1Phenďom peske, hoj na avava ke tumende avke, hoj tumenge anava pharipen.
2Bo te me tumenge kerava o pharipen, ko man paľis dela o radišagos? Na oda, kaske me kerďom o pharipen?
3A kada tumenge pisinďom, hoj sar avava, te na avav smutno ole dženendar, kastar majinďomas te radisaľol. Bo pačav, hoj savoren tumen hin jekhetane manca radišagos.
4Bo bare pharipnastar the phare jilestar a but apsenca tumenge pisinavas. Na vašoda, hoj te aven smutne, ale hoj te sprindžaren miro baro kamiben ke tumende.
5Ale te vareko kerďa varekaske pharipen, na ča mange kerďa pharipen, ale andre varesoste the tumenge savorenge. No na kamav ke oda mek me te prithovel.
6Imar les hin dos, bo but tumendar les potrestinde.
7Ale akana imar ela feder, te leske odmukena a podhazdena, hoj les oda smutňišagos te na odlel calkom le pačabnastar.
8Vašoda tumen mangav, hoj leske te presikaven o kamiben.
9Bo vašoda kada pisinďom, hoj te dikhav, sar andre odi proba (skuška) obačhena a či kerena savoro avke, sar phenďom.
10Te tumen odmukena varekaske vareso, oleske odmukava the me. Bo oda, so me odmukľom – te man sas so te odmukel – odmukľom prekal tumaro lačho anglo Raj,
11hoj amen o satan te na klaminel. Bo amen prindžaras leskere plani.
12Sar avľom andre Troada te vakerel o evaňjelium le Kristoskero, choc te sas o vudar le Rajestar phundrado prekal ma,
13mire duchos na sas smirom, bo na arakhľom ode mire phrales le Titus. Vašoda man lenca ode rozgeľom a geľom andre Macedonija.
14Ale paľikerav le Devleske, savo amenge del furt te ňerinel (te zviťazinel) andro Kristus a prekal amende del te sikavel pre dojekh than peskero prindžaripen sar odi šukar saga.
15Bo amen sam le Devleske sar odi šukar saga le Kristoskeri maškar ola, save pes zachraňinen a the maškar ola, save ena zňičimen.
16Prekal jekh oda hin e meribnaskeri saga pro meriben a prekal aver oda hin e dživipnaskeri saga pro dživipen. Ale ko oda šaj kerel?
17Bo amen na šeftinas le Devleskere laveha, sar oda but džene keren. Ale vaš oda, hoj amen o Del bičhaďa, vakeras pačivalones anglo Del sar služobňika le Kristoskere.
