1 Baṉara 16:3-29

³Ke lopu sana kote va mate pania Arau se Basa meke sa nana tatamana, meke kote tavete guni ni Arau gua sapu tavetia Rau koe Zeroboami sa tuna koreo e Nebati.

⁴Na siki kote gani sarini pu te Basa pu mate pa korapana sa vasileana lavata, meke arini pu mate pa sadana sa vasileana, si ari na kurukuru pa galegalearane kote gani.”

⁵Doduru ginugua pule pu taveti e Basa, meke sari nana tinavete varane sa, si ta kubere pa korapana Sa Buka Tinozi tadi na Baṉara pa Izireli.

⁶Mate se Basa meke magogoso turaṉae koari na tamana meke ta pomunae pa Tiriza. Meke se Ela sa tuna koreo si baṉara hobea si asa.

⁷Ke gua asa sa zinama te Zihova, sapu mae gua koasa poropita Zehu sa tuna koreo e Hanani, si la koe Basa meke sa nana tatamana, koa gua koari doduru kinaleana pu taveti sa pa dinoṉo te Zihova sapu va bugoro sisigitina Sa. Lopu koari nana tinavete kaleadi mo si bugoro sisigiti nia e Zihova meke sapu keha lulia sa sa hahanana te Zeroboami, ba koa gua tu sapu va mate betoi sa sari doduru puku tatamana te Zeroboami.

⁸Koasa vina hiokona onomo vuahenina sa binaṉara te Asa pa Ziuda, si tava baṉara pa Izireli se Ela, sa tuna koreo e Basa, meke karua vuaheni si koa baṉara pa Tiriza si asa.

⁹E Zimiri sapu keke ri nana ṉati tie varipera meke na koimata koa sa kukuruna sa nana qeto totopili varipera, si kuhana nia sa se Ela. Pa totoso asa si koa nana pa Tiriza se Ela. Korapa napo va viviri pa vetu te Ariza, sa tie sapu kopu nia sa vetu baṉara pa Tiriza.

¹⁰Nuquru mae mo se Zimiri pa vetu baṉara te Ela, meke seke va matea pa korapana sa vina hiokona zuapa vuahenina sa binaṉara te Asa pa Ziuda. Meke baṉara hobea sa si asa pa binaṉara.

¹¹Sipu podalae tugo sa nana binaṉara, si va mate pani hokari sa sari doduru tiena sa tatamana te Basa. Namu lopu va toa ia sa si keke koreo, be na turaṉana babe na baere.

¹²Ke va mate pania e Zimiri sa doduru tiena sa tatamana te Basa, gua puta tugo sapu zama nia e Zihova meke tozia sa poropita Zehu la koe Basa.

¹³Koa gua koari doduru sinea saripu evaṉi e Basa meke Ela sa tuna koreo meke sapu ta garunu ni e Izireli pude taveti, si va bugoro ia rini se Zihova, sa Tamasa tadi pa Izireli koari na dia beku.

¹⁴Doduru ginugua pule saripu evaṉi e Ela, si ta kubere beto pa korapana sa Buka Tinozi tadi na Baṉara pa Izireli.

¹⁵Koasa vina hiokona zuapa vuahenina sa binaṉara te Asa pa Ziuda, si koa baṉara pa Tiriza meke pa popoa Izireli ka zuapa rane se Zimiri. Meke guahe si ta evaṉa. Sa qeto minate varipera tadi pa Izireli si la koa vari likohae nia sa vasileana lavata pa Qibetoni pa popoa Pilisitia,

¹⁶meke sipu avoso nia rini sapu kuhana nia Zimiri sa baṉara meke va matea sa si asa, si velavela vura nia rini vasina se Omiri sa dia koimata pa vinaripera pude na baṉara pa Izireli.

¹⁷Ke taluarae pa Qibetoni se Omiri meke sa qeto minate Izireli pu luli koasa meke la koa vari likohae nia rini si pa Tiriza.

¹⁸Sipu dogoria tugo Zimiri sapu ele ta vagi sa vasileana lavata, si govete nuquru la si asa pa korapana hokara sa vetu baṉara, meke va katu nia nika sa sa vetu baṉara, pa vari likohaena sa. Mate si asa,

¹⁹koa gua koari na sinea pu evaṉi sa. Tavete va kaleana pa dinoṉo te Zihova meke luli tugo sa sa hahanana te Zeroboami sapu garunu ni sa koe Izireli pude tavete luli.

²⁰Doduru ginugua saripu evaṉi e Zimiri meke sa tinavete sapu tava turu pule nia si asa pa binaṉara Izireli, si ta kubere beto pa korapana sa Buka Tinozi tadi na Baṉara pa Izireli.

²¹Meke paqaha la pa karua pukuna sa tinoni pa Izireli; kukuruna si toka nia pude baṉara se Tibini, sa tuna koreo e Qinata meke sa kali kukuruna si toka la koe Omiri.

²²Ba arini pu luli koe Omiri si ta dogoro sapu arini si ṉiṉira hola ni sarini te Tibini sa tuna koreo e Qinata. Ke mate se Tibini meke baṉara se Omiri.

²³Koasa vina toloṉavulu eke vuahenina sa binaṉara te Asa pa Ziuda si tava baṉara se Omiri pa Izireli, meke ka manege rua vuaheni si koa baṉara si asa, ka onomo vuaheni si pa Tiriza si koa si asa.

²⁴Meke holu ia sa sa toqere pa Sameria; ka onomo tina poata siliva holu nia sa koe Semera. Meke kuri ia sa si keke vasileana nomana pa toqere, meke poza nia Sameria sa si asa, poza luli nia sa koe Semera, sa tie pu tagona sa toqere tatasana.

²⁵Ba se Omiri si tavete va kaleana pa dinoṉo te Zihova meke tavete sinea hola ni sari doduru pu baṉara kekenu koasa.

²⁶Ene si asa pa doduru hahanana na sinea te Zeroboami sa tuna koreo e Nebati saripu tozi sa sari tie Izireli pude tavete luli, ke va bugoro ia rini se Zihova, sa Tamasa tadi pa Izireli koa gua koari na dia beku.

²⁷Doduru ginugua pule saripu evaṉi e Omiri meke sari doduru nana tinavete nomadi, si ta kubere beto pa korapana Sa Buka Tinozi tadi na Baṉara pa Izireli.

²⁸Mate se Omiri meke magogoso si asa turaṉae koari na tamana meke ta pomunae pa Sameria. Meke e Ehabi sa tuna koreo si baṉara hobea si asa.

²⁹Koasa vina toloṉavulu vesu vuahenina sa binaṉara te Asa pa popoa Ziuda, si tava baṉara pa popoa Izireli se Ehabi sa tuna e Omiri. Pa Sameria si koa si asa meke baṉara nia sa si pa Izireli ka hiokona rua vuaheni.