1 యోహనః 4

1

2

3

4

5

¹హే ప్రియతమాః, యూయం సర్వ్వేష్వాత్మసు న విశ్వసిత కిన్తు తే ఈశ్వరాత్ జాతా న వేత్యాత్మనః పరీక్షధ్వం యతో బహవో మృషాభవిష్యద్వాదినో జగన్మధ్యమ్ ఆగతవన్తః|

²ఈశ్వరీయో య ఆత్మా స యుష్మాభిరనేన పరిచీయతాం, యీశుః ఖ్రీష్టో నరావతారో భూత్వాగత ఏతద్ యేన కేనచిద్ ఆత్మనా స్వీక్రియతే స ఈశ్వరీయః|

³కిన్తు యీశుః ఖ్రీష్టో నరావతారో భూత్వాగత ఏతద్ యేన కేనచిద్ ఆత్మనా నాఙ్గీక్రియతే స ఈశ్వరీయో నహి కిన్తు ఖ్రీష్టారేరాత్మా, తేన చాగన్తవ్యమితి యుష్మాభిః శ్రుతం, స చేదానీమపి జగతి వర్త్తతే|

⁴హే బాలకాః, యూయమ్ ఈశ్వరాత్ జాతాస్తాన్ జితవన్తశ్చ యతః సంసారాధిష్ఠానకారిణో ఽపి యుష్మదధిష్ఠానకారీ మహాన్|

⁵తే సంసారాత్ జాతాస్తతో హేతోః సంసారాద్ భాషన్తే సంసారశ్చ తేషాం వాక్యాని గృహ్లాతి|

⁶వయమ్ ఈశ్వరాత్ జాతాః, ఈశ్వరం యో జానాతి సోఽస్మద్వాక్యాని గృహ్లాతి యశ్చేశ్వరాత్ జాతో నహి సోఽస్మద్వాక్యాని న గృహ్లాతి; అనేన వయం సత్యాత్మానం భ్రామకాత్మానఞ్చ పరిచినుమః|

⁷హే ప్రియతమాః, వయం పరస్పరం ప్రేమ కరవామ, యతః ప్రేమ ఈశ్వరాత్ జాయతే, అపరం యః కశ్చిత్ ప్రేమ కరోతి స ఈశ్వరాత్ జాత ఈశ్వరం వేత్తి చ|

⁸యః ప్రేమ న కరోతి స ఈశ్వరం న జానాతి యత ఈశ్వరః ప్రేమస్వరూపః|

⁹అస్మాస్వీశ్వరస్య ప్రేమైతేన ప్రాకాశత యత్ స్వపుత్రేణాస్మభ్యం జీవనదానార్థమ్ ఈశ్వరః స్వీయమ్ అద్వితీయం పుత్రం జగన్మధ్యం ప్రేషితవాన్|

¹⁰వయం యద్ ఈశ్వరే ప్రీతవన్త ఇత్యత్ర నహి కిన్తు స యదస్మాసు ప్రీతవాన్ అస్మత్పాపానాం ప్రాయశ్చిర్త్తార్థం స్వపుత్రం ప్రేషితవాంశ్చేత్యత్ర ప్రేమ సన్తిష్ఠతే|

¹¹హే ప్రియతమాః, అస్మాసు యదీశ్వరేణైతాదృశం ప్రేమ కృతం తర్హి పరస్పరం ప్రేమ కర్త్తుమ్ అస్మాకమప్యుచితం|

¹²ఈశ్వరః కదాచ కేనాపి న దృష్టః యద్యస్మాభిః పరస్పరం ప్రేమ క్రియతే తర్హీశ్వరో ఽస్మన్మధ్యే తిష్ఠతి తస్య ప్రేమ చాస్మాసు సేత్స్యతే|

¹³అస్మభ్యం తేన స్వకీయాత్మనోంఽశో దత్త ఇత్యనేన వయం యత్ తస్మిన్ తిష్ఠామః స చ యద్ అస్మాసు తిష్ఠతీతి జానీమః|

¹⁴పితా జగత్రాతారం పుత్రం ప్రేషితవాన్ ఏతద్ వయం దృష్ట్వా ప్రమాణయామః|

¹⁵యీశురీశ్వరస్య పుత్ర ఏతద్ యేనాఙ్గీక్రియతే తస్మిన్ ఈశ్వరస్తిష్ఠతి స చేశ్వరే తిష్ఠతి|

¹⁶అస్మాస్వీశ్వరస్య యత్ ప్రేమ వర్త్తతే తద్ వయం జ్ఞాతవన్తస్తస్మిన్ విశ్వాసితవన్తశ్చ| ఈశ్వరః ప్రేమస్వరూపః ప్రేమ్నీ యస్తిష్ఠతి స ఈశ్వరే తిష్ఠతి తస్మింశ్చేశ్వరస్తిష్ఠతి|

¹⁷స యాదృశో ఽస్తి వయమప్యేతస్మిన్ జగతి తాదృశా భవామ ఏతస్మాద్ విచారదినే ఽస్మాభి ర్యా ప్రతిభా లభ్యతే సాస్మత్సమ్బన్ధీయస్య ప్రేమ్నః సిద్ధిః|

¹⁸ప్రేమ్ని భీతి ర్న వర్త్తతే కిన్తు సిద్ధం ప్రేమ భీతిం నిరాకరోతి యతో భీతిః సయాతనాస్తి భీతో మానవః ప్రేమ్ని సిద్ధో న జాతః|

¹⁹అస్మాసు స ప్రథమం ప్రీతవాన్ ఇతి కారణాద్ వయం తస్మిన్ ప్రీయామహే|

²⁰ఈశ్వరే ఽహం ప్రీయ ఇత్యుక్త్వా యః కశ్చిత్ స్వభ్రాతరం ద్వేష్టి సో ఽనృతవాదీ| స యం దృష్టవాన్ తస్మిన్ స్వభ్రాతరి యది న ప్రీయతే తర్హి యమ్ ఈశ్వరం న దృష్టవాన్ కథం తస్మిన్ ప్రేమ కర్త్తుం శక్నుయాత్?

²¹అత ఈశ్వరే యః ప్రీయతే స స్వీయభ్రాతర్య్యపి ప్రీయతామ్ ఇయమ్ ఆజ్ఞా తస్మాద్ అస్మాభి ర్లబ్ధా|