moab pavapavana, na mamoe e haperedia rohoroho tauna; laḡani ta ta amo ia ese mamoe natudia domaga ta bona mamoe mamaruanedia domaga ta huidia na Israel pavapavana dekena e siaidia lao.
5A Ahaba e mase murinai Moab pavapavana ese Israel pavapavana e daḡedaḡe henia.
6Taunabunai, una negana ai King Iehoram na Samaria amo e raka lasi, Israel taudia iboudiai e haboudia.
7Bena ela, hereva na Iehosafat, Iuda pavapavana, dekena e siaia, eto, Moab pavapavana ese e daḡedaḡe henigumu; oi na lau ida aitala, Moab baita tuari henia ani? Ia eto, Baina vasi; lau oi na tamona, lauegu orea bona oiemu orea danu tamona; lauegu hosi bona oiemu hosi danu tamona.
8Ma eto, Edena dala amo baitala? Iehoram e haere, eto, Edom tano-ḡaḡaena dalana amo.
9Taunabunai Israel pavapavana na Iuda pavapavana bona Edom pavapavana ida ela. Dina hitu lalodiai idia na dala magevana amo e raka heḡeḡe; bena tuari taudia bona edia ubu-ubu ḡaudia, idia muridiai e rakava gaudia, na asi adia ranu.
10Bena Israel pavapavana eto, Madi ihabaida, Iehova ese ita pavapava tatoiosi vada e boirida, Moab pavapavana imana ai baine atoda totona.
11Iehosafat eto, Iehova ena peroveta tauna ta dia iniseni ai a? Iena amo Iehova baitama nanadaia. Bena Israel pavapavana ena hesiai tauna ta e haere, eto, Elisaia Safata na iniseni ai, ia be Elia imana ranu amo e dairidia tauna.
12Iehosafat eto, Iehova ena hereva na ia enai. Taunabunai Israel pavapavana bona Iehosafat bona Edom pavapavana na ia dekena ela.
13Elisaia ese Israel pavapavana e hamaoroa, eto, Dahaka baina kara henimu? Tamamu bona sinamu edia peroveta taudia dekedia aola. A Israel pavapavana ese e hamaoroa, eto, Lasi, Iehova ese pavapava taumai tatoiosi vada e boirimai, Moab taudia imadia ai baine atomai totona.
14Elisaia eto, Iehova Sabaota, isiaina na lao heniamu Diravana, e maurimu heḡereḡerena, Iehosafat, Iuda pavapavana, basinama matauraia, lau ese oi basinarna haḡeremu bona basinama itamu.
15Benaini, hatai-hatai ḡaudia e hataimu tauna ta ba hakaua mai dekegu ai. Bena hatai-hatai ḡaudia e hatai tauna ta ese ena ḡau e hataia negana ai, Iehova ena siahu ese Elisaia e rohea.
16Bena ia eto, Iehova na ini e gwau tomamu: Ina koupa kaukauna lalonai lau ese ranu gohogohudia baina karadia.
17Badina be Iehova na ini e gwau tomamu: Lai eiava medu basio itadia, to una koupa na ranu ai baine honu, ba inu helaoreana, umui bona emui boromakau bona emui ubu-ubu ḡaudia iboudiai.
18Iehova vairanai una na ḡau pipikina; ia ese Moab taudia danu umui imamui ai baine atodia;
19bena hanua mai maḡudia iboudiai bona abi-hidi hanuadia iboudiai na ba hadareredia, au namodia iboudiai na ba hagaridia, ranu guridia iboudiai na ba tahunidia, bona tano namodia iboudiai na nadi amo ba hadikadia.
20Daba-rerena ai, boubou ḡaudia e hahelaḡadiava horana sisivana ai, ranu na Edom kahana amo e aru ema, ela bona una tano idoinai na ranu ese e utua dae.
21Moab taudia iboudiai na e kamonai, hari pavapava na idia ituari-henidia totona vada ema; bena tuari dabuadia bae doki diba taudia, maragina amo ela bona badana, e boiridia, tano hetoana ai e haginidia heḡaeḡae.
22Daba matana ai e tore tore isi, bena dina e tara ranu latanai; bena Moab taudia ese ranu idia vairadiai e itaia na vada e kakakaka, rara na heto.
23Bena idia na eto, Ina na rara; momokani hari pavapava na sibodia e tuari bona vada e heala-ala heheni. Moab e, aitala, edia ḡau aita ha-abi.
24A Israel edia taruha ai e kau negana ai, Israel taudia na e tore isi, Moab taudia e guru henidia, ela bona Moab taudia na idia vairadia amo e heau. Bena idia ese e lao henidia, Moab taudia e aladia laova.
25Hanua na e ḡiḡidia dobi, bona tano namodia iboudiai latadiai idia ta ta ese nadi ta ta e taho kau, ela bona tano e bubuni. Ranu guridia iboudiai danu e tahunidia, bona au namodia iboudiai e hagaridia; ela bona Kiri-haresete nadina mo mimia. Bena vilipopo taudia ese e koua heḡeḡe bona e hadarerea.
26Moab pavapavana e diba, ia vada e darere; bena ia ese dare taudia sinahu hitu e abidia, Edom pavapavana vairanai bae raka uru eto, to asie heḡereḡere.
27Bena ia ese natuna roboana, ena gabu ai bema lohia merona, na e abia, e hahelaḡaia, ḡole-oho boubouna ḡauna ai e halaoa, hanua maguna latanai. Bena badu ḡaraḡara na Israel taudia latadiai e kau; bena idia na iena amo e raka oho, edia tano korikori e lou lao.
