ⲚⲒⲔⲞⲢⲒⲚⲐⲒⲞⲤ ̅Ⲃ 2

1

2

3

4

5

6

7

8

9

10

11

12

13

¹ⲀⲒⲔⲢⲒⲚⲈ ⲄⲀⲢ ⲘⲠⲀⲒ ⲚⲀⲒ ⲈⲦⲘⲈⲒ ⲞⲚ ϢⲀⲢⲰⲦⲚ ϨⲚ ⲞⲨⲖⲨⲠⲎ.

²ⲈϢϪⲈ ⲀⲚⲞⲔ ⲄⲀⲢ ⲠⲈⲦⲚⲀⲖⲨⲠⲈⲒ ⲘⲘⲰⲦⲚ. ⲈⲒⲈ ⲚⲒⲘ ⲠⲈⲦⲚⲀⲈⲨⲪⲢⲀⲚⲈ ⲘⲘⲞⲒ ⲈⲒ ⲘⲎⲦⲒ ⲠⲈⲦⲚⲀⲖⲨⲠⲈⲒ ⲈⲂⲞⲖ ϨⲒⲦⲞⲞⲦ.

³ⲔⲀⲒⲄⲀⲢ ⲈⲚⲦⲀⲒⲤⲈϨ ⲠⲀⲒ ϪⲈⲔⲀⲀⲤ ⲈⲚⲚⲀⲈⲒ ⲦⲀⲖⲨⲠⲈⲒ ⲚⲦⲞⲞⲦⲞⲨ ⲚⲚⲈⲦⲈϢϢⲈ ⲈⲦⲢⲀⲢⲀϢⲈ ⲈⲂⲞⲖ ϨⲒⲦⲞⲞⲦⲞⲨ. ⲈⲒⲔⲰ ⲚϨⲦⲎⲒ ⲈⲢⲰⲦⲚ ⲦⲎⲢⲦⲚ ϪⲈ ⲠⲀⲢⲀϢⲈ ⲠⲰⲦⲚ ⲦⲎⲢⲦⲚ ⲠⲈ.

⁴ⲈⲂⲞⲖ ⲄⲀⲢ ϨⲚ ⲞⲨⲚⲞϬ ⲚⲐⲖⲒⲮⲒⲤ. ⲘⲚ ⲞⲨⲖⲰϪϨ ⲚϨⲎⲦ ⲀⲒⲤϨⲀⲒ ⲚⲎⲦⲚ ϨⲒⲦⲚ ϨⲀϨ ⲚⲢⲘⲈⲒⲎ ϪⲈⲔⲀⲀⲤ ⲀⲚ ⲈⲦⲈⲦⲚⲈⲖⲨⲠⲈⲒ. ⲀⲖⲖⲀ ϪⲈ ⲈⲦⲈⲦⲚⲈⲈⲒⲘⲈ ⲈⲦⲀⲄⲀⲠⲎ ⲈⲦⲈⲨⲚⲦⲀⲈⲒⲤ ⲚϨⲞⲨⲞ ⲈϨⲞⲨⲚ ⲈⲢⲰⲦⲚ.

⁵ⲈϢϪⲈ ⲀⲞⲨⲀ ⲆⲈ ⲖⲨⲠⲈⲒ ⲚⲦⲀϤⲖⲨⲠⲈⲒ ⲘⲘⲞⲒ ⲀⲚ. ⲀⲖⲖⲀ ⲀⲠⲞ ⲘⲈⲢⲞⲨⲤ. ϪⲈ ⲈⲚⲚⲀⲈⲠⲒⲂⲀⲢⲈⲒ ⲘⲘⲰⲦⲚ ⲦⲎⲢⲦⲚ.

⁶ⲦⲈⲒⲈⲠⲒⲦⲒⲘⲒⲀ ϬⲈ ⲢⲰϢⲈ ⲈⲠⲀⲒ ⲦⲈⲂⲞⲖ ϨⲒⲦⲘ ⲠⲈϨⲞⲨⲞ.

⁷ϨⲰⲤⲦⲈ ⲚⲦⲞϤ ⲚⲦⲈⲦⲚⲔⲰ ⲚⲀϤ ⲈⲂⲞⲖ. ⲀⲨⲰ ⲚⲦⲈⲦⲚ ⲤⲈⲠⲤⲰⲠϤ. ⲘⲎⲠⲞⲦⲈ ϨⲢⲀⲒ ϨⲘ ⲠϨⲞⲨⲈ ⲖⲨⲠⲈⲒ ⲚⲤⲈⲰⲘⲔ ⲘⲠⲀⲒ ⲚⲦⲈⲈⲒⲘⲒⲚⲈ.

⁸ⲈⲦⲂⲈ ⲠⲀⲒ ϮⲠⲀⲢⲀⲔⲀⲖⲈⲒ ⲘⲘⲰⲦⲚ ⲘⲀⲦⲀϪⲢⲞ ⲚⲞⲨⲀⲄⲀⲠⲎ ⲈϨⲞⲨⲚ ⲈⲢⲞϤ.

⁹ⲈⲦⲂⲈ ⲠⲀⲒ ⲄⲀⲢ ⲚⲦⲀⲒⲤϨⲀⲒ ⲚⲎⲦⲚ ϪⲈ ⲈⲒⲈⲈⲒⲘⲈ ⲈⲦⲈⲦⲚⲆⲞⲔⲒⲘⲎ ϪⲈ ⲚⲦⲈⲦⲚ ϨⲈⲚⲤⲦⲘⲎⲦ ϨⲚ ϨⲰⲂ ⲚⲒⲘ.

