1. Kraľengero 16:3-29

³Vašoda akana zňičinava le Baaša the leskera famelija avke, sar oda kerďom le Jeroboamoha, le Nebatoskere čhaha, the leskera famelijaha.

⁴Te vareko le Baašaskera famelijatar merela andro foros, chana les o rikone, a te merela vareko pre maľa, chana les o čirikle.”

⁵Savore aver veci, so kerďa o Baaša, the leskere ňerinďipena (viťaztva), hin pisimen andro Zvitkos le Izraelike Kraľengero.

⁶Paľis o Baaša muľa a parunde les andre Tirca. Pal leste ačhiľa kraľis leskero čhavo o Elah.

⁷O RAJ prevakerďa prekal o prorokos Jehu ko Baaša the ke leskeri famelija, bo kerelas binos anglo RAJ. Peskere binenca the oleha, hoj murdarďa le Jeroboamoskera famelija, pre peste anelas le RAJESKERI choľi.

⁸Andro bišušovto (26) berš, sar kraľinelas o Asa andre Judsko, ačhiľa kraľis upral o Izrael o Elah, le Baašaskero čhavo. Ov kraľinelas andre Tirca duj berš.

⁹Ale pre leste pes ačhaďa leskero služobňikos o Zimri, savo sas veľiťeľis upral o jepaš leskere maribnaskere verdana. Andre jekh džives o Elah mulatinelas a mačiľa andre Tirca andro kher le Arcasoskero, savo sas upral o palacis andre Tirca.

¹⁰Akor avľa o Zimri a murdarďa les. Ačhiľa pes oda andro bišueftato (27) berš, sar kraľinelas andre Judsko o Asa. Avke pal o Elah ačhiľa kraľis o Zimri.

¹¹Paľis, sar bešľa pre leskero tronos, diňa te murdarel savoren andral le Baašaskeri fajta a na mukľa te dživel aňi jekhe muršes andral leskeri famelija the prijaťeľa.

¹²Avke o Zimri murdarkerďa avri caľa Baašaskera famelija avke, sar o RAJ phenďa le Baašaske prekal o prorokos Jehu,

¹³bo o Baaša the o Elah kerenas o bini a lašarenas avre devlen a the le Izraeliten ľidžanas andro binos. Aleha pre peste ande e choľi le RAJESKERI.

¹⁴Savore aver veci, so kerďa o Elah, hin pisimen andro Zvitkos le Izraelike Kraľengero.

¹⁵Andro bišueftato (27) berš, sar kraľinelas o Judsko kraľis Asa, ačhiľa kraľis upral o Izrael o Zimri andre Tirca pro efta džives. Akor o slugaďa andral o Izrael pes rozačhade pašal o Filišťiniko foros Gibbeton.

¹⁶Sar pes o Izraeliti došunde andro taboris, hoj o Zimri pes vzburinďa pro kraľis a murdarďa les, ačhade mek oda džives le Omri vaš o kraľis upral calo Izrael, savo sas veľiťeľis upral o slugaďa andro taboris.

¹⁷Paľis o Omri the calo Izrael omukle o foros Gibbeton a gele pes te rozačhavel pro mariben pašal o foros Tirca.

¹⁸Sar o Zimri dikhľa, hoj o foros sas zailo, geľa andro nekzoraleder kher andro palacis, podlabarďa les a muľa.

¹⁹Kada pes leske ačhiľa vaš peskere bini, bo the ov kerelas oda, so na sas le RAJESKE pre dzeka. Ov kerelas ola bini avke sar o Jeroboam a mek ke oda ľidžalas le Izraeliten andro binos.

²⁰Savore aver veci, so o Zimri kerďa, the oda, sar pes vzburinďa, hin pisimen andro Zvitkos le Izraelike Kraľengero.

²¹Akor o Izraeliti pes rozulade pro duj partiji, bo varesave kamenas, hoj te el kraľis o Tibni, o čhavo le Ginatoskero, ale dujto partija kamenas le Omri.

²²Ale o manuša, save ačhenas paš o Omri, sas zoraleder a ňerinde (zviťazinde) upral le Tibnioskere manuša. Avke o Tibni muľa a o Omri ačhiľa kraľis.

²³Andro trandato ešebno (31) berš, sar kraľinelas andre Judsko o Asa, andro Izrael ačhiľa kraľis o Omri. Ov kraľinelas upral lende dešuduj (12) berš – olestar šov berš andre Tirca.

²⁴Paľis le Šemerostar cinďa o brehos Šomeron vaš eftavardeš (70) kili rup. Avke pro brehos ačhaďa foros, saveske diňa nav Samarija pal o Šemer, bo oda brehos sas angloda leskero.

²⁵O Omri kerelas oda, so na sas le RAJESKE pre dzeka, bo kerelas buter bini sar savore kraľa angle leste.

²⁶Ov kerelas avke sar the o Jeroboam a peskere binoha cirdňa the le Izraeliten pro binos oleha, hoj chudle te lašarel avre devlen. Aleha pre peste ande e choľi le RAJESKERI, le Izraelike Devleskeri.

²⁷Savore aver veci, so kerďa o Omri, the leskere ňerinďipena hin pisimen andro Zvitkos le Izraelike Kraľengero.

²⁸Sar o Omri muľa, parunde les andre Samarija. Pal leste ačhiľa kraľis leskero čhavo o Achab.

²⁹Andro tranda ochtoto (38) berš, sar kraľinelas andre Judsko o Asa, andro Izrael ačhiľa kraľis o Achab, le Omrioskero čhavo. Ov kraľinelas andre Samarija bišuduj (22) berš.