2 Korinth 2

1

2

3

4

5

6

7

8

9

10

11

12

13

¹Ere kug duwgiliy u wun’ug ni ba’aray rogon: dab ku gub ngomed bayay nggu kirebnag an’med.

²Ya fa’anra nggu kirebnag an’med, me ere mini’ e kabay ni ra fal’eg lanin’ug? Kemus ni fa pi’in kug kirebnag lanin’rad!

³Aram fan ni gu yoloy fa gi babyor ngomed, ya dabug ni nggub ngomed me kireban’ug ni pi’in nsusun e nge felan’ug ngorad e yad e ngar kireb niged lanin’ug. Ya gu manang nra gu felfelan’, ma ku errogon gimed ni gimed ra felfelan’.

⁴Kug yoloy e babyor ngomed ni kari magafan’ug ngomed, ma kari kireban’ug ni be map’map’ e lu’ u owcheg, ni gathi fan e nggu kirebnag an’med, machane bochan e ngam nanged gelngin fanmed t’uf rog ni gimed gubin.

⁵Fa’anra ke kirebnag be’ laniyan’ be’, ma gathi gag e ke rin’ ngog, ya gimed; ara boch i gimed, nggog ni boch i gimed, ya dabug ni nggog e thin nib gel ngak.

⁶Fare gechig nike tay bo’or i gimed ngak fa’anem e ke gaman.

⁷Ere chiney e ngam n’iged fan u wun’med e tin ke rin’ mi gimed pi’ e athamgil nga laniyan’, ya ri gel e kireban’ rok nge pag ir.

⁸Ere ri gu be wenig ngomed ni ngam guyed rogon nge nang nri kab t’uf romed.

⁹Ya ba’aray fan ni gu yoloy fa gi babyor nge yib ngomed: gub adag ni nggu nang rogon ni mpired ni gimed bmuduwgil ko re sikeng nem ni yib ngomed, mu gu nang ko gubin ngiyal’ ni gimed ba’adag ni ngam folgad ko tin ni gu be fonow nagmed riy fa danga’.

¹⁰Fa’an gimed ra n’ag fan u wun’med e n’en ke rin’ be’, ma ku er rogog ni ku gu n’ag fan u wun’ug. Ya fa’anra kug n’ag fan u wun’ug ban’en nib kireb, ma kug rin’ u p’eowchen Kristus ni bochmed,

¹¹ni bochan e ngad ted mo’onyan’ ndabiyag ni nge gel ngodad; ya gadad manang e tin be leamnag ngodad.

¹²Nap’an ni gu taw nga Troas ni nggu machibnag e Thin Ni Bfel’ ni murung’agen Kristus, mu gu pir’eg ni Somol e ke bing e kanawo’ ngog ko maruwel ni nggu tay u rom.

¹³Machane ri magafan’ug ya da gu pir’eg walagdad i Titus. Ma aram mu gu fangichiy e girdi’ u rom, mu gu wan nga Macedonia.

¹⁴Machane ke magaer Got! Ya ta’ab girdi’ ni kad ted Kristus e gubin ngiyal’ ni be fekdad Got i yan ni gadad e kalbus ni yibe dag i yan ni bochan e gel nike tay Kristus. Got e be maruwel ngodad ni ngad muruwliyed nge nang urngin e girdi’ Kristus ni bod rogon ban’en ni bfel’ bon ni be wear u gubin yang i yan.

¹⁵Ya gadad bod bogi ban’en ni bfel’ bon ni yima urfiy nike urfiy Kristus ni fan ngak Got, ni be wear bon ngak e pi’in kar thapgad ngak Got nge pi’in ndawor ra thapgad ngak Got.

¹⁶Ma rogon u wan’ e pi’in kar maloggad e bon ban’en nra nim’ ngay; ma rogon u wan’ e pi’in kar thapgad ngak Got e bon ban’en nra yagnag e yafos. Ere mini’ e rayag rok e mit ney e maruwel?

¹⁷Gathi gadad bod pire’ e girdi’ ni yad ma wereg e thin rok Got ni gowa ba chugum nib sobut’ puluwon; machane gadad e Got e ke l’oegdad, aram fan ni gadad be weliy e tin nib riyul’ u p’eowchen nrogon e pi tapigpig rok Kristus.