1Ämi chiechiei kana mi achengicheng, ousap lükü chokewe meinisin mi apasa pwe ra eäni Ngünmifel, nge oupwe sotuniir o küttaöchü are ekewe ngün ra feito seni Kot. Pun chomong soufos chofona ra feilfetal won fanüfan.
2Iei usun ämi oupwe tongeni silei ika iei i ewe Ngünün Kot: Iteiten ngün mi pwärätä pwe Jesus Kraist a feito o wiliti aramas a feito seni Kot.
3Nge iteiten ngün a amamäsini ei pworaus usun Jesus esap feito seni Kot. Iei i ngünün ewe Pölüen Kraist, oua fen rong pwe epwe war, nge iei a fen nom won fanüfan.
4Nge ämi nei kana, oua nöün Kot, oua akufu ekewe soufos chofona, pun ewe Ngün mi nom lomi a manaman seni ewe ngün mi nom lon chokewe ra pop seni fanüfan.
5Ekei sokun soufos chofona ra kapas usun mettochun fanüfan, iwe, chon fanüfan ra aüseling ngeniir, pun ir ra pop seni fanüfan.
6Nge kich sia nöün Kot. Eman mi silei Kot a aüseling ngenikich, nge eman esap nöün Kot esap aüseling ngenikich. Iei usun sia tongeni esilla eman Ngün mi let me eman ngün mi chofona.
7Ämi chiechiei kana mi achengicheng, ousipwe echenifengenikich lefilach, pun chen a pop seni Kot. Eman mi eäni chen a up seni Kot, a pwal silei Kot.
8Nge eman esap eäni chen, esap silei Kot, pun Kot chen.
9Iwe, Kot a pwäri an echenikich ren an tinato Nöün Aleman lon fanüfan, pwe kich sipwe manau ren.
10Iei wewen chen: Esap pwe kich sia echeni Kot, nge i a echenikich o tinato Nöün we pwe i popun pwe ach tipis kana ra musala.
11Ämi chiechiei kana mi achengicheng, are iei usun än Kot echenikich, kich sipwe pwal echenifengenikich lefilach.
12Esap wor mwo eman a fen küna Kot. Nge are sia echenifengenikich lefilach, Kot a nonom loch o an chen a unusöchüla loch.
13Sia silei pwe sia nonom lon Kot o i a nonom loch, pun a fang ngenikich Ngünün we.
14Iwe, sia küna o asile ngeni aramas, pwe ewe Sam a tinato Nöün we an epwe amanaua chon fanüfan.
15Are eman a pwärätä pwe Jesus i ewe nöün Kot, Kot a nonom lon, nge i a nonom lon Kot.
16Iwe, kich sia silei o lükü ewe chen Kot a eäni ngenikich. Kot chen. Eman mi nonom lon chen a nonom lon Kot, nge Kot a nonom lon.
17Ren ei chen a unusöchüla loch, pwe sia apilükülüköch lon ewe Ränin Kapwüng. Ewer, sipwe eäni apilükülüköch, pun manauach won ei fanüfan a usun chök manauen Kraist.
18Esap wor niuokus lon chen. Chen mi unusöch a asüela niuokus meinisin. Iei mine chen esap unusöchüla lon manauen eman mi niuokus, pun niuokus a pop seni än eman ekieki pwe epwe küna liwiningau.
19Sia eäni chen, pun Kot a akomwen echenikich.
20Are eman a apasa, “Üa echeni Kot,” nge a oput pwiin, i eman chon chofona. Pun epwe ifa usun an epwe echeni Kot, ewe esap küna, nge ese fen echeni pwiin we mi küna?
21Iei ewe allük Kraist a ngenikich: Eman mi echeni Kot epwe pwal fokun echeni pwiin.
