1गो इन कली लेंशा श्येत गेचा कली कोरिन्थ मपीनुङ, दे मिम्ताक्ङ।
2मारदे हना गो इन कली श्येत गेता हना, आं श्येत गेशो मुर आन क्येङा लाक्शा, सुमी आं कली ग्येरपाइक्ने चाप्बा ङा?
3गो ङोंइती मार मिम्शा ब्रेक्ताक्ङ देंशा हना, गो जाक्ङानु, सु मुरपुकीमी आं कली ग्येरपाइक्चा माल्नीमी, मेको रे पा आं थुं मखाइक्ल, दे ब्रेक्ताक्ङ। मारदे हना गो ग्येरसीङानु, गे नेल्ल ग्येरसीनीनी, दे थमा सुइक्नुङ।
4एको चिठी ब्रेक्तुनु, आं थुं खाइश्शा “दोपा अर्ती गेङमी? हुइश्शा रिम्शो दुम्नीमी कों? दोपा रिम्शो दुम्नीमी?” दे इन कली शुश मिम्शा, ङाक्थ्री दुम्ती। इन थुं खाइक्पाइक्चा कली ममाइ, इन कली दाक्तीके मोदेंशो दुम्त, दे मिम्तीन।
5इन वारच कामी इन थुं खाइक्पदा बाक्त, दे रुप्ता। आं थुं खाइक्पाइश्शो क्येङा नेल्ल इन थुं खाइक्पाइक्तु।
6मेको कली गे नेल्ल इन मिम्शा गेशो सजाइ ठीक बाक्ब।
7मुल ङा मेरे माफ गेने। आ थुं नाइक्पाइश्शा बारपतीन। मोदेंशो मपाइतीनी हना, आ मरिम्शो पशो मिम्शा, आ कांइचीक बाक्शा, बेक्शो खोदेंशो दुम्ब।
8मोपतीके मेको कली ब्रशा, दाक्तीन, दे इन कली पुंइनुङ।
9गे टीनीनी देय मटीनीनी, दे गो इन कली ङोंइती ङा चिठी सोइश्शो नङ।
10गेपुकीमी सु सु आन कली माफ गेनी, गो यो मेको आन कली माफ गेता। माफ गेङानु, इन पर्बम ख्रीस्त आ ङोंइती गेता। यूहन्ना २०:२३
11सैतानमी इं कली खतम सेल्चा मतवल। मारदे हना मेको आ मिम्शो गो नेल्ल तुइक्नय। लूका २२:३१; १पत्रुस ५:८
12गो त्रोआस सहरमी ख्रीस्त आ ग्येरपाइक्तीक लोव़ शेंथ जाक्ङानु, प्रभुमी आं कली नक लाप्चो का रोक्शा गेती। प्रेरित १४:२७; १कोरिन्थी १६:९
13तन्न आं दाक्शो लोक्ब तीतस कली मग्रुम्थु, आं थुं मनाइक्स। मोपतीके मेको आन कली प्रोंइशा, मासीडोनीया लती। २कोरिन्थी ७:६; प्रेरित २०:१
14तन्न परमप्रभु यावे कली “गे रिम्शो पाइब बाक्ननी” दे ठेयब सेल्नीकी। मारदे हना ख्रीस्त आ नेंमी ग्राना ग्रान लाइनीकी। मोपा शेंना शेंन हिरशा गाक्कानु, ब्रोव़शो रिना पाइश्शो खोदेंशो पा नेल्लेमी ख्रीस्त कली तुइक्नीमी।
15मारदे हना गो पाप रे ब्रोंइशा बाक्ब नु जाम्शा लाइब आन दातेमी गो परमप्रभु यावे आ ङोंइती ख्रीस्त आ ब्रोव़शो नाम्सीशो बाक्नीकी। १कोरिन्थी १:१८
16गो जाम्शा लाइब आन कली बेक्चा ङा रिना नु पाप रे ब्रोंइशा बाक्ब आन कली ब्रोंइचा ङा रिना बाक्नीकी। मोदेंशो लोव़ शेंचा कली सुम जिम्मा ब्रने चाप्नीमी? लूका २:३४; २कोरिन्थी ३:५
17तन्न गो परमप्रभु यावे आ लोव़ ग्याप्ब लेयब खोदेंशो पा मलेयनीकी। गो ठीक पाइब मुर बाक्नीकी। गो परमप्रभु यावे आ सोइश्शो, परमप्रभु यावे आ ङोंइती ख्रीस्त आ नेंमी शेंनीकी। २कोरिन्थी १:१२; २कोरिन्थी ४:२; १पत्रुस ४:११
