1Netibok se aneng-aneng ko. Eked a pa tagmon doton kenyo amon eked a pemegay kenyo te lidò iling te neinang ko kedengan.
2Simpana melidò kaw kidoen pineokit te pegsagda ko te eg-inangen niyo medaet, yan eked kaw pekesinalay kanak.
3Simolat a kenyo kedengan amon tòliden niyo se inang niyo, amon eked a niyo kebegayi te lidò aw domoton a. Sikiyo peden se memegay kanak te luba, so netegahan ko den aw tomolò kaw te insolat ko, yan meluba se kedita tadon.
4Pegsolat ko kenyo kedengan, ontò nelidò se pedowan ko aw nekekelag a. Simolat a kenyo kenà amon kebegayan ko sikiyo te lidò, meneng amon ipetaga-taga ko kenyo te ontò ko sikiyo nedekelan te pedowan.
5Na, tepad te sìyan otaw kidoen kenyo mig-inang te medaet kedengan, kenà olò siak se binegayan din te lidò, meneng se doma heman doton kenyo.
6Botongi niyo den se pegpelumun kandin, so migselsel den sikandin.
7Mèpiya aw pegwedaden niyo den se salà ininang din. Sinelayi niyo se pedowan din amon eked sikandin lengà te pegpemenal so pelaban nelidò se pedowan din.
8Ibeg ko, todà niyo sikandin kedekelan te pedowan.
9Yan se doun te simolat a kenyo kedengan tepad te otaw sìyan, amon ketegahan ko aw ontò niyo toloen se kedita te impunù ko kenyo tepad kandin.
10Aw pegwedaden niyo se salà ininang din, siak heman megwedad kenyan. Aw pigwedad niyo den, pigwedad ko den heman amon kèpiyaan kaw, so mèpiya iyan diyà ki Cristo.
11Mèpiya aw pegwedaden tadon se salà ininang te otaw sìyan amon eked kidon keekali i Satanas, so ontò tadon den netegahan se menge medaet ibeg i Satanas.
12Nayan, pegdoton ko te Troas amon megtoladà a te Mèpiya Indan tepad ki Cristo, kinità ko te doen dalan impetagad te Pengolo kanak amon megtoladà a.
13Meneng gayed netetana se pedowan ko, so wedà pa dateng doton se kedowa tadon si Tito lekat kidoen kenyo, aw penga niyan, nesayo a dimeleg doton te Masidonya.
14Meneng ontò a egpesiontong diyà te Timanem, so sikandin se nenalo kenitadon, aw impetaking kidon din te ibeg din, aw impeakop kidon din diyà ki Cristo. Insalig te Timanem diyà kenitadon se kebenalan tepad ki Cristo amon ipetaga-taga tadon iyan diyà te kedita te otaw, so mèpiya se kebenalan tepad ki Cristo, iling te sebad metinadeg keedekan pengkey kenan.
15Meluba se Timanem aw megtoladà a tepad ki Cristo diyà te menge otaw nemenal aw diyà heman te menge otaw ipelumun.
16Na, se otaw memenal te itoladà ko, yan se begayan te Timanem te kaling pedowan aw keentayan wedad temanan. Meneng se otaw eked pemenal, yan se detengan te kemetayun wedad temanan. Pengkey doen otaw eg-aneng-aneng te wedad mekebatog megtoladà kenyan, meneng egpekebatog a so egtebangan a te Timanem.
17Kenà a iling te menge doma otaw egtoladà te kagi te Timanem amon mengewarta. Meneng insogò a te Timanem, aw netegahan din te nelobos se pedowan ko te pegtoladà te Mèpiya Indan tepad ki Cristo.
