1Avoeto ke erena amo ungo osaga kiora na ungota degi pambae
2amita be amo nanena ano ungo osaga kogurovo amo embo nei amuna au na tunga javotoho ano? Na tunga javotoho ari embo nei irae.
3Eto na ungota degi ke ngahia na kaitana amita be amo na ungota degi pambae kiti ta ungona ke avo tambu au teho mitirovo pambuto ungota tunga javotoho ari avo kiaetena. Eto na kogona amo na tunga javotoho ururono ungote tapa tunga javotoho aisova.
4Eto na ungota degi ke ngahia kaitana amo tunga osaga te titi sisivu te tapa kaitana te amo ungo osaga kiova na kajae rate ungo osa peni vahai eona avo ungona be kiova kaitana.
5Eto embo vahai na enu osaga kogava amo nau degi ta ae kiae rate amita ke na enu ungo osaga isapa kogue mitovova.
6Eto amita ari sapura ta hajire amo ungo embomeni isapamane na eteve ere kogua amo inonora
7avoeto amita ari avo hotembeto toto embo ehako umbuto osa ururoro amo osaga isapamane kogue mane beto pambasuja.
9Eto na ungota degi ke kaitana amo ungo na ke tapa inono ta agi avote avo be kesi kaitana.
10Eto ungona embo ta ari sapura hotembeto toasova amo namote tapa hotembeto toasona. Eto ari sapura mitirou hotembeto toasona amo ungo avoembo Keriso ta titi ta hotembeto toasona.
11Amo Satan ta sovera na mane nembasuja avoeto eona, eto amita uje deire amo ungotena tapa kiarira.
12Eto na da Troas ta pambuto mitio Bada na degi enu kito Keriso ta duru javotoho avo embomeni ta degi hande ue
13nau namei Titus da aita tambae ue nau jota osa ari puvurae enu embomeni peketo toto Macedonia ta pahana.
14Rate degi nainge nainge pambasora amo God na eoi Keriso ta ari sasapura nembari embopo ue amiga kajueto pahue amita ke javotoho embo tapa ta hande eora, amo i buji javotoho na mune javotoho hande euja aingeko eora.
15Eto ungotena Keriso ta embomeni amo God ta degi jeune mune te aingeko eto God na oreketo umbasuja eto oreketo umbae toasuja embomeni enana amo matu munehembeora.
16Eto Keriso ta ke oreketo umbae embomeni ta degi amo bisi sari kimu masa te aingekora te oreketo umbasuja embomeni ta degi amo jeune mune te aingeko aita amo vasiri be tambuto iresora. Eto Keriso ta pure nombo be emo embo amuna ari haitere?
17Eto ke be amo embo nei nei na God ta ke embota degi koro na ombuto umbuora te nangona amo ainge aera te nangona Keriso ta ke hande ue God ta ke hande ari embopo ke ijie God ta titi ta ke be na pere erera.
