1Oupwe nengeni ükükün watten än ewe Sam echenikich! An chen a fokun tekia pwe a aita ngeni kich nöün. Iei mine kich wesewesen nöün Kot. Ina popun pwe fanüfan esap sileikich, pun esap silei Kot.
2Ämi chiechiei kana mi achengicheng, ikenai kich nöün Kot, nge esamwo pwä mine sipwe usuni me mürin. Nge sia silei pwe lupwen Kraist epwe wareto sipwe wewe ngeni i, pun sipwe küna i lon wesewesen lapalapan.
3Iwe, eman mi eäni ei apilükülüköch lon Kraist a püsin alimelimöchü manauan usun Kraist a limelimöch.
4Eman mi föri tipis a atai än Kot allük, pun tipis wewen atai allük.
5Ämi oua silei pwe Kraist a war an epwe angeala ach tipis kana. Iwe, oua silei pwe esap wor an tipis.
6Iei mine eman mi nonom lon Kraist esap sopwela le föri tipis, nge eman mi sopwela le föri tipis esap fokun küna i ika silei i.
7Nei kana, ousap mwüt ngeni eman epwe atupukemi! Eman mi föri mine a pwüng, a pwüng usun chök Kraist a pwüng.
8Are eman a sopwela le föri tipis, i nöün Tefil, pun Tefil a tipis seni lepoputan. Iei popun pwe Nöün Kot a war an epwe atala än Tefil angang.
9Eman mi nöün Kot esap sopwela le föri tipis, pun manauen Kot a nonom lon. Iwe, esap tongeni sopwela le föri tipis, pun a up seni Kot.
10Iei fatöchün sokofesenin lefilen nöün Kot me nöün Tefil: Eman esap föri mine a pwüng, ika esap echeni pwiin we, i esap nöün Kot.
11Iei ewe pworaus oua rongorong seni lepopun: Sipwe echenifengenikich lefilach.
12Sisap wewe ngeni Kain, i nöün Ewe mi Ngau, a püsin niela pwiin we Epel. Pwota Kain a niela pwiin we? Pun ekewe föför a föri ra ngau, nge än pwiin kewe föför ra pwüng.
13Ämi pwii kana, ousap weitifengenikemi are aramasen fanüfan ra oputakemi.
14Kich sia silei, pwe sia towu seni mäla o tolong lon manau, pun sia echeni pwiich kana. Eman esap echeni pwiin a chüen nonom fän nemenien mäla.
15Eman mi oput pwiin, i eman chon niela aramas. Iwe, oua silei pwe eman chon niela aramas esap eäni manau esemüch lon manauan.
16Iei usun sia silei met wewen chen: Kraist a fangela manauan fän itach, ina usun pwal kich sipwe fangala manauach fän iten pwiich kana!
17Are eman aramas mi pisekisek a küna pwiin lon an osupwang, nge esap tongei o alisi, ifa usun a eäni än Kot we chen lon letipan?
18Ämi nei kana, ach chen esap fis lon kapas chök, pwe pwal lon ach föför mi let.
19Iwe, iei usun sia silei pwe sia pop seni ewe let. Iei usun sipwe pwal eäni apilükülük mwen mesen Kot.
20Are mwelien letipach a atipisikich, sia silei pwe Kot a tekia seni mwelien letipach, a pwal silei mettoch meinisin.
21Iei mine chiechiei kana mi achengicheng, are mwelien letipach esap atipisikich, sia eäni apilükülük mwen mesen Kot.
22Sia angei seni Kot meinisin mine sia tüngor, pun sia aleasochisi an kewe allük o föri met epwe pwapwa ren.
23Iei an allük: Sipwe lükü Nöün we Jesus Kraist, sipwe pwal echenifengenikich lefilach, usun Kraist a fen allük ngenikich.
24Eman mi aleasochisi än Kot kewe allük a nom lon Kot, nge Kot a nom lon. Iwe, pokiten ewe Ngünmifel Kot a fang ngenikich sia silei pwe Kot a nom loch.
