1Akũ ma zɛo kũ mani su á kĩnaa kũ nɛ̀sɛyakanaao doro.
2Tó ma tò á nɛ̀sɛɛ yàka, dí mɛ́ ani ma pↄ kɛ nnaa, tó adi kɛ ákↄ̃nↄ kũ ma á nɛ̀sɛɛ yàkaárɛnↄ baasiroo?
3Ma takada kɛ̃̀árɛ lɛ, de tó ma su á gwa, ákↄ̃nↄ kũ á de à ma pↄ kɛ nnanↄ sún ma nɛ̀sɛ yakaro yãimɛ. Má dↄ̃ sãnsãn kũ ma pↄnna bi á pínki pↄnnamɛ.
4Ma takada pìi kɛ̃̀árɛ wari gũn kũ pↄsira zↄ̃kↄ̃ↄo kũ wɛ́'i dasio, adi kɛ de á pↄ yaka yãinlo, de àgↄ̃ dↄ̃ lákũ má yeái nà yãimɛ.
5Tↄ̀, tó gbɛ̃ke nɛ̀sɛyakana yã kɛ̀, adi kɛ ma nɛ̀sɛɛn à yàkaro, á gbɛ̃ sĩnda pínki pↄ́mɛ à yàka, ke á gbɛ̃kenↄ, de màsun o à gɛ̃ onalaro.
6Wari kũ á daside dↄ̀ gbɛ̃ pìia mↄ̀a.
7Abire yãi à sùru kɛ kãao tera sà, à a laakari kpátɛnɛ, de a pↄsira kori sún a dɛro yãi.
8Abire yãi ma kútɛ kɛ̀árɛ, à mↄnɛ súsu kũ á yei.
9Àkũ mɛ́ à tò ma takada birekũ kɛ̃̀árɛ, ma lí pɛ̀tɛoáwa, de mà le mà dↄ̃ tó á yã kũ ma òárɛ kũna pínki.
10Tó a gbɛ̃ kɛ̃̀ kũ a taario, madì ade kɛ̃ se. Zaakũ tó ma gbɛ̃ yã kɛ̃̀nɛ, tó yãke sù à kun, madì kɛ á yãi Kirisi arɛ,
11de Setan sún ↄ̃ndↄ̃ kɛwɛrɛro yãi, zaakũ ó a manafikinↄ dↄ̃.
12Kũ ma ka Toroasi de mà Kirisi baaru nna kpá, Dikiri zɛ́ bòmɛnɛ,
13ama ma laakari kpatɛnaro, kũ mádi ma gbɛ̃ndo Titu lero yãi. Akũ ma lɛ́ zàḿma gwe, ma da Masedonia zɛ́n.
14Ma sáabu kɛ̀ kũ Ludao, zaakũ àdigↄ̃ dowɛrɛ arɛ gↄrↄ sĩnda pínki, odìgↄ̃ zĩ̀blerinↄ ũ Kirisi gũn, odì a dↄ̃na gbĩ dagula gu sĩnda pínkia.
15Zaakũ ó de turaretiti gbĩnnade kũ Kirisi kpàta Ludanɛ ũ gbɛ̃ kũ àtɛni ń sura banↄ tɛ́ kũ gbɛ̃ kũ ò sãtɛnanↄ.
16Ó de gɛ̀ gbĩ ũ gbɛ̃kenↄnɛ, akũ àdi ga ińnɛ. Ó de wɛ̃̀ndi gbĩ ũ gbɛ̃ kparanↄnɛ, akũ àdi wɛ̃̀ndi ińnɛ. Ó dí mɛ́ à kà à zĩ bire kɛɛ?
17Ó de lán gbɛ̃ kũ òdigↄ̃ laga tá kũ Luda yãonↄ bàro. Kirisi gũn odì yã o kũ nɛ̀sɛpurao kũ Luda dↄ̃naao a zĩ̀rinↄ ũ.