¹⁰ⲠⲈⲦⲈⲦⲚⲀⲔⲰ ⲆⲈ ⲚⲀϤ ⲈⲂⲞⲖ ϮⲔⲰ ϨⲰ. ⲔⲀⲒⲄⲀⲢ ⲀⲚⲞⲔ ⲚⲦⲀⲒⲔⲰ ⲈⲂⲞⲖ ⲘⲠⲈⲚⲦⲀⲒ ⲔⲀⲀϤ ⲈⲂⲞⲖ ⲈⲦⲂⲈ ⲦⲎⲨⲦⲚ ϨⲘ ⲠϨⲞ ⲘⲠⲈⲬⲢⲒⲤⲦⲞⲤ.

¹¹ϪⲈⲔⲀⲀⲤ ⲈⲚⲚⲈⲨϨⲞⲨⲢⲰⲰⲚ ⲈⲂⲞⲖ ϨⲒⲦⲘ ⲠⲤⲀⲦⲀⲚⲀⲤ. ⲚⲦⲚⲞⲂϢ ⲄⲀⲢ ⲀⲚ ⲈⲚⲈϤⲘⲈⲈⲨⲈ.

¹²ⲚⲦⲈⲢⲒⲈⲒ ⲆⲈ ⲈϨⲢⲀⲒ ⲈⲦⲈⲦⲢⲰⲀⲤ ⲈⲠⲈⲨⲀⲄⲄⲈⲖⲒⲞⲚ ⲘⲠⲈⲬⲢⲒⲤⲦⲞⲤ. ⲀⲨⲰ ⲚⲦⲈⲢⲈ ⲞⲨⲚⲞϬ ⲚⲢⲞ ⲞⲨⲞⲚ ⲚⲀⲒ ϨⲘ ⲠϪⲞⲈⲒⲤ.

¹³ⲘⲠⲒⲘⲦⲞⲚ ϨⲘ ⲠⲀⲠⲚⲈⲨⲘⲀ ϪⲈ ⲘⲠⲒϨⲈ ⲈⲦⲒⲦⲞⲤ ⲠⲀⲤⲞⲚ. ⲀⲖⲖⲀ ⲚⲦⲈⲢⲒ ⲀⲠⲞⲦⲀⲤⲤⲈ ⲚⲀⲨ ⲀⲒⲈⲒ ⲈⲂⲞⲖ ⲈⲦⲘⲀⲔⲈⲆⲞⲚⲒⲀ.

¹⁴ⲠⲈϨⲘⲞⲦ ⲆⲈ ⲘⲠⲚⲞⲨⲦⲈ ϢⲎⲠ ⲠⲀⲒ ⲈⲦϪⲀⲒⲞ ⲘⲘⲞⲚ ⲈⲂⲞⲖ ⲚⲞⲨⲞⲈⲒϢ ⲚⲒⲘ ϨⲘ ⲠⲈⲬⲢⲒⲤⲦⲞⲤ. ⲀⲨⲰ ⲈⲦⲞⲨⲰⲚϨ ⲈⲂⲞⲖ ⲘⲠⲈⲤⲦⲞⲒ ⲘⲠⲈϤⲤⲞⲞⲨⲚ ⲈⲂⲞⲖ ϨⲒⲦⲞⲞⲦⲚ ϨⲘ ⲘⲀ ⲚⲒⲘ.

¹⁵ϪⲈ ⲀⲚⲞⲚ ⲞⲨⲤϮⲚⲞⲨϤⲈ ⲚⲦⲈ ⲠⲈⲬⲢⲒⲤⲦⲞⲤ ⲘⲠⲚⲞⲨⲦⲈ ϨⲚ ⲚⲈⲦⲚⲀⲞⲨϪⲀⲒ ⲘⲚ ⲚⲈⲦⲚⲀⲦⲀⲔⲞ.

¹⁶ⲚϨⲞⲒⲚⲈ ⲘⲈⲚ ⲚⲤⲦⲞⲒ ⲈⲂⲞⲖ ϨⲘ ⲠⲘⲞⲨ ⲈⲠⲘⲞⲨ. ⲚϨⲞⲒⲚⲈ ⲆⲈ ⲚⲤⲦⲞⲒ ⲈⲂⲞⲖ ϨⲘ ⲠⲰⲚϨ ⲈⲠⲰⲚϨ. ⲀⲨⲰ ⲚⲚⲀϨⲢⲚ ⲚⲀⲒ ⲚⲒⲘ ⲠⲈⲦⲘⲠϢⲀ.

¹⁷ⲚⲚⲈⲚⲞ ⲄⲀⲢ ⲀⲚ ⲚⲐⲈ ⲚϨⲀϨ ⲈⲦⲞ ⲚⲈϢⲰⲦ ϨⲘ ⲠϢⲀϪⲈ ⲘⲠⲚⲞⲨⲦⲈ. ⲀⲖⲖⲀ ϨⲰⲤ ⲈⲂⲞⲖ ϨⲚ ⲞⲨⲦⲂⲂⲞ. ⲀⲖⲖⲀ ϨⲰⲤ ⲈⲂⲞⲖ ϨⲒⲦⲘ ⲠⲚⲞⲨⲦⲈ ⲘⲠⲈⲘⲦⲞ ⲈⲂⲞⲖ ⲘⲠⲚⲞⲨⲦⲈ ⲈⲚϢⲀϪⲈ ϨⲘ ⲠⲈⲬⲢⲒⲤⲦⲞⲤ.