1I mo ra a nuki lena, gong melet mo a wan torom mot, sako an utupunuk mot.
2Ra a sa utupunuk tar mot, osi mo in ugasgas iau? Mot ut. Ikut mot in ugasgas iau pepetlai, ra a sa utupunuk tar mot?
3Iri a kibino ra a tumtumus kut torom mot, sako ra an nan ut, an tupunuk un mot. Uni in wakak sur mot in ugasgas iau. A tasmani lena, ra an gas, mot kai dat in gas tomo.
4A tumtumus torom mot nama tupunuk, ma in balang i maut doko ma a lurlur na matang i puku. Ka nemi sur an utupunuk mot, a nemi sur mot in tasmani lena, a nem doko mot.
5Ra taio i kibino una tupunuk ri, awu sur i utupunuk iau kut, i utupunuk a susut kai tagun mot. A watungi lenri, sur gong a watungi lena, i utupunuk mot rop.
6A susut tagun mot, mot sa pitar tar a warkurai na minabalu toromi. I sa sot,
7ra uniri, mot in dumano ru anun a petutna ra, ma mot in umaromi, sur gong i tupunuk dekdek, ma in puku saksakit.
8I mo ra a saring mot, sur mot in upuaso melet anumot a marmaris toromi.
9Una nung ara pas ra a tumusi torom mot, a lar mot kut nami, sur an tasmani lena, mot in mur anung a kum wasiso rop, o awu.
10Ra mot dumano ru a sakino anun taio, iau kai an dumano ru i. Ra a musano ra i sa pam tar tu sakino, a sa dumano ru i umatan o Karisito. A dumano ru i, uni a nuk pas mot,
11sur gong o Satan i upuku pas dat, uni dat sa tasman a nuknukino un asau ra i nem na pami.
12Ra a wanpat una tamon Troas, sur an warawai torom det nama Wakak na Wasiso anun o Karisito, a tama i lena, a Labino i sa papos saro tar anung a kisapi sur an warawai.
13Ikut in balang ke molmol, uni ka sio pas o Taitus, a tisinglik una nurnur. I mo ra a wasiso na itula taru torom det tagitiro iai, ra a wan pas utong o Masedonia.
14Ikut a watung wakak torom o God, uni o Karisito i mugu met elar nama king ra i win. O God i tulu sarara met, sur met in wasiso puaso un o Karisito, sur a taro una kum tamon rop det in tasmani. A tastasman ra, i elar nama utna i sangnain wakak.
15Met elar nama utna ra a misino i sangnain wakak, ra o Karisito i etabor nami torom o God. Ma a sangnainino i wan torom det ra o God i ulaun pas det, ma torom det kai, ra det wan sur a iniru.
16A sangnain na minat torom det ra det wan sur a iniru, ma a sangnain na nilaun torom det ra o God i ulaun pas det. Osi ra i pet lar pas a pinapam ri?
17Ka met elar nama susut na taro, ra det papam kut nama wasiso anun o God sur a mani. Ikut, un o Karisito met wasiso nama lingmulus umatan o God, uni i ut i tulu ru met.
